އެޑިއުކޭޝަން މިނިސްޓްރީގެ ޕީއެސް އިސްތިޢުފާދެއްވައިފި
އޭނާ ރާއްޖެ އެމްވީ އަށް ވިދާޅުވީ 1 ފެބްރުއަރީ އިން ފެށިގެން މަޤާމުން އިސްތިއުފާދެއްވާފައިވާ ކަމަށް
އެޑިއުކޭޝަން މިނިސްޓްރީގެ ޕީއެސް އިސްތިޢުފާދެއްވުން
އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ އަހުމަދު އަލީ މަގާމުން އިސްތިއުފާ ދެއްވައިފިއެވެ.
އޭނާ ރާއްޖެ އެމްވީ އަށް ވިދާޅުވީ 1 ފެބްރުއަރީ އިން ފެށިގެން މަޤާމުން އިސްތިއުފާދެއްވާފައިވާ ކަމަށެވެ. އަދި އިސްތިއުފާދެއްވީ އަމިއްލަ ސަބަބުތަކާއި ހެދި ކަމަށް ވަނީ ވިދާޅުވެފައެވެ. ހަމައެހެންމެ މިވަގުތު އޭނާ މަޤާމުގައި ދެމިހުންނެވުމަކީ އެންމެ ރަނގަޅު ގޮތް ކަމަށް ނުފެންނަ ކަމަށް ވެސް އޭނާ ވިދާޅވުިއެވެ. މަޤާމުން ވަކިވުމުން އޭނާ ސިޔާސީ ދާއިރާ އަށް ނުކުންނަވަނީ ކަމަށް އަޑުފެތުރުނެވެ. ނަމަވެސް އޭނާ ވަނީ އެކަން ދޮގުކުރައްވާފައެވެ.
އޭނާ މަޤާމުން އިސްތިއުފާ ދެއްވާފައި މި ވަނީ ސިވިލް ސާވިސް ކޮމިޝަން (ސީއެސްސީ) އަށް ހުށަހެޅި މައްސަލައަކާ ގުޅިގެން މިދިޔަ ޖެނުއަރީ މަހުން ފެށިގެން ސަސްޕެންޑްކޮށްފައި ވަނިކޮށެވެ. އޭނާ ސަސްޕެންޑްކުރީ މިދިޔަ ޖެނުއަރީ މަހުގެ 3 ވަނަ ދުވަހުއެވެ. އަދި އޭނާ އިސްތިއުފާ ދެއްވާފައި މި ވަނީ އޭނާގެ ސަސްޕެންޝަންގެ މުއްދަތު ހަމަވުމުގެ މަހެއްހާ ދުވަސް ކުރިންނެވެ.
އަހުމަދު އަލީ އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީގެ މަޤާމަށް އައްޔަންކޮށްފައި ވަނީ ކުރީގެ ރައީސް އިބްރާހިމް މުހައްމަދު ޞާލިހްގެ ސަރުކާރުގައި ޖޫން 13، 2019 ގައެވެ. އޭނާ އެ މަޤާމަށް އައްޔަންކޮށްފައި ވަނީ ފަސް އަހަރު ދުވަހުގެ މުއްދަތަކަށެވެ. އަދި އޭނާގެ ދައުރު ހަމަވާނީ މި ހިނގާ 2024 ވަނަ އަހަރުގެ ޖޫން މަހުގައެވެ.
އަހުމަދު އަލީ އަކީ ތައުލީީމީ ދާއިރާ އަށް ގިނަ ޚިދުމަތްތަކެއް ކުރައްވާފައިވާ ބޭފުޅެކެވެ. އޭނާ އެ ދާއިރާއާ ގުޅިވަޑައިގަތީ 2000 ވަނަ އަހަރު ވަގުތީ މުދައްރިސެއްގެ ގޮތުގައެވެ. އޭނާ ވަނީ މޭނޭޖްމަންޓް ފެންވަރުގައި ގިނަ މަޤާމްތަކެއް ފުރުއްވާފައެވެ. މީގެ އިތުރުން އޭނާ ވަނީ ސްކޫލް މެނޭޖްމަންޓް ދާއިރާ އިން މާސްޓާސް ހާސިލް ކުރައްވާފައެވެ. މީގެ ކުރިން 2013 ވަނަ އަހަރު އިލެކްޝަންސް ކޮމިޝަންގެ އެސިސްޓަންޓް ޑިރެކްޓަރުގެ މަޤާމުވެސް އޭނާ ވަނީ އަދާކުރައްވާފައެވެ. ހަމައެހެންމެ 2015 ވަނަ އަހަރު އޭނާ އެ ކޮމިޝަންގެ ސެކްރެޓަރީ ޖެނެރަލް ކަން އަދާކުރައްވާފައިވެއވެެ. އެ މަގާމުގައި އޭނާ ދެމިހުންނެވީ ފެބްރުއަރީ 2018 އާ ހަމައަށެވެ.
