މަޖިލިސް ތެރޭގައި ހިނގި ހަމަނުޖެހުންތަކާއި ގުޅިގެން އާއްމުންނާއި މެންބަރު ޝަހީމްގެ ކިބައިން އީސަ މަޢާފަށް އެދިވަޑައިގަންނަވައިފި
1 ފެބުރުއަރީ 2024 | ބުރާސްފަތި 03:02އެ ދެވަހު މަޖިލީހުގައި ހިނގިކަންކަމަކީ ވަރަށް ދުރާލާ ރާވައިގެން ބަޔަކު ސިޔާސީ މަޤްސަދެއްގައި ހިންގި ކަމެއް ކަަމަށް އީސަ ވިދާޅުވި
މަޖިލިސް ތެރޭގައި ހިނގި ހަމަނުޖެހުންތަކުގައި މެންބަރު ޝަހީމްގެ ބޯ ފަޅައިގެން ގޮސްފައި
ރައްޔިތުންގެ މަޖިލިސް ތެރޭގައި ހިނގި ހަމަނުޖެހުންތަކާއި ގުޅިގެން އާއްމުންނާއި ކަނޑިތީމު ދާއިރާގެ މެންބަރު އަބްދުﷲ ޝަހީމް އަބްދުލް ހަކީމްގެ ކިބައިން ކެނދިކުޅުދޫ ދާއިރާގެ މެންބަރު އަހުމަދު އީސަ މަޢާފަށް އެދިވަޑައިގަންނަވައިފިއެވެ.
އީސަ މަޢާފަށް އެދިވަޑައިގަތީ ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުންނެވެ.
މިދިޔަ އާދީއްތަ ދުވަހު ދައުރުން ބޭރުން ބޭއްވި މަޖިލީހުގެ ޖަލްސާގައި ވަޒީރުންނަށް ރުހުން ދިނުމުގެ މައްސަލައިގެ ވޯޓު ނަގަން ޝެޑިއުލްކުރިއެވެ. އެހެންނަމަވެސް އެ މަަސައްކަތް ކުރިއަށް ގެންދަން ސަރުކާރަށް ނިސްބަތްވާ ޕީޕީއެމް ޕީއެންސީގެ މެންބަރުން ފުރުސަތެއް ނުދެއްވައެވެ. ޕީއެންސީ އާއި ޕީޕީއެމް އިން މަސައްކަތް ކުރީ މަޖިލިސް ކުރިއަށް ގެންދިޔަ ނުދިނުމަށެވެ. އެމްޑީޕީ އިން މަސައްކަތް ކުރީ ޖަލްސާ ކުރިއަށް ގެންދާށެވެ. މިއާއެކު މެންބަރުންގެ މެދުގައި ހޫނު ބަހުގެ ހަމަލާތަކެއް ރައްދުކުރިއެވެ. އަދި މަސްރަހު ހޫނުވެ ބައެއް މެންބަރުން އެއް ބޭފުޅަކު އަނެއް ބޭފުޅެއްގެ ގައިކޮޅަށް އަތްލާ ހިސާބަށް ކަންކަން ދިޔައެވެ. އެގޮތުން މީސްމީޑިއާގައި ދައުރުވި ވީޑިއޯތަކުގެ ތެރޭގައި މެންބަރު އީސަ އާއި މެންބަރު ޝަހީމްގެ ދެމެދުގައި ހިނގި ހަމަނުޖެހުންތަކުގެ ވީޑިއޯ ވެސް ހިމެނެއެވެ. އަދި ލިބުނު އަނިޔާތަކަށް ފަރުވާ ދިނުމަށް ޝަހީމް އޭޑީކޭއަށް ގެންގޮސް ފަރުވާ ދީފައިވެއެވެ.
ފަލަސުރުޚީގައި ވާހަކަދައްކަވަމުން އީސަ ވިދާޅުވީ މަޖިލީހުގައި އެ ދުވަހު ކަންކަން ހިނގި ގޮތް ހަމައެކަނި ދެތިން ވީޑިއޯއަކުން ސާފުކޮށް ނޭނގޭނެ ކަމަށެވެ. އެކަމުގެ ތެރޭގައި ހިނގި ކަންކަން ދެނެގަނެވޭނީ މަންޒަރު ހިނގާ ދިޔަ ގޮތް ފެށިގެން ނިމެންދެން ބެލީމަ ކަމަށާއި މަޖިލީހުގެ ސީސީޓީވީ ކެމެރާ އިން އެ ދުވަހު ކަން ހިނގި ގޮތް ވަރަށް ބޮޑަށް ސާފުވާނެ ކަަމަށް އޭނާ ވިދާޅުވިއެވެ. އެ ދެވަހު މަޖިލީހުގައި ހިނގިކަންކަމަކީ ވަރަށް ދުރާލާ ރާވައިގެން ބަޔަކު ސިޔާސީ މަޤްސަދެއްގައި ހިންގި ކަމެއް ކަމަށް އީސަ ވަނީ ތުހުމަތުކުރައްވާފައެވެ. އީސަ ވިދާޅުވީ ރައްޔިތުންގެ މަޖިލީހުގައި ހިނގާ ސިޔާސީ ހަލަބޮލިކަމުގެ ތެރޭގައި ބައެއް ފަހަރު އާއްމު ރައްޔިތުން ބޭނުން ނުވާ މަންޒަރު މަޖިލީހުގެ ތެރެއިން ފެނިގެންދާ ކަމަށާއި އެކަމާއި ހިތާމަކުރައްވާ ކަމަށެވެ. އަދި އެކަމަށްޓަކައި އާއްމުންގެ ކިބައިން މަޢާފަށް އެދިވަޑައިގަންނަވާ ކަަމަށް އީސަ ވިދާޅުވިއެވެ.
މެންބަރު އީސަ ވަނީ އެއްވެސް މެންބަރަކަށް އަނިޔާކުރުމުގެ މަޤްސަދުގައި އެއްވެސް ކަމެއް ކުރައްވާފައި ނުވާނެ ކަަމަށް ވިދާޅުވެފައެވެ. އަދި މަޖިލީހުގައ މެންބަރުން ވަޒީރުންނަށް ރުހުން ދޭ ގޮތާއި މެދު ޖަވާބުދާރީވާން ޖެހިވަޑައިނުގަންނަވާނެ ކަމަށާއި އެހެންނަމަވެސް އެތައް އިރަކު މަސައްކަތްކޮށްގެން ވެސް މަޖިލީހުގެ ޖަލްސާ ކުރިއަށް ގެންދަން ފުރުސަތު ނުލިބުނުކަމަށް އީސަ ވިދާޅުވިއެވެ. އަދި އެ ދުވަހު މަޖިލީހުގެ ރައީސް މުހައްމަދު އަސްލަމަށް ސަރުކާރުގެ މެންބަރުން ފުރައްސާރަކުރިކަމަށް ވެސް އީސަ ވިދާޅުވިއެވެ.
މި ސަރުކާރުގެ އިކޮނޮމިކް މިނިސްޓަރު މުހައްމަދު ސައީދާއި އެޓަރނީ ޖެނެރަލް އަހުމަދު އުޝާމް އާއި އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދުގެ އިތުރުން ހައުސިން މިނިސްޓަރު ޑރ.އަލީ ހައިދަރަށް ރުހުން ނުދޭން އެމްޑީޕީ ޕީޖީ ގްރޫޕުން ނިންމިއެވެ. ނަމަވެސް މިނިސްޓަރު ސައީދަށް ރުހުން ލިބުނެވެ. ބާކީ ތިން ބޭފުޅުންނަށް ރުހުން ނުލިބުނު ނަމަވެސް ސަރުކާރުން ވަނީ އެ ތިން ބޭފުޅުން އަލުން މަޤާމަށް އައްޔަނުކުރައްވާފައެެވެ. އަދި މިކަމާއި ގުޅިގެން ސަރުކާރަށް ވަނީ ވަރަށް ބޮޑަށް ފާޑުކިޔުން ވެސް އަމާޒުވެފައެވެ.
