ވަޒީރުންގެ ފެންވަރުގައި ކޮމިޝަނަރ އޮފް ސްޕޯރޓްސްގެ މަގާމަށް ތޮލާލް

ވަޒީރުންގެ ފެންވަރުގައި ކޮމިޝަނަރ އޮފް ސްޕޯރޓްސްގެ މަގާމަށް މުހައްމަދު ތޮލާލް އައްޔަން ކުރައްވައިފިއެވެ.

ތޮލާލް އަކީ އެތްލެޓިކްސް އެސޯސިއޭޝަންގެ ކުރީގެ ރައީސްއެވެ. އެމަގާމްގައި ދެވަނަ ދައުރު ފުރިހަމަކުރައްވަމުން ގެންދެވި ތޮލާލް, އެމަގާމުން އިސްތިއުފާ ދެއްވީ ކޮމިޝަނަރ އޮފް ސްޕޯރޓްސްގެ މަގާމާ ހަވާލުވެވަޑައިގަތުމަށެވެ. އޭނާ އަކީ މޯލްޑިވްސް އޮލިމްޕިކް ކޮމިޓީގެވެސް ނައިބު ރައީސް އެވެ. އެމަގާމުން އޭނާ އިސްތިއުފާއެއް ނުދެއްވައެވެ. ގާނޫނު އޮތްގޮތުން އިސްތިއުފާ ދިނުން ލާޒިމް ނޫންކަމަށް ވެއެވެ. ތޮލާލް އަކީ ޕީޕީއެމްގެ ސެކެޓްރީ ޖެނެރަލްވެސް މެއެވެ.

މިސަރުކާރު އިންތިޚާބުވިއިރު ކޮމިޝަނަރ އޮފް ސްޕޯރޓްސްގެ މަގާމް އޮތީ ހުހަށެވެ. އެއީ މިދިޔަ ސަރުކާރުގައި އެމަގާމަށް އައްޔަންކުރެއްވި ހީނާ އަހުމަދު ސަލީމްގެ ދައުރު ހަމަވުމަށްފަހު އެހެން ބޭފުޅަކު އެމަގާމަށް އައްޔަންކުރައްވާފައި ނުވާތީއެވެ. އަދި އެމަގާމަށް މީގެކުރިން އައްޔަންކުރެއްވި ބޭފުޅުން އައްޔަންކުރެއްވީ ޑެޕިއުޓީ މިނިސްޓަރު ފެންވަރުގައެވެ.

ސްޕޯރޓްސް ކޮމިޝަނަރުގެ މަގާމަކީ 2015 ވަނަ އަހަރު ތަސްދީގުކުރެއްވި ކުޅިވަރުގެ ޤާނޫނުގެ ދަށުން އައްޔަންކުރައްވާ މަގާމެކެވެ. ހުރިހާ ކުޅިވަރު އެސޯސިއޭޝަންތަކާއި، ކުޅިވަރު ކުލަބްތައް ބަލަހައްޓަން ޖެހެނީ ސްޕޯރޓްސް ކޮމިޝަނަރުގެ އޮފީހުންނެވެ. ކުޅިވަރުގެ ޤާނޫނުގެ ދަށުން އެންމެ ފުރަތަމަ އައްޔަންކުރެއްވި ސްޕޯރޓްސް ކޮމިޝަނަރަކީ އަހުމަދު ނަޝީދު (ދޭވް) އެވެ. އޭނާ އިސްތިއުފާ ދެއްވުމުން ރައީސް ޔާމީނުގެ ދައުރުގައި އެމަގާމަށް އައްޔަންކުރެއްވީ ކުރީގެ އެއްވަނަ ފޯވާޑް އަލީ އުމަރެވެ. އޭނާ ވަކިކުރައްވާ ހީނާ އަހުމަދު ސަލީމް އެމަގާމަށް އައްޔަންކުރެއްވީ މިދިޔަ ސަރުކާރުގައެވެ. ހީނާ ސަލީމްގެ ދައުރު ހަމަވުމުން އެމަގާމް އޮތީ ހުހަށެވެ.