ގައުމީ ކްރިކެޓް ޓީމުގައި ސްރީލަންކާ ތިން ކުޅުންތެރިން!

 އޭސީސީ މެންސް ކްރިކެޓް ޗެލެންޖް ކަޕްގައި ވާދަކުރާ ގައުމީ ކްރިކެޓް ޓީމްގައި ސްރީލަންކާގެ ތިން ކުޅުންތެރިން ހިމަނައިފިއެވެ.

މުބާރާތުގައި ވާދަކުރަން ގައުމީ ޓީމް ތައިލެންޑަށް ދިޔައީ ސްރީލަންކާގެ ތިން ކުޅުންތެރިންނާ އެކުގައެވެ. އޭސީސީގެ ގަވާއިދު ބުނާ ގޮތުން އެހެން ގައުމެއްގެ ޕާސްޕޯޓް އޮތަސް, އެގައުމެއްގައި މަސައްކަތްކުރާތާ ތިން އަހަރުވެއްޖެ ނަމަ އަދި އެގައުމުން ބޭރުގައި 60 ދުވަސް ނުވާނަމަ ގައުމީ ޓީމަށް ކުޅުމުގެ ފުރުޞަތު ލިބެއެވެ. އެފުރުޞަތުގެ ދަށުން ގައުމީ ކްރިކެޓް ޓީމްގައި ރާއްޖޭގައި މަސައްކަތްކުރާ ލަންކާ ތިން ކުޅުންތެރިން ވަނީ ހިމަނާފައެވެ.

މިމަހުގެ 27 ވަނަ ދުވަހު ތައިލެންޑްގައި ފެށި މުބާރާތުގެ ގްރޫޕް ސްޓޭޖްގައި ރާއްޖެ ފުރަތަމަ މެޗުގައި އަންނަ މަހުގެ ދެވަނަ ދުވަހު ވާދަކުރާނީ ސިންގަޕޯރ އާއެވެ. އެއީ ގްރޫޕްގެ އެންމެ ވަރުގަދަ ޓީމެވެ. މުބާރާތުގެ ކުރިން ރާއްޖެއިން އިންޑޮނޭޝިޔާއާއެކު ޕްރެކްޓިސް ދެ މެޗު ކުޅޭނެއެވެ. ފުރަތަމަ މެޗު 10 ލަނޑުން ރާއްޖެ ވަނީ ކާމިޔާބުކޮށްފައެވެ. އިންޑޮނޭޝިޔާއަކީ މުބާރާތުގައި ވާދަކުރާ ގައުމެކެވެ. ނަމަވެސް އިންޑޮނޭޝިޔާ އޮތީ އަނެއް ގްރޫޕްގައެވެ. ރާއްޖެއާ އެއް ގްރޫޕެއްގައި ސިންގަޕޯރގެ އިތުރުން ހިމެނެނީ ޖަޕާން އަދި ތައިލެންޑެވެ. ރާއްޖޭގެ ކްރިކެޓް ބޯޑްގެ އަމާޒަކީ ފުރަތަމަ ސެމީފައިނަލށް ދަތުރުކުރުމެވެ.

ރާއްޖޭގެ ޓީމްގެ ކެޕްޓަނަކީ ހާޒިގު އެވެ. ވައިސް ކެޕްޓަނަކީ އާދަމް ނާސިފް އުމަރެވެ. އޮސްޓްރޭލިޔާގައި ތަމްރީނު ހޯދަމުންދާ ރާއްޖޭގެ ބާރު އުކުންތެރިޔާ ހަސަން ތައިލެންޑުން ވަނީ ޓީމާ ގުޅިފައެވެ. ރާއްޖެ އޮތް ގްރޫޕްގައި ދެ މެޗުން މޮޅުވެ ސެމީފައިނަލަށް ދެވޭނެ ކަމަށް ކްރިކެޓް ބޯޑުން ގަބޫލުކުރެއެވެ.