އައްޑޫއަށް ޑޮލަރު އޭޓީއެމްއެއް މިވަގުތު މުހިއްމު: ނިޒާރު
އައްޑޫގައި ޑޮލަރު އޭޓީއެމްއެއް ބަހައްޓައިދެއްވާނެކަމަށް ކުރީގެ ރައީސް ސާލިޙު ނިމިދިޔަ ކެމްޕޭނުގައި ވިދާޅުވި
އައްޑޫ މޭޔަރު އަލީ ނިޒާރު
އައްޑޫއަށް ޑޮލަރު އޭޓީއެމްއެއް މިވަގުތު މުހިއްމުކަމަށް އައްޑޫ މޭޔަރު އަލީ ނިޒާރު ވިދާޅުވެއްޖެއެވެ.
ރާއްޖެޓީވީއާ ވާހަކަ ދައްކަވަމުން ނިޒާރު ވިދާޅުވީ، ޑޮލަރު އޭޓީއެމްއެއް މިވަގުތަށް މުހިއްމު ކަމަށާއި، އައްޑޫގައި ޑޮލަރު އޭޓީއެމްއެއް ބަހައްޓައިދެއްވުމަކީ ކުރީގެ ރައީސް އިބްރާހިމް މުޙައްމަދު ސާލިޙު ކެމްޕޭނު ތެރޭގައި ވެވަޑައިގެންފައިވާ ވައުދުފުޅެއްކަމަށެވެ.
މާލެ އެކޭ އެއް ފަދައިން އައްޑޫގައި ފަސޭހައިން ޑޮލަރު ލިބޭނެ އިންތިޒާމު ހަމަޖައްސައި ދިނުމަށް ރައްޔިތުން އެދެމުންދާތީ ބޭންކް އޮފް މޯލްޑިވްސްއާ މަޝްވަރާކޮށްގެން އައްޑޫގައި ޑޮލަރު އޭޓީއެމްގެ ހިދުމަތް ގާއިމުކޮށްދެއްވާނެ ކަމަށް ރައީސް އިބްރާހިމް މުހައްމަދު ސޯލިހު ވަނީ ވައުދުވެވަޑައިގެންފައެވެ.
ނިޒާރު ވިދާޅުވީ، ރައީސް ސާލިޙު ވެރިކަމުގައި ހުންނެވިނަމަ އެ ވައުދު ފުއްދަވައިދެއްވާނެކަން ޔަޤީން ކަމަށެވެ.
ނިޒާރު ވިދާޅުވީ، މިހާރުގެ ރައީސް ޑރ މުޙައްމަދު މުއިއްޒާ އެކު އެޕޮއިންޓްމަންޓަކަށް ކައުންސިލުން އެދިފައިވާނެ ކަމަށާއި، އަދި އެޕޮއިންޓްމަންޓެއް ހަމަޖެހިފައިނުވާކަމަށެވެ. އެހެންނަމަވެސް ރައީސާ ބައްދަލުވެއްޖެނަމަ އެ ކަންބޮޑުވުން ހިއްސާ ކުރައްވާނެކަމަށް ނިޒާރު ވިދާޅުވިއެވެ.
ރައީސް ސާލިޙު އޭރު ވަނީ ޑޮލަރުގެ މައްސަލައަށް ދެ ޙައްލެއް ފާހަގަ ކުރައްވައި، އެމަނިކުފާނުގެ ސިޔާސަތުގައި ހިމަނުއްވާފައެވެ. އެގޮތުން ރާއްޖެ ވަންނަ ޑޮލަރުގެ 30 ޕަސެންޓް ރާއްޖޭގައި ހިފެހެއްޓުމާއި، ރާއްޖޭގައި ކުރާ މުއާމަލާތްތައް ދިވެހި ފައިސާއިން ކުރުން އޭގެ ތެރޭގައި ހިމެނެއެވެ.
