ރައްޔިތުންގެ މަޖިލީހުގެ ސަލާމަތާއި ރައްކާތެރިކަން ގެއްލުނު ސަބަބު ހޯދުމަށް، ރައްޔިތުންގެ މަޖިލީހުގެ ގައުމީ ސަލާމަތާ ބެހޭ ކޮމިޓީ (241 ކޮމެޓީ) އަށް އެ މައްސަލަ ހުށަހެޅުމަށް އެމްޑީޕީން ނިންމައިފިއެވެ.

އާދިއްތަ ދުވަހު އެޖެންޑާކުރެވުނު ވަޒީރުންގެ ރުހުން ދިނުމުގެ މައްސަލައިގައި، ހަތަރު ވަޒީރަކަށް ރުހުން ނުދޭން އެމްޑީޕީން ތްރީ ލައިން ވިޕެއް ނެރުމާއެކު، އެ ޖަލްސާ ކުރިއަށް ދިޔަ ވަގުތު ސަރުކާރަށް ތާއީދުކުރާ މެންބަރުންނާއި، އެކި ފަރާތްތަކުން ވަނީ ހަމަނުޖެހުން ހިންގާފައެވެ.

އެގޮތުން މަޖިލީހުގެ ގޯތީގެ ތެރެއަށް ޕީއެންސީގެ ޗެއާޕާސަން އަދި ރައީސް މުއިއްޒުގެ ޙާއްސަ މުޝީރު އަބްދުއް ރަޙީމް އަބްދުﷲގެ އިތުރުން، ރައީސް އޮފީހުގެ ބައެއް ވަޒީރުންނާއި އާންމު ފަރާތްތަކުން ވެސް ވަދެފައިވާއިރު، ބައެއް ފަރާތްތަކުން ވަނީ މަޖިލީހުގެ ގޯއްޗަށް ގައުފަދަ ތަކެތި ވެސް އުކާފައެވެ.

މި ހަމަނުޖެހުންތައް ހިނގިއިރު، އެ ހަމަނުޖެހުން ހުއްޓުވައި އެ މީހުންނަށް ފިޔަވަޅު އެޅުމަށް މަޖިލީހުގެ ސެކިއުރިޓީ ބަލަހައްޓާ އެމްއެންޑީއެފް އަށް މާ ބޮޑު ކަމެއް ކުރެވިފައެއް ނުވެއެވެ.

އެކަމުގެ ކަންބޮޑުވުން ފާޅުކުރައްވަމުން އެމްޑީޕީން ބޭއްވި ނޫސްވެރިންގެ ބައްދަލުވުމުގައި "ރާއްޖެ ޓީވީން" ކުރި ސުވާލަކަށް ޖަވާބު ދެއްވަމުން ރައްޔިތުންގެ މަޖިލީހުގެ ނައިބު ރައީސް އަދި ހޯރަފުށީ ދާއިރާގެ މެންބަރު އަޙްމަދު ސަލީމް ވިދާޅުވީ މަޖިލީހުގެ ގޯތި ތެރެއަށް ބައެއް ބޭފުޅުން ވެންނެވިކަން އެނގިވަޑައިގަންނަވާ ކަމަށާއި، މަޖިލީހަށް ވަދެ ނުކުތުމުގައި އެއްވެސް އުސޫލެއް ނެތި ހިނގަމުންދިޔަތަން ފެނިވަޑައިގެންނެވި ކަމަށެވެ.

އަދި ސަލާމަތީ ބާރުތަކުން އެބޭފުޅުންގެ ޚިދުމަތް ފުރިހަމަ ގޮތުގައި އަދާކުރެއްވި ކަމަށް ޤަބޫލުނުކުރައްވާ ކަމަށް ވިދާޅުވަމުން ސަލީމް ވިދާޅުވީ، އޭގެ ސަބަބުން މަޖިލީހުގެ ރައީސް އަދި މެންބަރުން ތިއްބެވީ ވަރަށް ބޮޑު ކަންބޮޑުވުމަކާއި ބިރުވެރިކަމެއްގެ ތެރޭގައި ކަމަށެވެ.

ސަލީމް ވިދާޅުވީ މަޖިލީހުގެ ސަލާމަތާއި ރައްކާތެރިކަން ކަށަވަރުކުރެވުމަށް އެކަންތައްތައް ހިނގި ގޮތް ބެލުމަށް، އެ މައްސަލަ މަޖިލީހުގެ 241 ކޮމެޓީއަށް ހުށަހަޅުއްވާނެ ކަމަށެވެ.

އާދިއްތަ ދުވަހު ވެސް ހަމަނުޖެހުން އުފެދުނު، ވަޒީރުންގެ ރުހުން ދިނުމުގެ މައްސަލައިގައި ގޮތެއް ނިންމުމަށް ހޯމަ ދުވަހު ވެސް ވަނީ ޖަލްސާއެއް އެޖެންޑާކޮށްފައެވެ.