މަޖިލީހުގެ ފާރަށް އަރައި، މަޖިލީހުގެ ގޯތި ތެރެއަށް އެއްޗެހި އުކި މައްސަލަ ބަލައިދިނުމަށް އެދިއްޖެ
28 ޖެނުއަރީ 2024 | އާދީއްތަ 15:15މައްސަލަ ހުށަހެޅީ މަޖިލީހުގެ ސަލާމަތީ ކަންތައްތަކާބެހޭ ކޮމިޓީއަށް
މަޖިލިސް ދޮށުގައި މުޒާހަރާކުރުން
އާދިއްތަ ދުވަހު ރައްޔިތުންގެ މަޖިލިސް ކައިރީގައި މުޒާހަރާކުރި މީހުން މަޖިލީހުގެ ފާރަށް އަރައި، މަޖިލީހުގެ ގޯތިތެރެއަށް އެއްޗެހި އުކި މައްސަލަ ބަލައިދިނުމަށް އެދި މަޖިލީހަށް މައްސަލައެއް ހުށަހަޅައިފިއެވެ. އެ މައްސަލަ ހުށަހެޅުއްވީ ގަލޮޅު އުތުރު ދާއިރާގެ މެމްބަރު އީވާ އަބްދުﷲއެވެ.
އާދިއްތަ ދުވަހު މަޖިލިސް ދޮށުގައި މުޒާހަރާކުރީ ޕީޕީއެމް-ޕީއެންސީގެ ސަޕޯޓަރުންނެވެ. އެ މީހުން މުޒާހަރާކުރީ ވަޒީރުންނަށް ރުހުން ދިނުމަށް ގޮވާލުމަށެވެ. ވަޒީރުންނަށް ރުހުން ދިނުމުގެ މައްސަލައިގެ ވޯޓު ނެގުން އާދިއްތަ ދުވަހަށް ތާވަލްކުރި ނަމަވެސް، ސަރުކާރު މެމްބަރުން ވަނީ އެ މައްސަލަ ކުރިއަށް ގެންދިއުމަށް ހުރަސް އަޅާފައެެވެ. އީވާ ހުށަހެޅުއްވި މައްސަލައިގައި ވިދާޅުވެފައިވަނީ ރައްޔިތުންގެ މަޖިލިސްގެއާއި ގޯތިތެރެއާއި ރައްޔިތުންގެ މަޖިލީހުގެ ދަށުން ހިންގާ އެންމެހާ ތަންތަނުގެ ސަލާމަތީ ކަންކަން ބަލަހައްޓަންވާނީ ދައުލަތުގެ ސަލާމަތީ ޚިދުމަތްތަކުން ކަމަށް ގާނޫނު އަސާސީގެ 105 ވަނަ މާއްދާގެ (ހ)ގައި ބަޔާންކޮށްފައިވާ ކަަމަށެވެ.
އެހެންކަމަށް ވާއިރު، އާދިއްތަ ދުވަހު މަޖިލިސްކުރާގެ ކައިރީގައި މުޒާހަރާކުރަމުން ދިޔަ މުޒާހަރާގެ ބައިވެރިން މަޖިލިސްގޭގެ ވަށާފާރު މައްޗަށް އަރައި، ގޯތި ތެރެއަށް އެކި އެއްޗެހި އުކާފައިވާކަން އީވާ ފާހަގަކުރެއްވިއެވެ، އެހެންކަމުން އެމްއެންޑީއެފާއި ދިވެހި ފުލުހުންގެ ޚިދުމަތުގެ މައްޗަށް ގާނޫނު އަސާސީން މަތިކޮށްފައިވާ މަސްއޫލިއްޔަތުތައް އަދާކޮށްފައިވޭތޯ ބެލުމަށް މަޖިލީހުގެ ސަލާމަތީ ކަންތައްތަކާބެހޭ ކޮމިޓީއަށް މި މައްސަލަ ހުށަހަޅުއްވާކަމަށް އީވާ ވިދާޅުވިއެވެ.
