03 ފެބްރުއަރީ 2024 ވާ ހޮނިހިރު ދުވަހު ބާއްވައި، 20 ވަނަ ރައްޔިތުންގެ މަޖިލީހުގެ އެމްޑީޕީ ޕްރައިމަރީގައި ވޯޓުލުމުގެ ހައްގު ލިބިފައިވާ މެންބަރުންގެ ދާއިމީ ވޯޓަރސް ލިސްޓް އިއުލާންކޮށްފިއެވެ.

ހޮނިހިރު ދުވަހު އެމްޑީޕީން ވަނީ އެ މެންބަރުން ވޯޓުލުމަށް ރަޖިސްޓަރީ ކުރެވިފައިވާ ރަށާއެކު އާއްމުކޮށް އަންގައި އިއުލާންކޮށްފައެވެ.

ކުރިއަށް އޮތް ރައްޔިތުންގެ މަޖިލިސް އިންތިޚާބުގައި އެމްޑީޕީގެ ޓިކެޓްގައި ވާދަކުރާ ފަރާތްތައް ހޮވުމަށް ބާއްވާ އެ ޕާޓީގެ ޕްރައިމަރީގައި ވޯޓްލުމުގެ ހައްގު ލިބިފައިވާ މީހުންގެ ލިސްޓަށް ގެނެސްފައިވާ ބަދަލުތަކަށް ޝަކުވާ ހުށަހެޅުމުގެ ފުރުސަތު އެމްޑީޕީން ވަނީ މީގެ ކުރިން ދީފައެވެ. އެ ލިސްޓަށް ޝަކުވާ ހުށަހެޅުމަށް ފުރުސަތު ހުޅުވާލީ 24 ޖެނުއަރީގައެވެ. އެ ފުރުސަތު ހަމަވީ މި މަހުގެ 25 ވަނަ ދުވަހުގެ ހަވީރު 16:00އާ ހަމައަށެވެ. ދާއިމީ ލިސްޓު އެކުލަވާފައި ވަނީ ޝަކުވާތަކަށްފަހު ގެންނަންޖެހޭ އިސްލާހުތަކާ އެކުގައެވެ.

އެމްޑީޕީން މަޖިލިސް އިންތިޚާބުގައި ހުރިހާ ދާއިރާއަކަށް ވާދަކުރަން ނިންމާފައިވާކަން އެ ޕާޓީން ވަނީ އިއުލާންކޮށްފައެވެ. އެމްޑީޕީ ޕްރައިމަރީއަށް ހުޅުވާލީ މިދިޔަ މަހުގެ 16ގައެވެ. ޕްރައިމަރީއަށް ހުޅުވާލި މުއްދަތު ހަމަވިއިރު 36 ދާއިރާއެއްގައި އެންމެ ކެންޑިޑޭޓަކު ވާދަކުރުމަށް ހުށަހަޅާފައިވާތީ، އެ ދާއިރާތަކުން ކުރިމަތިލި ކެންޑިޑޭޓަށް ވަނީ ޕާޓީގެ ޓިކެޓް ކަށަވަރުވެފައެވެ. 43 ދާއިރާއެއްގެ ޕްރައިމަރީ ބޭއްވުމަށް ވަނީ ހަމަޖެހިފައެވެ. މަޖިލިސް އިންތިޚާބުގެ ޕްރައިމަރީ އެމްޑީޕީން ބާއްވަން ނިންމާފައިވަނީ އަންނަ މަހުގެ 3 ވަނަ ދުވަހުއެވެ.

ޕްރައިމަރީއަކާނުލައި އެމްޑީޕީގެ މަޖިލިސް ޓިކެޓް އިތުރު 10 ފަރާތަކުން ވަނީ ފަހުން ކަށަވަރުކޮށްފައެވެ.

އެމްޑީޕީން ބުނީ އެ ޕާޓީގެ ފަރާތުން 20 ވަނަ ރައްޔިތުންގެ މަޖިލީހަށް ވާދަކުރަން ބޭނުންވާ ފަރާތްތަކުން ޝައުގުވެރިކަން ފާޅުކުރުމަށް ހުޅުވާލުމުން ޝައުގުވެރިކަން ފާޅުކުރި ފަރާތްތަކުގެ ތެރެއިން، 44 ދާއިރާއަކަށް ޕްރައިމަރީއާނުލައި ޓިކެޓް ވަނީ ކަށަވަރުކޮށްފައެވެ. އެހެންކަމުން އެމްޑީޕީގެ ޕްރައިމަރީގައި 44 ދާއިރާއެއްގެ ޕްރައިމަރީއެއް ނުބާއްވާނެއެވެ. 20 ވަނަ ރައްޔިތުންގެ މަޖިލީހަށް ވާދަކުރަން ބޭނުންވާ ފަރާތްތަކުން ޝައުގުވެރިކަން ފާޅުކުރުމަށް ހުޅުވާލުމުން، ޝައުގުވެރިކަން ފާޅުކުރި ފަރާތްތަކުގެ ތެރެއިން ޕްރައިމަރީ ބާއްވަންޖެހޭ ދާއިރާތަކާއި، އެ ދާއިރާތަކަށް ކުރިމަތިލީ ކެންޑިޑޭޓުންގެ ނަންތައް، ކެންޑިޑޭޓް ނަންބަރާއެކު މިހާރު ވަނީ އާންމުކޮށްފައެވެ.