ކްލޮޕް މަތިން ހަނދާންވާނެ، ނެތުމުން ހަމަޖެހިގެން ނިދާލެވޭނެ: ގާޑިއޯލާ

ވާދަވެރި ލިވަޕޫލްގެ ކޯޗުކަމުން ވަކިވާން ނިންމާފައިވާ ޔާގެން ކްލޮޕް މަތިން ވަރަށް ހަނދާންވާނެ ކަމަށާއި އޭނާ ނެތުމަކީ ހަމަޖެހިގެން ނިދާލަން ލިބޭ ފުރުސަތެއް ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.

އިނގިރޭސި އެފްއޭކަޕުގައި ރޭ ޓޮޓެންހަމް އަތުން މޮޅުވި މެޗަށް ފަހު ވާހަކަ ދައްކަމުން ގާޑިއޯލާ ބުނީ ކްލޮޕް އަކީ ތަފާތު މޮޅު ކޯޗެއް ކަމަށެވެ.

އޭނާ ބުނީ ފަރުދީ ހައިސިއްޔަތުން ކްލޮޕް މާބޮޑަށް ނޭނގުނު ނަމަވެސް އޭނާގެ ކޯޗިން ކެރިއަރުގައި ދިމާވި އެންމެ ބޮޑު ވާދަވެރިއަކީ ވެސް ކްލޮޕް ކަމަށެވެ.

ކްލޮޕް ލިވަޕޫކުން މި ސީޒަނަށް ފަހު ވަކިވާން ނިންމީ އަބަދު މަސައްކަތުގައި ނޫޅެވޭނެ ކަމަށް ބުނެފަ އެވެ. އަދި އޭނާގެ ހަކަތަ ހުސްވެއްޖެ ކަމަށާއި ލިވަޕޫލާ ވާދަވެރި އިނގިރޭސި ޓީމަކަށް ކޯޗުކޮށްނުދޭނެ ކަމަށް ވެސް ބުނުމަށްފަހު އެވެ. އޭނާ ބުނީ މި ވާހަކަ މިދިޔަ ނޮވެމްވަރު މަހު ކުލަބުގެ ވެރިންނާ ހިއްސާކުރި ކަމަށެވެ.

މިވާހަތަކާ ބެހޭ ގޮތުން ސުވާލުކުރުމުން ސްޕޭނުގެ ބާސެލޯނާއަށް ވެސް ކޯޗުކޮށްދިން ގާޑިއޯލާ ބުނީ ކޮންމެ ކޯޗަކަށް ވެސް އެއް ޓީމެއްގައި ގިނަ ދުވަހު ހުންނަން ޖެހުމުން ވަރުބަލިކަމާއި ލޮޑުކަން އިހުސާސްވާނެ ކަމަށެވެ. އޭނާ އަށް ބާސެލޯގައި ލިވަޕޫލްގައި ކްލޮޕްއަށް ދިމާވި ފަދަ ވަރުބަލިކަން އިހުސާސްވި ކަމަށާއި އަބަދު އެއް މަސައްކަތެއްގައި ދެމި ހުރުމަކީ ދަތިކަމެއް ކަމަށެވެ.

ކްލޮޕް ބާސެލޯނާ އަށް ކޯޗުކޮށްދީފާނެތޯ އެހުމުން ގާޑިއޯލާ ބުނީ އެފަދަ ކަމެއް އޭނާ އަށް ނޭނގޭ ކަމަށާއި އެދެނީ ބާސެލޯނާ އަށް ކުރިއެރުން ކަމަށެވެ.