ވާދަވެރި ލިވަޕޫލްގެ ކޯޗުކަމުން ވަކިވާން ނިންމާފައިވާ ޔާގެން ކްލޮޕް މަތިން ވަރަށް ހަނދާންވާނެ ކަމަށާއި އޭނާ ނެތުމަކީ ހަމަޖެހިގެން ނިދާލަން ލިބޭ ފުރުސަތެއް ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފި އެވެ.
އިނގިރޭސި އެފްއޭކަޕުގައި ރޭ ޓޮޓެންހަމް އަތުން މޮޅުވި މެޗަށް ފަހު ވާހަކަ ދައްކަމުން ގާޑިއޯލާ ބުނީ ކްލޮޕް އަކީ ތަފާތު މޮޅު ކޯޗެއް ކަމަށެވެ.
"އޭނާ އަކީ މޮޅު ކޯޗެއް. ވަރަށް ރަނގަޅު ޕާސަނަލިޓީއެއް. އޭނާ ނެތުމުން އަހަރެން އޭނާ މަތިން ހަނދާންވާނެ. އެކަމަކު އޭނާ ނެތުމުން އަހަރެންނަށް ހަމަޖެހިގެން ނިދާލެވޭނެ. ހާއްސަކޮށް ލިވަޕޫލާ ދެކޮޅަށް އަހަރުމެން ކުޅޭ މެޗުގެ ކުރިން. އަހަރެންގެ ކޯޗިންގައި މެންޗެސްޓާ ސިޓީ އާއި ލިވަޕޫލަކީ (އިނގިރޭސިވިލާތުގައި) އެންމެ ބޮޑު ދެ ވާދަވެރިން،"ގާޑިއޯލާ ބުންޏެވެ.
އޭނާ ބުނީ ފަރުދީ ހައިސިއްޔަތުން ކްލޮޕް މާބޮޑަށް ނޭނގުނު ނަމަވެސް އޭނާގެ ކޯޗިން ކެރިއަރުގައި ދިމާވި އެންމެ ބޮޑު ވާދަވެރިއަކީ ވެސް ކްލޮޕް ކަމަށެވެ.
"އިނގިރޭސިވިލާތުގައި އެކަންޏެއްނޫން. އަހަރެން ޖަރުމަނުގައި ހުރިއިރު އޭނާ އަކީ ބޮރޫޝިޔާ ޑޯޓްމުންޑްގެ ކޯޗު. އަހަރެން ހުރީ ބަޔާންގައި. މިހާރު އަހަރެން ސިޓީގައި ހުރި އޭނާ އެހުރީ ލިވަޕޫލްގައި. ވަރަށް ގިނަ ދުވަހު އެއް ލީގެއްގައި ވާދަވެރިކޮށް މަސައްކަތް މި ކުރެވުނީ. އޭނާ އަކީ މޮޅު ކޯޗެއް،"ގާޑިއޯލާ ބުންޏެވެ.
ކްލޮޕް ލިވަޕޫކުން މި ސީޒަނަށް ފަހު ވަކިވާން ނިންމީ އަބަދު މަސައްކަތުގައި ނޫޅެވޭނެ ކަމަށް ބުނެފަ އެވެ. އަދި އޭނާގެ ހަކަތަ ހުސްވެއްޖެ ކަމަށާއި ލިވަޕޫލާ ވާދަވެރި އިނގިރޭސި ޓީމަކަށް ކޯޗުކޮށްނުދޭނެ ކަމަށް ވެސް ބުނުމަށްފަހު އެވެ. އޭނާ ބުނީ މި ވާހަކަ މިދިޔަ ނޮވެމްވަރު މަހު ކުލަބުގެ ވެރިންނާ ހިއްސާކުރި ކަމަށެވެ.
މިވާހަތަކާ ބެހޭ ގޮތުން ސުވާލުކުރުމުން ސްޕޭނުގެ ބާސެލޯނާއަށް ވެސް ކޯޗުކޮށްދިން ގާޑިއޯލާ ބުނީ ކޮންމެ ކޯޗަކަށް ވެސް އެއް ޓީމެއްގައި ގިނަ ދުވަހު ހުންނަން ޖެހުމުން ވަރުބަލިކަމާއި ލޮޑުކަން އިހުސާސްވާނެ ކަމަށެވެ. އޭނާ އަށް ބާސެލޯގައި ލިވަޕޫލްގައި ކްލޮޕްއަށް ދިމާވި ފަދަ ވަރުބަލިކަން އިހުސާސްވި ކަމަށާއި އަބަދު އެއް މަސައްކަތެއްގައި ދެމި ހުރުމަކީ ދަތިކަމެއް ކަމަށެވެ.
ކްލޮޕް ބާސެލޯނާ އަށް ކޯޗުކޮށްދީފާނެތޯ އެހުމުން ގާޑިއޯލާ ބުނީ އެފަދަ ކަމެއް އޭނާ އަށް ނޭނގޭ ކަމަށާއި އެދެނީ ބާސެލޯނާ އަށް ކުރިއެރުން ކަމަށެވެ.
