ރަމަޟާން މަހު މަޖިލިސް އިންތިޚާބު ބާއްވަން ނިންމީ ރައީސް ޑރ.މުއިއްޒު ނުފޫޒު ފޯރުވައިގެން - އިބުރޭ

ރަމަޟާން މަހު މަޖިލިސް އިންތިޚާބު ބާއްވަން ނިންމީ ރައީސް ޑރ. މުހައްމަދު މުއިއްޒު ނުފޫޒު ފޯރުވައިގެން ކަމަށް އެމްޑީޕީގެ ޑެޕިއުޓީ ޗެއަރޕަރސަން އިބްރާހީމް ވަހީދު (އިބުރޭ) ތުހުމަތުކުރައްވައިފިއެވެ.

އޭނާ އެފަދައިން ވިދާޅުވީ ބުދަ ދުވަހުގެރޭ އެމްޑީޕީގެ ހަރުގެ ބައްދަލުވުމުގައި ވާހަކަދައްކަވަމުންނެވެ. އިބްރާހީމް ވަހީދު ވިދާޅުވީ ރައީސް މުއިއްޒު ގިނަ ބަޔަކަށް ވޯޓުލެވޭނެ މަގު ފަހިކުރައްވަން ބޭނުންފުޅުނުވާ ކަމަށެވެ.

Advertisement

އޭނާގެ ވާހަކައިގައި މަޖިލިސް އިންތިޚާބު 2024ގެ ޤައުމީ ލަފާދޭ ކޮމިޓީގެ މަސައްކަތްތަކާއި މަޖިލިސް އިންތިޚާބަށް އިލެކްޝަނުން ވާ ތައްޔާރީތަކަށް އަލިއަޅުވާލެއްވިއެވެ. ނިމިދިޔަ ރިޔާސީ އިންތިޚާބާއި މަޖިލިސް އިންތިޚާބު 2024ގެ ގައުމީ ލަފާދޭ ކޮމިޓީގައި އެމްޑީޕީ ތަމްސީލްކުރައްވަނީ އިބްރާހީމް ވަހީދެވެ. އެހެންކަމަށް ވާއިރު ރިޔާސީ އިންތިޚާބުގައި އިލެކްޝަންސް ކޮމިޝަނުން ގައުމީ ލަފާދޭ ކޮމިޓީގެ ލަފަޔާއި އިރުޝާދަށް ފުރިހަމައަށް އަމަލުކުރި ކަމަށް އޭނާ ވިދާޅުވިއެވެ. އޭރުގެ ސަރުކާރުން އިލެކްޝަންސް ކޮމިޝަނާއި އެ ކޮމިޝަނުގެ މެންބަރުންނަށް އެއްވެސް ނުފޫޒެއް ފޯރުވާފައި ނުވާނެކަމަށް އޭނާ ވިދާޅުވިއެވެ. ރައްޔިތުންގެ މަޖިލީހުގެ އިންތިޚާބާއި ގުޅިގެން ބޭއްވި ކޮމިޓީގެ ފުރަތަމަ ބަދައްލުވުމުގައި ބައިވެރިވި ހުރިހާ ފަރާތްތަކުން އެދުނީ ރޯދަ މަހު އިންތިޚާބު ނުބާއްވަން ކަމަށް އޭނާ ވިދާޅުވިއެވެ. ނަމަވެސް އެ ލަފަޔާއި ޚިލާފަށް އަމަލުކުރުމުން އެމްޑީޕީން ވާނީ އެ ބައްދަލުވުންތައް ބޮއިކޮޓްކޮށްފައި ކަމަށް ވެސް އޭނާ ވަނީ ވިދާޅުވެފައެވެ.

އިތުރަށް ވާހަކަދައްކަވަމުން އެމްޑީޕީ އާއި ޑިމޮކްރެޓްސް އެކުގައި މަސައްކަތް ކުރަން ޖެހުނު ސަބަބާއި މެދު އޭނާ ވަނީ ވާހަކަދައްކަވާފައެވެ. އެމްޑީޕީ އާއި ދަ ޑިމޮކްރެޓްސް މަސައްކަތް ކުރަމުން ދަނީ ކޯލިޝަން ހަދައިގެން ނޫން ކަމަށާއި، އެކުގައި މަޖިލިސް އިންތިޚާބަށް ވާދަކުރުމުގެ ވިސްނުމެއް ނެތް ކަމަށް އިބްރާހީމް ވަހީދު ވިދާޅުވިއެވެ. އަދި ވިދާޅުވީ އެމްޑީޕީން ޑިމޮކްރެޓްސްއާ އެކު ކުރާ މަސައްކަތަކީ މިހާރު މި ހިނގާ މަޖިލީހުގެ ތެރެއިން ސަރުކާރު ޖަވާބުދާރީކުރުވުން ކަމަށާއި މި މަސައްކަތުގައި އެއްޕާޓީން އަނެއް ޕާޓީ އަށް އެއްބާރުލުން ދޭނެ ކަމަށް އޭނާ ވިދާޅުވިއެވެ.