ރައީސް މުއިއްޒުގެ ސިޔާސީ ތަޖުރިބާއެއް ނެތް، އެމަނިކުފާނު މިހާރު އަދާކުރައްވަނީ އެކްޓިވިސްޓުންގެ ރޯލް: މެންބަރު ފަލާހު

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސިޔާސީ ތަޖުރިބާއެއް ނެތް ކަމަށާއި، އެމަނިކުފާނު މިހާރު އަދާކުރައްވަނީ އެކްޓިވިސްޓުންގެ ރޯލް ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ފަލާހު ވިދާޅުވީ ކުރިއަށް އޮތް ފަސް އަހަރު ވެރިކަން ކުރެއްވުމަށް ރައްޔިތުން ނުކުމެ، ރައީސް މުއިއްޒުއާއި ގައުމު ހަވާލުކޮށްފައިވާ ކަމަށެވެ. ވެރިކަމުގެ ހުވާ ކުރެއްވި ދުވަހުން ފެށިގެން މިއަދާ ހަމައަށްއައިރު މިހައި ބޮޑަށް އަން ޕޮޕިއުލާވި ވެރިއަކު މިގައުމުން ނުދެކޭ ކަމަށް މެންބަރު ވިދާޅުވިއެވެ.

މެންބަރު ވިދާޅުވީ ވެރިކަމަށް ދެމަސްވެގެން ގޮސްފައިވާއިރު، ރާއްޖޭގެ އެންމެ ބޮޑު ސިޓީގައި ބޭއްވިގެން ދިޔަ މޭޔަރުގެ އިންތިޚާބުގެ ނަތީޖާއިން އެކަން ސާބިތުވެގެން ގޮސްފައިވާ ކަމަށެވެ.

ރައީސް މުއިއްޒުގެ ސިޔާސީ ހަރަކާތްތަކަށް އިޝާރާތް ކުރައްވައި މެންބަރު ވިދާޅުވީ އެމަނިކުފާނު ފުރަތަމަ ފެނިގެންދިޔައީ 2012 ވަނަ އަހަރުގެ ފެބްރުއަރީ މަހުގެ ތެރޭގައި އޭރުގެ ވެރިކަން ވެއްޓިގެން ދިއުމާއެކު ހިންގި ސިޔާސީ ހަރަކާތްތަކުން ކަމަށެވެ. އޭގެފަހުން ހައުސިން މިނިސްޓަރުކަމުގެ މަގާމު 7 އަހަރު ފުރުއްވިކަން މެންބަރު ފާހަގަކުރެއްވިއެވެ. އަދި ވިދާޅުވީ އެމަގާމުގައި ހުންނަވައި ހިންގެވި މަޝްރޫއުތަކުން ވެސް ހީލަތްތެރިކަމާއި މަކަރުވެރިކަން އެކުލެވިގެން މަސައްކަތް ކުރި މަންޒަރު ރައްޔިތުންނަށް ފެނިފައިވާ ކަމަށެވެ.

މެންބަރު ވިދާޅުވީ ހަރުދަނާ ރަނގަޅު ސިޔާސީ ތަޖުރިބާ ހުރި ކަމަށް ބެލެވޭނީ ރައްޔިތުން މަޖިލީހުގައި މަސައްކަތްކޮށް، ޕާޓީއަކަށް ގިނަ ދުވަހު ޚިދުމަތް ކުރުމުން ކަމަށެވެ. މިހާރު ރައީސް އަދާކުރައްވާ ރޯލަކީ އެކްޓިވިސްޓް ރޯލް ކަމަށެވެ. އަދި ސިޔާސީ ކަންކަން ދަސްކުރައްވަން އުޅުއްވަނީ އެލް ބޯޑު ޖައްސަވައިގެން ކަމަށް މެންބަރު ވިދާޅުވިއެވެ.

މީގެ އިތުރުން މެންބަރު ވިދާޅުވީ މިއަދުގެ ރައީސަކީ ގައުމިއްޔަތަށް ވަކާލާތު ކުރައްވާ ބޭފުޅެއް ނަމަވެސް އެކަން އަމަލުން ދައްކަވާ ބޭފުޅެއް ނޫން ކަމަށެވެ.

މެންބަރު ފަލާހު ވިދާޅުވީ މިއަދުގެ ރައީސަކީ ހަސަދަވެރިކަމާއި ކިބިރުވެރިކަމާއި ބޮޑާ ބޭފުޅެއް ކަމަށެވެ.