ޓްރިޕިއާ ދޫނުކުރަން ނިއުކާސަލުން ނިންމައިފި

ނިއުކާސަލް ޔުނައިޓެޑަށް ކުޅެމުން އަންނަ އިންގްލެންޑުގެ ޑިފެންޑަރު، ކިއެރަން ޓްރިޕިއާ ދޫނުކުރަން އެ ކުލަބުން ނިންމައިފި އެވެ.

އުމުރުން 33 އަހަރުގެ ކުޅުންތެރިޔާ ހޯދުމުގެ ޝައުޤުވެރިކަން ގެންގުޅުނު ކުލަބަކީ ޖަރުމަނު ލީގުގެ ޗެމްޕިއަން ބަޔާން މިއުނިކް އެވެ. އެތުލެޓިކޯ މެޑްރިޑު ދޫކޮށް، 2022 ވަނަ އަހަރު ނިއުކާސަލާ ގުޅުނު ޓްރިޕިއާ އެ ކުލަބާއެކު ސޮއިކުރި އެއްބަސްވުމުގެ މުއްދަތު ހަމަވާން އޮތީ އަންނަ ސީޒަނުގަ އެވެ.

އޭނާ ހޯދުމުގެ ޝައުޤުވެރިކަން ފާޅުކޮށް، ބަޔާނުން ވަނީ އެކަމުގެ މަޝްވަރާތައް ވެސް ކުރިއަށް ގެންގޮސްފައި ކަމަށް މީޑިއާތަކުން ވަނީ ރިޕޯޓުކޮށްފަ އެވެ. އެހެން ނަމަވެސް، ފަހު ވަގުތު ނިއުކާސަލުން ނިންމީ، ޓްރިޕިއާ ދޫނުކުރަން ކަމަށް މީޑިއާތަކުން ބުނެ އެވެ. އެގޮތުން، ޓްރިޕިއާ ހޯދުމަށް ބަޔާނުން ހުށަހެޅި 15 މިލިއަން ޔޫރޯގެ ހުށަހެޅުން ބަލައިނުގަންނަން ނިންމައި، އަންގާރަ ދުވަހު ނިއުކާސަލުން އެ ކުލަަބަށް އެންގީ ޓްރިޕިއާ ދޫކުރަން ބޭނުންނުވާ ވާހަކަ ކަމަށް ވެސް ރިޕޯޓުތައް ބުނެ އެވެ. އަދި އޭނާ އަކީ އެ ކުލަބުން ވިއްކާލަން ވެސް ބޭނުން ނުވާ ކުޅުންތެރިޔެއްކަން އެންގި ކަމަށް މީޑިއާތަކުން ވަނީ ބުނެފަ އެވެ.

ބަޔާނުން އަންނަނީ އެ ޓީމުގެ ޑިފެންސް ވަރުގަދަ ކުރުމަށް ކުޅުންތެރިން ހޯދުމުގެ މަސައްކަތް ކުރަމުންނެވެ. އެގޮތުން އެ ޓީމުގެ ކޯޗު ތޯމަސް ޓުޗެލްގެ އެދުމުގެ މަތިން ބަޔާނުން ވަނީ، ޓޮޓެންހަމަށް ކުޅެމުން އައި އެރިކް ޑަޔާ ވެސް އެ ކުލަބަށް ގެނެސްފަ އެވެ. ޓުޗެލް ޤަބޫލު ކުރާ ގޮތުގައި މިވަގުތު ބަޔާނުން އެންމެ އިސްކަމެއް ދޭން ޖެހެނީ ޓީމުގެ ޑިފެންސް ވަރުގަދަ ކުރުމަށެވެ.

ޓްރިޕިއާ ވަނީ މިހާތަނަށް ނިއުކާސަލަށް ކުޅެދިން 81 މެޗުން ތިން ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ކަރަބޯ ކަޕްގެ ފައިނަލެއްގައި ވެސް ކުޅެފަ އެވެ. ޓްރިޕިއާ އަކީ މިވަގުތު ނިއުކާސަލްގެ ކެޕްޓަންކަން ވެސް ކުރަމުން އަންނަ ކުޅުންތެރިޔާ އެވެ.