ޗައިނާގެ ދިރާސާ އުޅަނދުގެ ޙަރަކާތްތައް ގާތުން ބަލާނަން: އިންޑިއާ

ކަނޑު ދިރާސާކުރާ ޗައިނާގެ އުޅަނދެއް ރާއްޖެ އައުމުގެ މަގުމަތީގައިވާއިރު، އެ އުޅަނދުގެ ޙަރަކާތްތައް ގާތުން ބަލާނެކަމަށް އަވައްޓެރި އިންޑިޔާގެ ނޭވީ ޗީފް އެޑްމިރަލް އާރް ހަރީ ކުމާރް ވިދާޅުވެއްޖެއެވެ.

ނޫސްވެރިއަކު ދެންނެވި ސުވާލަކަށް ޖަވާބުދެއްވަމުން އިންޑިޔާގެ ނޫހަކަށް ދެއްވި އިންޓަވިއުއްގައި އެޑްމިރަލް ހަރީ ކުމާރް ވިދާޅުވީ، ޗައިނާއިން މީގެ ކުރިން ސްރިލަންކާއާއި އަވައްޓެރި ބައެއް އެހެނިހެން ޤައުމުތަކުގައި ވެސް ދިރާސާ މަސައްކަތްތަކެއް ކޮށްފައިވާ ކަމަށެވެ.

ޗައިނާގެ އުޅަނދު އަންނަނީ ރާއްޖޭގައި ކަނޑުގެ ދިރާސާތަކެއް ހެދުމަށް ކަމަށް ވެދާނެ ކަމަށާއި، އެކަންކަން އިންޑިއާއިން ވަރަށް ގާތުން ބަލަމުންދާނެކަމަށް އޭނާ ވިދާޅުވިއެވެ.

ދިވެހި ސަރުކާރުން ނެރުނު ބަޔާނެއްގައި ބުނެފައިވަނީ ދިރާސާކުރާ ޗައިނާގެ އުޅަނދެއް ރާއްޖެ އަންނަނީ ކުރޫއިން ބަދަލުކުރުމާއި ސްޓޮކް އައުކުރުމަށް ކަމަށެވެ. އަދި އެކަން ކުރަނީ އެ ބޯޓު ރާއްޖޭގައި ބަނދަރުކުރުމުގެ ހުއްދައަކަށް ޗައިނާގެ ސަރުކާރުން ރާއްޖޭގައި ރަސްމީކޮށް އެދިގެން ކަމަށެވެ.

ނަމަވެސް އެ ބޯޓުން ރާއްޖޭގެ ސަރަހައްދުގައި ދިރާސާގެ އެއްވެސް މަސައްކަތެއް ކުރިއަށް ނުގެންދާނެ ކަމަށް އެ ބަޔާނުގައި ބުންޏެވެ.

ފޮރިން މިނިސްޓްރީގެ ބަޔާނުގައި އިތުރަށް ބުނެފައިވަނީ، ރާއްޖެއާ ގާތް ގުޅުމެއް އޮންނަ ގައުމުތަކުގެ މިލިޓަރީ އަދި ސިވިލް އުޅަނދުފަހަރު ރާއްޖޭގައި ބަނދަރުކޮށް، ސުލްހަވެރި ހަރަކާތްތެރިކަން ހިންގުމުގެ ހުއްދަ ދޭ ކަމަށެވެ. އަދި އެކަމުގެ ސަބަބުން ގައުމުތަކާ ރާއްޖެއާ ދެމެދު އޮންނަ ގުޅުން އިތުރަށް ވަރުގަދަވެ، ބަދަހިވެގެން ދާކަމަށް ފޮރިން މިނިސްޓްރީގެ ބަޔާނުގައި ބުނެފައިވެއެވެ.

މިހާތަނަށް ތިލަވެފައިވާ މައުލޫމާތުތަކަށް ބަލާއިރު، ޗައިނާގެ ކަނޑުގެ ރިސަރޗް ކުރާ އުޅަނދެއް ޖެނުއަރީ 30ގައި މާލެ އައުމަށް އަންނަނީ ދަތުރުކުރަމުންނެވެ. އެގޮތުން ކަނޑު އުޅަނދުތައް ޓްރެކްކުރާ ސައިޓުތަކުންއެނގޭގޮތުގައި ރާއްޖެ އަންނަނީ ޗައިނާ ސަރުކާރުގެ އުޅަނދެއް ކަމަށްވާ "XIANG YANG HONG 03" އެވެ.

ކަނޑުގެ ސަރަހައްދުގައި ހަަރަކާތްތެރިވުމާ ދެކޮޅަށް އިންޑިއާއިން އަންނަނީ ވަރަށް ބޮޑަށް ވާހަކަދައްކަމުންނެވެ. އިންޑިއާގެ އިތުރުން، ޗައިނާގެ ރިސަރޗް އުޅަނދުތައް ސްރީލަންކާ ސަރަހައްދަށް ވަނުން އެގައުމުގެ ސަރުކާރުންވެސް ވަނީ އެއް އަހަރު ދުވަހުގެ މުއްދަތަށް މަނާކޮށްފައެވެ.