އިންޑިޔާ-ރާއްޖޭގެ ސިފައިން އެކުގައި މަސައްކަތްކުރާތާ ޒަމާންތަކެއް ވެއްޖެ: އިންޑިޔާ ނޭވީ ޗީފް
24 ޖެނުއަރީ 2024 | ބުދަ 02:00އޭގެ ތެރޭގައި ދިވެހި ސިފައިންގެ ގާބިލުކަން އިތުރުކުރުމަށް ވެސް ގިނަ މަސައްކަތްތަކެއް އެކުގައި ކުރެވޭ ކަމަށް ވިދާޅުވި
އިންޑިޔާ އަދި ރާއްޖޭގެ ސިފައިން
ރާއްޖޭގެ ސިފައިންނާ އެކުގައި އިންޑިޔާގެ ސިފައިން މަސައްކަތްކުރަމުންދާތާ އެތައް އަހަރުތަކެއް ވެއްޖެކަމަށާއި، އެ މަސައްކަތަކީ މިފަހުން ފެށުނު މަސައްކަތެއް ނޫން ކަމަށް އިންޑިޔާގެ ނޭވީ ޝީފް އެޑްމިރަލް އާރް ހަރީ ކުމާރް ވިދާޅުވެއްޖެއެވެ.
ރާއްޖެ އާއި އިންޑިޔާގެ ދެމެދުގައި ޖެހިފައި އޮތް އިންޑިޔާ ސިފައިންގެ މައްސަލައާ ގުޅިގެން ނޫސްވެރިއަކު ކުރި ސުވާލަކަށް ޖަވާބުދެއްވަމުން އިންޑިޔާގެ ނޫހަކަށް ދެއްވި އިންޓަވިއުއްގައި އެޑްމިރަލް ހަރީ ކުމާރް ވިދާޅުވީ، ރާއްޖެއާއި އިންޑިޔާގެ ސިފައިންނަކީ ޒަމާނުއްސުރެ އެކުގައި މަސައްކަތް ކުރަމުން އަންނަ ބައެއް ކަމަށެވެ.
އެގޮތުން އޭގެ މިސާލުތައް ފާހަގަ ކުރައްވަމުން އެޑްމިރަލް ވިދާޅުވީ ރާއްޖެއާ އެކީގައި އިންޑިޔާގެ ސިފައިން އެތަކެއް ތަމްރީނުތަކެއް ފުރިހަމަކުރާ ކަމަށާއި، އޭގެ ތެރޭގައި ދިވެހި ސިފައިންގެ ގާބިލުކަން އިތުރުކުރުމަށް ވެސް ގިނަ މަސައްކަތްތަކެއް އެކުގައި ކުރެވޭ ކަމަށެވެ.
މީގެ އިތުރުން ޑޯނިއާ ދުއްވުމުގައި އެހީވުމާއި، ދެގައުމުގެ ކަނޑުގެ ސިފައިން ނުވަތަ ނޭވީ ގުޅިގެން ކުރެވޭ މަސައްކަތްތައް ފާހަގަ ކުރައްވަމުން އެޑްމިރަލް ވިދާޅުވީ މިހާރު ވެސް ރާއްޖޭގެ އޮފިސަރުންތަކެއް އިންޑިޔާގެ ޓްރެއިނިން ސެންޓަރުތަކުގައި ޓްރެއިނިން ހޯދުމުގެ މަސައްކަތްތައް ކުރަމުންދާ ކަމަށެވެ.
އެޑްމިރަލް ވިދާޅުވީ އެ ހުރިހާ ކަމަކާއެކު ވެސް، ދެ ގައުމުގެ ސަރުކާރުން ނިންމާ ނިންމުންތަކަށް އިންޑިޔާއިން އިޙްތިރާމުކުރާނެ ކަމަށެވެ.
އިންޑިޔާ ސިފައިން ރާއްޖެއިން ފޮނުވާލުމާ ގުޅޭ ވާހަކަތައް އެންމެ ގަދަޔަށް ފެށުނީ، މިހާރުގެ ރައީސް ޑރ، މުޙައްމަދު މުއިއްޒު އަދި ކުރީގެ ރައީސް އަބްދުﷲ ޔާމީން އިސްވެ ހުންނަވައި ފެއްޓެވި "އިންޑިޔާ އައުޓް" ހަރަކާތުގެ ތެރެއިންނެވެ. މި ހަރަކާތުގެ ތެރެއިން ކެމްޕޭނުގެ ތެރޭގައި ރައީސް މުއިއްޒު ވިދާޅުވަމުން ގެންދެވީ، ހަތިޔާރާއެކު ރާއްޖޭގައި އެތައް ހާސް ސިފައިންނެއް އެބަ ތިބި ކަމަށެވެ. އެހެން ނަމަވެސް ވެރިކަމަށް ހޮވެވަޑައިގެން، ބެއްލެވި ބެއްލެވުމުން ރާއްޖޭގައި ތިބީ 88 ސިފައިން ކަމަށް އެންމެ ފަހުން ސަރުކާރުން ވަނީ ހާމަކޮށްފައެވެ.
އެގޮތުން ސަރުކާރުން ފުރަތަމަ ހާމަކުރި ގޮތުގައި ރާއްޖޭގައި ތިބީ 77 ސިފައިންނެވެ. އޭގެ ފަހުން 89 ސިފައިން ތިބި ކަމަށް ބުނިއިރު، އެންމެ ފަހުން ހާމަކުރީ ރާއްޖޭގައި ތިބީ 88 ސިފައިން ކަމަށެވެ.
