ސްޕެނިޝް ލީގުގައި ގްރަނަޑާއާ ދެކޮޅަށް ކުޅުނު މެޗުން އެތުލެޓިކޯ މެޑްރިޑު މޮޅުވެއްޖެ އެވެ.

ލީގުގައި ހޯމަ ދުވަހުގެ ރޭ ގްރަނަޑާގެ ދަނޑުގައި ކުޅުނު މެޗު އެތުލެޓިކޯ އިން ކާމިޔާބު ކުރީ 1-0 އިންނެވެ. އެތުލެޓިކޯ އިން މި ސީޒަނުގައި އަމާޒު ހިފާފައި ވަނީ ލީގުގެ ގަދަ ހަތަރެއްގެ ތެރޭގައި ހިފަހައްޓާލުމަށެވެ. މެޗުގައި އެތުލެޓިކޯ އިން ލަނޑު ޖެހީ ދެ ވަނަ ހާފުގަ އެވެ. ފުރަތަމަ ހާފުގައި އެ ޓީމަށް ވަނީ ލަނޑު ޖަހާނެ ފުރުސަތު ލިބި ބޭކާރުވެފަ އެވެ.

މެޗުގެ ފުރަތަމަ ހާފުގައި އެތުލެޓިކޯ އަށް ކުޅެމުން އަންނަ ފްރާންސްގެ އެންޓޮއިން ގްރީޒްމަނަށް ވަނީ ލަނޑު ޖަހާނެ ފުރުސަތު ލިބިފަ އެވެ. އޭނާގެ އިތުރުން އަލްވާރޯ މޮރާޓާ އަށް ވެސް ފުރުސަތު ލިބުނެވެ. މެޗުން އެތުލެޓިކޯ މޮޅުވީ، ދެ ވަނަ ހާފު ފަށައިގެން ނުވަ ވަނަ މިނެޓުގައި މޮރާޓާ ޖެހި ލަނޑުންނެވެ. އޭނާ އެ ލަނޑު ޖެހީ ގްރީޒްމަން ތަނަވަސްކޮށްދިން ފުރުސަތެއްގަ އެވެ.

މޮޅާއެކު މިވަގުތު އެތުލެޓިކޯ އޮތީ ވެސް ހަތަރު ވަނައިގަ އެވެ. އެއީ މިހާތަނަށް ކުޅުނު 20 މެޗުން 41 ޕޮއިންޓު ހޯދައިގެންނެވެ. އެތުލެޓިކޯ އަށް ވުރެ އެއް މެޗު އިތުރަށް ކުޅެގެން، ފަސް ވަނައިގައި އޮތް އެތުލެޓިކް ކުލަބަށް ވެސް ލިބެނީ 41 ޕޮއިންޓެވެ. ނަމަވެސް، އެތުލެޓިކޯ ކުރި ހޯދަނީ ލަނޑުންނެވެ. އެތުލެޓިކޯއާ، ތިން ވަނައިގައި އޮތް ބާސެލޯނާއާ ދެމެދު އޮތީ ތިން ޕޮއިންޓުގެ ފަރަގެކެވެ.