ސަރުކާރުން ކުރާ ކަންކަން ކިޔައިދިނުމާއި، ރައްޔިތުން ކުރަންހުރި ސުވާލުތަކަށް ވަޒީރުން ސީދާ ޕަބްލިކް ފޯރަމެއްގައި ޖަވާބު ދިނުމަށް ފުރުޞަތު ދިނުމަށް އަންނަ ހަފްތާގެ ތެރޭގައި ޕަބްލިކް ފޯރަމެއް ބާއްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ ސަރުކާރުން ކުރާ މަސައްކަތްތައް، ރައްޔިތުންނަށް، ގާތުން އޮޅުންފިލުވައިދިނުމަކީ، ގާތުން ޚިދުމަތް ދިނުމުގައި މުހިންމު ކަމެއް ކަމަށާއި، ދެ މަހުން އެއްމަހު، ވަޒީރުން ރައްޔިތުންނަށް، ސަރުކާރުން ކުރާ ކަންކަން ކިޔައިދިނުމާއި، ރައްޔިތުން ކުރަންހުރި ސުވާލުތަކަށް ވަޒީރުން ސީދާ ޕަބްލިކް ފޯރަމެއްގައި ޖަވާބު ދިނުމަށް ފުރުޞަތު ދޭނެ ކަމަށެވެ.
އޭގެ ފުރަތަމަ ފޯރަމް، މި އަންނަ ހަފްތާގެ ތެރޭގައި އޮންނާނެ ކަމަށް ރައީސް ވިދާޅުވިއެވެ. އެއީ ޕަބްލިކް ފޯރަމެއް ކަމަށާއި، އެ ފޯރަމްގައި ބޭނުން ސުވާލެއް، އެ ފޯރަމްގައި އެ ވަގުތު އެ ބައިވެރިވާ ވަޒީރުންގެ ދާއިރާތަކުން ކުރަން ފުރުޞަތު ލިބޭނެކަމަށް ރައީސް ވިދާޅުވިއެވެ.
ދެން އަނެއްކާ ދެ މަސް ފަހުން އަނެއް ބެޗް އޮފް ކެބިނެޓް މެންބަރސް ވަޑައިގަންނަވާނެ. ފަސް ބޭފުޅުން، ފަސް ބޭފުޅުން ގޮތަށް، އަޅުގަނޑުމެން މި ދެންނެވި، ދެ މަހުން އެއްމަހު އޮންނަ ޕަބްލިކް ފޯރަމް ބާއްވާނަން. ރައްޔިތުން ކުރަންހުރި ހުރިހާ ސުވާލެއް، ލިބޭ ދެ ގަޑިއިރުގެ ތެރޭގައި ކުރެވޭނެ. ހަމަ އެގޮތަށް، ތިން މަހުން އެއްމަހު އަޅުގަނޑުވެސް ސީދާ ރައްޔިތުންނަށް ހަމަ އެފަދަ ފުރުޞަތު ދޭނަން. ޕަބްލިކް ފޯރަމެއް، މިފަދަ ދަރުބާރެއް ބާއްވައި، ރައްޔިތުން ކުރަން ބޭނުންވާ ސުވާލުތަކެއް ކުރުމަށް ފުރުޞަތު ދޭނަން. ތިން މަހުން އެއްމަހު. އޭގެ ފުރަތަމަ ފޯރަމް، މި އަންނަ މަހު އޮންނާނެ.ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރައީސް ވިދާޅުވީ، ރައްޔިތުންނާ ގާތުން އިރާދަކުރެއްވިއްޔާ ސަރުކާރުން މަސައްކަތް ކުރަމުންދާނެ ކަމަށެވެ. އަދި ޖަވާބު ނުދެވޭނެ ސުވާލެއް ނޯންނާނެ ކަމަށެވެ. ރައީސް ވިދާޅުވީ ސަރުކާރުން ކުރަނީ ރައްޔިތުން ހަވާލުކުރި މަސައްކަތް ކަމަށާއި، ޤާނޫނުއަސާސީގައި އޮތް މަސައްކަތް ކަމަށެވެ. އަދި ޖަވާބު ނުދެވޭނެ ކަމެއް ނޯންނާނެ ކަމަށާއި، ފޮރުވަންޖެހޭނެ ކަމެއް ނޯންނާނެ ކަމަށެވެ.
އަޅުގަނޑުމެން ކުރަނީ، ރައްޔިތުން ހަވާލުކުރި މަސައްކަތް. ޤާނޫނުއަސާސީގައި އޮތް މަސައްކަތް. އެއަކުއެއް ނޯންނާނެ ޖަވާބު ނުދެވޭނެ ކަމެއް. ފޮރުވަންޖެހޭނެ ކަމެއް. ނޭނގޭނެ ކަމެއް. ޒިންމާ ނުނެގޭނެ ކަމެއް. އެހެންވީމާ، އިރާދަކުރެއްވިއްޔާ އެގޮތަށް އެކަން ކުރިއަށް ގެންދާނަން.ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ރައީސް ވިދާޅުވީ ހުރިހާ ރަށެއްގެ ރައްޔިތުންނާ ބައްދަލުކުރައްވަން ނިންމެވި ކަމަށާއި، އިރާދަކުރެއްވިއްޔާ، އެ ދަތުރުތައް މި އަންނަ ހަފްތާގައި ފައްޓަވާނެ ކަމަށެވެ. އަދި ވަގުތު ލިބޭވަރަކުން ވަރަށް އަވަހަށް ހުރިހާ ރަށެއްގެ ރައްޔިތުންނާ ބައްދަލުކޮށް ނިންމަވާނެ ކަމަށެވެ. އަދި އެކަން ތަކުރާރުކޮށް، އިރާދަކުރެއްވިއްޔާ ވަގުތުވީވަރަކުން ކުރިއަށް ގެންދާނެ ކަމަށާއި، މާލޭގައިވެސް ވީވަރަކުން މާލޭގެ ރައްޔިތުންނާވެސް ބައްދަލުކުރުމުގެ މަސައްކަތް ކުރިއަށް ގެންދަވާނެ ކަމަށް ރައީސް ވިދާޅުވިއެވެ.
