މާލޭ ސިޓީގެ މޭޔަރުކަމުގެ މުޅި ދައުރު އަދާކުރައްވާނީ ވަރަށް ލޯބިވާ މީހުންތަކެއް ބިނާކުރުމުގެ އަސާސްގެ މަތީގައި ކަމަށް މާލެ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވެއްޖެއެވެ.
އާދަމް އާޒިމް އެފަދައިން ވިދާޅުވީ އެމަނިކުފާނު ހުވާކުރުމުގެ ރަސްމިއްޔާތުގައި ވާހަކަދައްކަވަމުންނެވެ. އެގޮތުން މޭޔަރުކަމުގައި އެންމެ ބޮޑު އިސްކަމެއް ދެއްވާނީ ލޮތްބާއި އޯގާތެރިކަމުގެ މުޖުތަމައެއް ބިނާކުރުމަށް ކަމަށް އާޒިމް ވިދާޅުވިއެވެ. އަދި ކަންކަން ރަނގަޅުކޮށް އާރާސްތުކުރެވޭނީ ރަނގަޅު ބިންގަލެއްގެ މަތީގައިކަން އާޒިމް ފާހަގަކުރެއްވިއެވެ.
މި ރަސްމިއްޔާތުގައި ވާހަކަދައްކަވަމުން މޭޔަރު އާޒިމް އިތުރަށް ވިދާޅުވީ ޑިމޮކްރެޓިކް ބެސްޓް ޕްރެކްޓިސް އާއި އެއްގޮތަށް ހިންގާ ކޮންމެ ޤައުމެއް ކުރިއެރުމުގައި ވެސް ލޯކަލް ކައުންސިލްގެ ނިޒާމް ވަރަށް މުހިންމު ދައުރެއް އަދާކުރާ ކަމަށެވެ. އާޒިމް ވަނީ މާލެ އަށް ދިމާވެފައިވާ މައްސަލަތަކަށް ހައްލު ހޯދައިދެއްވުމަށް މަސައްކަތްކުރައްވާނެ ކަމަށާއި މީހުން ދިރިއުޅޭ ސަރަހައްދުތަކުން ގަރާޖްތައް ދުރަށް ގެންދިއުމާއި، ވިލިމާލެ އާއި ހުޅުމާލެ ފަދަ ދާއިރާތަކަށް ދިމާވެފައިވާ މައްސަލަތަކަށް ހައްލު ހޯއްދަވާ ދެއްްވާނެ ކަމަށް ވިދާޅުވެފައެވެ.
ޑިމޮކްރަސީއެއްގައި ބާރުތައް ދެމި އޮންނަނީ ރައްޔިތުންގެ ކިބައިގައި ކަމަށް ފާހަގަކުރައްވާ އާޒިމް ވަނީ، ލާމަރުކަޒީ ނިޒާމުގެ ދަށުން ކަންކަން ކުރުމަކީ މުނިސިޕަލް ޚިދުމަތްތައް ލިބިގަތުމުގައި ރައްޔިތުންނަށް ލިބުނު ފަސޭހަކަމެއް ކަމަށް ވިދާޅުވެފައެވެ. އަދި ކައުންސިލްތައް މެދުވެރިކޮށް އާއްމުންނަށް ލިބޭ ޚިދުމަތްތައް އިތުރުކުރުމަށް ވޭތުވެދިޔަ ސަރުކާރުތަކުން މަސައްކަތް ކޮށްފައިވާ ކަމަށާއި ލާމަރުކަޒީ ނިޒާމް ހަރުދަނާ ވެފައި ވަނީ ސަރުކާރުތަކުން ކުރި އިޚުލާސްތެރި މަސައްކަތާއި ނިޔަތުގެ ސަބަބުން ކަމަށް މޭޔަރު އާޒިމް ވިދާޅުވިއެވެ.
ލާމަރުކަޒީ ނިޒާމް ފެށިގެން އައި އިރު ލިބެން ނެތް އެތައް ކަމެއް މިހާރު ރަށްރަށުން ލިބޭނެ ގޮތް ހަމަޖައްސާދީފައިވާ ކަން ވެސް މޭޔަރު ފާހަގަކުރެއްވިއެވެ. ލާމަރުކަޒީ ނިޒާމަކީ އެމްޑީޕީގެ އިސްނެގުމާއެކު ގެނައި ނިޒާމެއް ކަމަށް ވެސް އާޒިމް ވިދާޅުވިއެވެ.
