އުތުރު ތިލަފަޅުގައި ކުރިއަށްގެންދަން ނިންމާފައިވާ އެގްރިކަލްޗަރ މަޝްރޫއު ފުށިދިއްގަރު ފަޅަށް ބަދަލުކޮށްދިނުމަށް، އިންތިޚާބީ މޭޔަރު ގޮވާލައްވައިފި
21 ޖެނުއަރީ 2024 | އާދީއްތަ 11:35ތަރައްގީގެ މަޝްރޫއުތަކާ ދެކޮޅު ނުހައްދަވާ ކަމަށް ވިދާޅުވި
އިންތިޚާބީ މޭޔަރު، އާދަމް އާޒިމް
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އުތުރުތިލަ ފަޅުގައި ކުރިއަށް ގެންދަން ނިންމާފައިވާ އެގްރިކަލްޗަރ ބޮޑު މަޝްރޫއު ފުށިދިއްގަރު ފަޅަށް ބަދަލުކޮށްދިނުމަށް، އިންތިޚާބީ މޭޔަރ އާދަމް އާޒިމް ގޮވާލައްވައިފިއެވެ.
ބިންވެރިންގެ ސައްލާގެ ނަމުގައި ކުރިއަށް ގެންދިޔަ ސައްލާގައި އާޒިމް ވިދާޅުވީ، މާލެ ރައްޔިތުން ދިރިއުޅުމަށް ގެންދަންޖެހޭނީ ބްރިޖުން ދަތުރުކުރެވޭ ސަރަހައްދުތަކަށް ކަމަށެވެ. ކަނޑުދަތުރުކޮށްފައި އެހެން ދިމާއަކަށް ދާންޖެހުމުން އެކަމުގެ ދަތިކަން ކުރިމަތިވާނެ ކަމަށް އާޒިމް ވިދާޅުވިއެވެ. ވިލިމާލެއަށް އިޝާރާތް ކުރައްވައި އާޒިމް ވިދާޅުވީ، ކަނޑު ގަދަ ދުވަސްވަރުތަކުގައި ވިލިމާލެއަށް ކުރާ ފެރީގެ ދަތުރުތައް ވެސް ކެންސަލް ކުރަންޖެހޭ ކަމަށެވެ.
އާޒިމް ވިދާޅުވީ ތަރައްގީގެ މަޝްރޫއުތަކާ ދެކޮޅު ނުހައްދަވާ ކަމަށާއި، އެއްބާރުލުން ދެއްވާނެ ކަމަށެވެ.
ރާއްޖޭގައި ހެއްދޭ ހުރިހާ ބާވަތެއް އުތުރުތިލަ ފަޅުގައި ހައްދަން ސަރުކާރުން މަޝްވަރާތައް ފަށާފައިވާތީ އެކަމަށް އިޝާރާތް ކުރައްވައި އާޒިމް ވިދާޅުވީ، އެ މަޝްރޫއު ފުށިގިއްގަރު ފަޅަށް ބަދަލުކުރަންޖެހޭ ކަމަށެވެ. އަދި އުތުރު ތިލަފަޅުގައި މީހުންނަށް އާބާދުވެވޭ ގޮތަށް އެތަން ތަރައްގީ ކުރަންޖެހޭ ކަމަށާއި، މާލޭގައި 20 އަހަރަށްވުރެ ގިނަ ދުވަހު ދިރިއުޅުނު މީހުންނާއި، ދަފްތަރުގައި ތިބި މީހުން އެތަނަށް ދާން ބޭނުންވާ ކަމަށް އާޒިމް ވިދާޅުވިއެވެ.
ރައީސް މުއިއްޒު ޗައިނާއަށް ކުރެއްވި ރަސްމީ ދަތުރުފުޅުގައި އެގްރިކަލްޗަރ ދާއިރާއިން ފުޑް ސެކިއުރިޓީ ގާއިމުކުރުމާއި އަދި އެގްރިކަލްޗަރ އިންޑަސްޓްރީ ފުޅާކޮށް ތަރައްގީ ކުރުމާ ގުޅޭގޮތުން ޗައިނާއާއެކު އެއްބަސްވުންތަކެއްގައި ވަނީ ސޮއިކުރައްވާފައެވެ.
އުތުރު ތިލަފަޅުގައި ރާއްޖޭގެ ރައްޔިތުންނަށް ވާވަރަށް ރާއްޖޭގައި އުފެއްދޭ ހުރިހާ ބާވަތްތަކެއް އުފެއްދޭވަރުގެ އެގްރިކަލްޗަރ އެސްޓެބްލިޝްމަންޓެއް ގާއިމުކުރުމަށް ވަނީ މަޝްވަރާކޮށްފައެވެ. އެގޮތުން އެތަނުގައި ދެ ލައްކަ ރައްޔިތުންނަށް ބޭނުންވާ ވަރަށް ތަކެތި އުފެއްދޭނެ ކަމަށް ސަރުކާރުން ބުނެއެވެ.
މި މަޝްރޫއުގެ އިތުރު ތަފްސީލެއް ސަރުކާރުން ހާމަކޮށްފައެއް ނުވެއެވެ. ނަމަވެސް ރައީސް މުއިއްޒު ވިދާޅުވެފައިވަނީ މި ދައުރުގައި އުތުރު ތިލަފަޅުގައި ބަގީޗާތަކުގެ ހާރެއް އަތުރުއްވާލައްވާނެ ކަމަށެވެ.
