ޑީ ރޮސީ އިރުޝާދު ދިން ފުރަތަމަ މެޗުން ރޯމާ އަށް މޮޅެއް

ރޯމާގެ ކޯޗުކަމާ ހަވާލުވި އެ ޓީމުގެ ކުރީގެ ކުޅުންތެރިޔާ، ޑެނިއެލް ޑީ ރޮސީ އިރުޝާދު ދިން ފުރަތަމަ މެޗުން ރޯމާ މޮޅުވެއްޖެ އެވެ.

ރޯމާގެ ކޯޗުކަމަށް ޑީ ރޮސީ ހަމަޖެއްސީ ކުރިން އެ މަޤާމުގައި ހުރި ޕޯޗުގަލްގެ ހޯސޭ މޮރީނިއޯ ވަކިކުރުމަށްފަހު އެވެ. އެއީ ރޯމާގެ ނަތީޖާތައް ދަށްވެފައިވާތީ އެވެ. ޑީ ރޮސީގެ އިރުޝާދުގެ ދަށުން ރޯމާ ކުޅުނު ފުރަތަމަ މެޗުގައި ނުކުތީ ވެރޯނާއާ ދެކޮޅަށެވެ.

ރޯމާގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ރޯމާ އިން ވަނީ ދެ ލަނޑު ޖަހައި ލީޑު ނަގައިފަ އެވެ. ވެރޯނާގެ ހަމައެކަނި ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން 19 ވަނަ މިނެޓުގައި ރޯމާ އަށް ލީޑު ނަގައިދިނީ އެ ޓީމުގައި މޮޅަށް ކުޅެމުން އަންނަ ބެލްޖިއަމްގެ ރޮމެލޯ ލުކާކޫ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ސްޓެފަން އެލް ޝާރަވީ އެވެ. އޭގެ ފަހުން، ރޯމާގެ ދެ ވަނަ ލަނޑު 25 ވަނަ މިނެޓުގައި ޖެހީ ލޮރެންޒޯ ޕެލެގްރިނީ އެވެ. އޭނާ ލަނޑު ޖަހަން ވެސް ފުރުސަތު ތަނަވަސްކޮށްދިނީ ސްޓެފަން އެލް ޝާރަވީ އެވެ. މެޗުގައި ވެރޯނާގެ ހަމައެކަނި ލަނޑު، 76 ވަނަ މިނެޓުގައި ޖެހީ މިކޭލް ފޮލޮރުންޝޯ އެވެ. އޭގެ ކުރިން ވެސް ވެރޯނާ އިން ލަނޑެއް ޖެހި ނަމަވެސް، ވީއޭއާރުން ވަނީ އެ ލަނޑު ބަލައި ނުގަންނަން ނިންމައިފަ އެވެ.

މޮޅާއެކު ރޯމާ އަށް ވަނައިގައި އޮތީ ލަނޑުގެ ތަފާތުންނެވެ. ކުޅުނު 21 މެޗުން އެ ޓީމަށް ލިބެނީ 32 ޕޮއިންޓެވެ. ރޯމާ އަށް ވުރެ އެއް މެޗު މަދުން ކުޅެގެން ހަތް ވަނައިގައި ބޮލޮގްނާ އަށް ވެސް ލިބެނީ 32 ޕޮއިންޓެވެ.