2021 ވަނަ އަހަރުން ފެށިގެން ކުއްލި ހާލަތުގައި ބޭސްފަރުވާގެ ބޭނުމަށް މީހުން އުފުލުމުގައި ނުވަތަ މެޑިކަލް އިވެކުއޭޝަންގެ 93 ޕަސެންޓް ކޮށްފައި ވަނީ މޯލްޑިވިއަން އެއާލައިނުން ކަމަށް ޑިފެންސް މިނިސްޓަރު މުހައްމަދު ޣައްސާން މައުމޫން ވިދާޅުވެއްޖެއެވެ.

ޑިފެންސް މިނިސްޓަރ އެކްސްގައި މިމޭރުމުން ޕޯސްޓްކުރެއްވީ ގއ. ވިލިނގިލިން ކުއްލި ހާލަތުގައި މިދިޔަ ބުރާސްފަތި ދުވަހު މާލެ ގެނެސް ފަރުވާ ދެނިކޮށް އުމުރުން 13 އަހަރުގެ ކުއްޖަކު ނިޔާވީ، މާލެ ގެނައުން ލަސްވެ، އިތުރު ފަރުވާ ވެސް ލަސްވުމުން ކަމަށް އެ ކުއްޖާގެ އާއިލާ އިން ބުނެފައިވާތީ އެކަމާއި ގުޅިގެން ސަރުކާރަށް ފާޑުކިޔުން އަމާޒުވަމުންދާތީއެވެ. މިނިސްޓަރ ވިދާޅުވީ 2021 ވަނަ އަހަރުން ފެށިގެން ތަފާސްހިސާބަށް ބަލާއިރު މެޑިކަލް އިވެކުއޭޝަންގެ 93 އިންސައްތަ ކޮށްފައިވަނީ މޯލްޑިވިއަން މެދުވެރިކޮށްކަމަށެވެ.

ކުއްޖާ ގެނައުން ލަސްވީ ރައީސް ޑރ މުހައްމަދު މުއިއްޒުގެ ސީދާ ހުއްދަ ނުލިބިގެންކަމަށް ދައްކަމުން އަންނަ ވާހަކަތަކަށް ރައްދުދެއްވާ މިނިސްޓަރ ވިދާޅުވީ މެޑިކަލް އޮޕަރޭޝަންގެ އެސްއޯޕީ ގައި ރައީސުލްޖުމްހޫރިއްޔާ އަށް އިންފޯމް ކުރުމެއް، ހުއްދަ ދެއްވުމެއް ނޯންނަކަމަށާއި އެއީ އެކަމާ ގުޅޭ އިދާރާތަކުން ކޯޑިނޭޓް ކުރެވިގެން ހިނގާ ކަމެއްކަމަށެވެ.

މިނިސްޓަރ މިމޭރުމުން ޕޯސްޓްކުރެއްވި ފަހުން ޓްރާންސްޕޯޓް މިނިސްޓަރ އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ އިމަޖެންސީ ކޭސްއެއް އަތުވެޖެނަމަ، ފްލައިޓް ޝެޑިއުލުން އެންމެ އިސްކަމެއް ދީގެން އިމަރޖެންސީކޮށް އުފުލަންޖެހޭ ފަރާތް އުފުލާގޮތަށް މޯލްޑިވިއަންގެ އުސޫލަށް ބަދަލުގެނެސްފައިވާކަމަށެވެ. އަދި މިސަރުކާރުން އެންމެ އިސްކަމެއް ދީގެން ކުރިޔަށްދާ އެއް ކަމަކީ، އެއަރ އެމްބިއުލާންސްގެ ޚިދުމަތް ތަޢާރަފު ކުރުންކަމަށާއި މި ޚިދުމަތް 1 މާރިޗް 2024 ގައި ފެށިގެން ދާނެކަމަށްވެސް މިނިސްޓަރ ވިދާޅުވިއެވެ.

އޭގެފަހުން މިމައްސަލައިގައި ރައީސް އޮފީހުން ބުނެފައިވަނީ ގއ. ވިލިނގިލިން މާލެ ސިޓީއަށް ގެނައުމުގެ ކަންކަން ހިނގައިދިޔަ ގޮތުގެ ތަފުސީލީ މައުލޫމާތު ދެއްވުމަށާއި، މިފަދަ ހިތާމަވެރި ހާދިސާއެއް ތަކުރާރު ނުވާނޭގޮތަށް، ބަލި މީހުން ކުއްލި ފަރުވާއަށް ގެނެސްދިނުމުގައި ޢަމަލުކުރަމުން އަންނަ ނިޒާމު އިޞްލާޙުކުރުމަށް، ރައީސުލްޖުމްހޫރިއްޔާ، ކަމާ ގުޅުން ހުރި ސަރުކާރުގެ ހުރިހާ އިދާރާތަކަށް އަންގަވާފައިވާކަމަށެވެ.

އުމުރުން 13 އަހަރުގެ މިކުއްޖާ މާލެ ގެންނަން ޑޮކްޓަރުން އަންގާފައިވަނިކޮށް 16 ގަޑިއިރު ފަހުން ކުއްޖާ މާލެ ގެނައި ފަހުން ނިޔާވުމާއި ގުޅިގެން ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފައެވެ. ނިޔާވި ކުއްޖާއަށް ވިލިނގިލިން ފަރުވާ ނުލިބި ލަސްވެގެން ކަމަށް ބުނެ، އެ ރަށު ރައްޔިތުން އެއްވެ، އެ ރަށު ހޮސްޕިޓަލުގެ ނަން ބޯޑު ބަދަލުކޮށް، ހޮސްޕިޓަލް ކުރިމަތީގައި މުޒާހަރާކުރިއެވެ.

އަވަސްފަރުވާ ބޭނުންވާމީހުން މާލެއަށް ގެނައުމަށް އިންޑިއާއިން ރާއްޖެއަށް ހަދިޔާކޮށްފައިވާ އިންޑިއާގެ ހެލިކޮޕްޓަރާއި ޑޯނިއާ މީގެ ކުރިން ބޭނުންކުރެއެވެ. ނަމަވެސް މިސަރުކާރު އައިފަހުން ބަލި މީހާގެ ހާލަތު ގޯސްވިނަމަވެސް އިންޑިއާގެ ހެލިކޮޕްޓަރު ބޭނުންނުކުރާ ކަމުގެ ޝަކުވާ ރައްޔިތުން ދަނީ ކުރަމުންނެވެ.