ވެލެންސިއާގެ ހިންގާ ކޮމެޓީގެ ބައްދަލުވުމަށް އަޒްމީނަށް ދަޢުވަތު ފޮނުވި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިންތިޚާބާ ދިމާކޮށް، މައްސަލަ ބޮޑުވެ ދެ ފަޅިވެފައިވާ ކުލަބު ވެލެންސިއާގެ ހިންގާ ކޮމެޓީގެ ޖަލްސާއަށް، ކުލަބުގެ ޗެއާމަން ޢަބްދުﷲ އަޒްމީނަށް ދަޢުވަތު ފޮނުވާފައި ވާނެކަމަށް، އެ ކުލަބުގެ ޑައިރެކްޓަރ އޮފް ފައިނޭންސް ޙަސަން ވަޙީދު (ދޮނާ) ބުނެފިއެވެ.

ވެލެންސިއާއިން ވަނީ ބުރާސްފަތި ދުވަހުގެ ރޭ، އެފްއޭއެމްގެ ހައުސްގައި އެ ކުލަބުގެ ހިންގާ ކޮމެޓީގެ ޖަލްސާއެއް ބާއްވާފައެވެ. ކުލަބުގެ ނައިބު ރައީސް އިލްމާއު ޙުސައިން އިބްރާހީމް (މައު) ރިޔާސަތު ބެލެހެއްޓެވި ޖަލްސާގައި ބައިވެރިވީ ފަސް މެމްބަރުންނެވެ. އެއީ މައުއާއި ދޮނާގެ އިތުރުން ޢަލީ މަމްދޫޙު، ޔޫސުފް ރަމީޒް އަދި މިޞްބާޙު މުޙައްމަދެވެ. ވެލެންސިއާގެ ހިންގާ ކޮމެޓީގައި ދެން ހިމެނޭ ތިން މެމްބަރުންނަކީ އަޒްމީން އަދި މުޙައްމަދު ރާފިޢުގެ އިތުރުން، އިސްމާޢީލް އާސިފް (ކުޑަހީނާ)އެވެ.

އެ ބައްދަލުވުމުގައި ވަނީ އަޒްމީން އަދި ރާފިޢުގެ އިތުބާރު ނެތްކަމަށް ފާސްކޮށްފައެވެ. މީގެ އިތުރުން ކުލަބުގެ އައު އިންތިޚާބެއް ބޭއްވުނުކަމަށް ބުނެ، ކޮމިޝަނަރ އޮފް ސްޕޯޓްސްއަށް ޞައްޙަ ނޫން ލިޔުންތަކެއް ހުށަހަޅާފައިވާކަމުގެ މަޢުލޫމާތު ލިބޭތީ، އެ މައްސަލަ ބަލައިދިނުމަށް ސްޕޯޓްސް ކައުންސިލަށް ހުށަހެޅުމަށް ވެސް ވަނީ ފާސްކޮށްފައެވެ. ދެން ފާސްކުރީ، އަވަސް މުއްދަތެއްގައި ވެލެންސިއާގެ އިންތިޚާބެއް ބޭއްވުމަށެވެ.

އެކަމާ ގުޅިގެން، ހިންގާ ކޮމެޓީގެ ޖަލްސާއަށް ދަޢުވަަތު ނުފޮނުވާކަމަށް އަޒްމީން ބުނެފައި ވީނަމަވެސް، ދޮނާ ބުނީ އަޒްމީނަށް ދަޢުވަތު ފޮނުވާފައި ވާނެކަމަށެވެ. އަދި އަޒްމީން ހަދަނީ ދޮގުކަމަށާއި، ދަޢުވަތު ފޮނުވީ، ނައިބު ރައީސް މައު މެދުވެރިކޮށް ކަމަށް ވެސް ވަނީ ބުނެފައެވެ.

މިއީ ވެލެންސިއާގެ ހިންގާ ކޮމެޓީން، އަޒްމީންގެ އިތުބާރު ނެތްކަމަށް ފާސްކުރި ދެވަނަ ފަހަރެވެ. މީގެ ކުރިން ވެސް ވަނީ އަޒްމީންގެ އިތުބާރު ނެތްކަމަށް ފާސްކޮށްފައެވެ. ނަމަވެސް، އެ ބައްދަލުވުމަކީ ކުލަބުގެ ހިންގާ ޤަވާޢިދުގައި ވާގޮތުގެ މަތީން، އިޖުރާއަތްތައް ފުރިހަމަވެގެން ކުރިއަށް ގެންދެވިފައިވާ ބައްދަލުވުމެއްގެ ގޮތުގައި ބެލެވެން ނެތްކަަމަށް ކޮމިޝަނަރު ވަނީ ބުނެފައެވެ.

ހަމައެހެންމެ، ކުލަބު ވެލެންސިއާގެ ހިންގާ ޤަވާޢިދުގައި ވާގޮތުން، ކުލަބުގެ ހިންގާ ކޮމެޓީގެ މަޤާމުތަކަށް މެމްބަރުން އިންތިޚާބުކުރުމުގެ އެންމެހައި ބާރުތަކެއް ލިބިގެންވަނީ، އެ މަޤާމުތަަކަށް މެމްބަރުން އިންތިޚާބުކުރުމަށް ބާއްވާ ކުލަބުގެ އާންމު ޖަލްސާއެއްގައި ބައިވެރިވާ މެމްބަރުންނަށްކަން ވަނީ ފާހަގަކޮށްފައެވެ. އެހެންކަމުން، ކުލަބުގެ ޗެއާމަން ނުވަތަ ބޯޑު މެމްބަރަކު މަޤާމުން ވަކިކުރުމުގެ ބާރު ވެސް އޮންނާނީ އެކަމަށްޓަކައި ބާއްވާ އާންމު ޖަލްސާގައި ބައިވެރިވާ މެމްބަރުންނަށް ކަމަށް ވަނީ ބުނެފައެވެ. އެފަހަރު ކޮމިޝަނަރު ވަނީ، ވެލެންސިއާގެ ޗެއާމަނަކީ އަޒްމީންކަމަށް، އެފްއޭއެމަށް ވެސް އަންގާފައެވެ.