ރައީސް ޔާމީން ޤާނޫނު އަސާސީގެ ތެރެއިން ވެރިކަން ކުރައްވަން ބޭނުންފުޅުވެވަޑައެއްގަންނަވާ : އިބޫ

ރައީސް އަބްދުﷲ ޔާމީން އަބްދުލް ޤައްޔޫމް ޤާނޫނު އަސާސީގެ ތެރެއިން ވެރިކަން ކުރައްވަން ބޭނުންފުޅުވެވަޑައިނުގަންނަވާކަމަށާއި އެ މަނިކުފާނަށް ޤާނޫނު އަސާސީގެ ތެރެއިން ވެރިކަން ކުރައްވަން އެނގިވަޑައިނުގަންނަވާކަމަށް ރައްޔިތުންގެ މަޖިލީހުގެ އެމްޑީޕީ ޕާލަމެންޓްރީ ގްރޫޕްގެ ލީޑަރ އިބްރާހީމް މުހައްމަދު ސޯލިހު (އިބޫ) ވިދާޅުވެއްޖެއެވެ.

މިނިވަންދުވަހާއި ގުޅިގެން ޤައުމާއި މުހާތަބުކޮށް ރައީސް ޔާމީން ދެއްކެވި ވާހަކަފުޅުން އެކަން ވަރަށް ސާފުކޮށް އެނގިގެންދާނެ ކަމަށް އިބޫ ވިދާޅުވި އެވެ.

"ޤާނޫނު އަސާސީ ޑްރާފްޓުކުރެވި ތަންފީޒުކުރެވިގެންދަނީ އެއްވެސް މީހަކު ބޭނުންހާ ކަމެއް، ބޭނުން ގޮތަކަށް، ބޭނުން ވަގުތު ކުރެވޭ ގޮތަކަށް ނޫން. ޤާނޫނު އަސާސީގައި އިންތަކެއް އެބަހުރި. ރައްޔިތުން މަޖިލީހުގެ ބޭފުޅުންނަށް މަޖިލީހަށް ކުރެވޭނެ ކަންތައްތައް އެބަހުރި. ޤާނޫނު އަސާސީ ތަން ނުދޭ ޑިކްޓޭޓަޝިފެއް ހިންގާކަށް" އިބޫ ވިދާޅުވިއެވެ.

އިބޫ ވިދާޅުވީ ރައްޔިތުން މަޖިލީހުގެ އަގުލަބިއްޔަތު ހޯއްދެވުމަށްޓަކައި ރައީސް ޔާމީން ފަހަރަކު މެމްބަރަކު ބަންދުކޮށް، ޖަލަށް ލައްވައި ގޮނޑިތައް ގެއްލުވާލެއްވުމުގެ މަސައްކަތްކުރައްވާކަމަށާއި ރައްޔިތުންނާއި ރައްޔިތުން މަޖިލީހުން އެދިލައްވަނީ ކަންތައްތައް ކުރައްވާ ގޮތުގެ ތަފްސީލު ހާމަކޮށްދެއްވުމަށެވެ. ޒަމާނުއްސުރެ އިނދަ ޖެހިފައިވާ އިޤްތިސާދު ނަގަހައްޓަން މަސައްކަތްޕުޅުކުރައްވާ ވާހަކައާއި ދަޢުލަތުގެ ދަރަނި އަދާކުރެއްވުމަށް މަސައްކަތްޕުޅުކުރައްވާ ވާހަކަ ރައީސް ޔާމީން ވިދާޅުވިކަމަށާއި ރައީސް ޔާމީން ވެރިކަމާއި ހަވާލުވެވަޑައިގެންނެވިއިރު ދައުލަތުގެ ދަރަނި އޮތީ ސައުވީސް ބިލިއަން ރުފިޔާގައި ކަމަށާއި 2017 ވަނަ އަހަރު ނިމިގެންދާއިރު ދަޢުލަތުގެ ދަރަނި ސާޅީސް ދެ ބިލިއަން ރުފިޔާއަށް އަރާނެކަމަށް އިބޫ ވިދާޅުވިއެވެ. އަދި ބޭރުގެ ދަރަނި ޖުމްލަ ސާދަ ބިލިއަން ރުފިޔާއަށް އަރާކަމަށް އިބޫ ވިދާޅުވިއެވެ.

ދަޢުލަތުން ބޭރު ދަރަނި ނެންގެވި އިރު ހަމައެކަނި ޗައިނާއިން އެގާރަ ބިލިއަން ރުފިޔާ ނެންގެވިކަމަށް އިބޫ ވަނީ ފާހަގަކުރައްވާފައެވެ. އަދި ރައީސް ޔާމީން ވެރިކަމަށް އަރާވަޑައިގެންނެވިއިރު ސިޔާސީ މަޤާމުތަކުގެ އަދަދަކީ 300 ކަމަށާއި އެހެންނަމަވެސް މިހާރު އެ އަދަދު 692 އަކަށް ބަދަލުވެކޮށްފައިވާކަމަށް އޭނާ ވިދާޅުވިއެވެ.

ކުރިން 300 މުވައްޒިފުންނަށް ނުވަދިހަ މިލިއަން ރުފިޔާ ސަރުކާރުން ހަރަދުކުރެއްވި ކަމަށާއި އެހެންނަމަވެސް މިހާރު 692 މުވައްޒިފުންނަށް ތިންސަތޭކަ މިލިއަން ރުފިޔާ ސަރުކާރުން ޙަރަދުކުރައްވާކަމަށް އިބޫ ފާހަގަކުރެއްވިއެވެ.