ފިރްމީނޯ، އަލް އަހްލީ ދޫކޮށްނުލާނެ!

ސައުދީ ޕްރޯ ލީގުގެ އަލް އަހްލީ އަށް ކުޅެމުން އަންނަ، ބްރެޒިލްގެ ރޮބާޓޯ ފިރްމީނޯ އެކުލަބު ދޫކޮށްނުލާނެ ކަމަށް މީޑިއާތަކުން ބުނެފި އެވެ.

ލިވަޕޫލް ދޫކޮށް، ފިރްމީނޯ އަލް އަހްލީ އަށް ބަދަލުވީ މިދިޔަ އަހަރު އެވެ. ލިވަޕޫލާއެކު އޭނާ ހަދާފައި އޮތް އެއްބަސްވުން ހަމަވުމުން، އަލް އަހްލީ އަށް ސޮއި ކުރީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. އެ ކުލަބާއެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. މިހާތަނަށް އޭނާ ވަނީ އެ ކުލަަބަށް 19 މެޗު ކުޅެދީ، ތިން ލަނޑު ޖަހައިފަ އެވެ.

ނަމަވެސް، އެެއްބަސްވުމުގައި ބާކީ ދެ އަހަރު އޮއްވާ، އޭނާ އެ ކުލަބު ދޫކޮށްލަން އުޅޭ ކަމުގެ އަޑުތައް ވެސް ވަނީ ފެތުރިފަ އެވެ. އެގޮތުން، ފިރްމީނޯ ބޭނުންވަނީ އަލުން ޔޫރަޕުގެ ފުޓުބޯޅަ އަށް އެނބުރި ދާން ކަމުގައި ވެސް ވަނީ ބުނެފަ އެވެ. އެކި އެކި މީޑިއާ ތަކުގައި ދެކެވެމުން އަންނަ ވާހަކަ އޭނާގެ އެޖެންޓު ވަނީ ދޮގު ކޮށްފަ އެވެ. އޭނާގެ އެޖެންޓާ ހަވާލާދީ މީޑިއާ ތަކުގައި ބުނެފައިވާ ގޮތުން، އަލް އަހްލީ ދޫކޮށްލުމުގެ އެއްވެސް ވިސްނުމެއް އޭނާގެ ނެތެވެ. އޭނާގެ ވިސްނުން ހުރީ، އަލް އަހްލީގައި ހުރެ، އެ ޓީމާއެކު ކާމިޔާބީތައް ހާސިލު ކުރުމަށް ކަމަށް ވެސް ބުނެފައިވެ އެވެ.

ފިރްމީނޯ އަކީ ލިވަޕޫލްގައި މޮޅަށް ކުޅުނު ކުޅުންތެރިޔެކެވެ. އޭނާ ވަނީ ލިވަޕޫލްގައި ހޭދަކުރި އަށް ސީޒަންގެ ތެރޭގައި، އެ ޓީމަށް 362 މެޗު ކުޅެދީ 111 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ހަތް ތައްޓެއް ކާމިޔާބު ކޮށްފަ އެވެ.