ޔުނައިޓެޑަށް ވުރެ އިސްވާނީ ގައުމު: އޮނާނާ

ކުލަބަށްވުރެ އޭނާ އަށް އިސްވާނީ ގައުމު ކަމަށް ކެމަރޫނާއި މެންޗެސްޓާ ޔުނައިޓެޑްގެ ކީޕަރު އަންދްރޭ އޮނާނާ ބުނެފި އެވެ.

އޭނާ މިހެން ބުނީ އެފްރިކަން ކަޕް އޮފް ނޭޝަންސްގައި ގައުމީ ޓީމަށް ކުޅެން ދިއުމުން ބައެއް ސަޕޯޓަރުން މަލާމާތް ކުރުމުންނެވެ. އޮނާނާއާ މެދު ސަޕޯޓަރުން ހިތްހަމަނުޖެހުނީ މުބާރާތުގައި ގައުމީ ޓީމު ކުޅުނު ފުރަތަމަ މެޗަށް އޭނާ އަށް އާދެވޭ ގޮތް ނުވުމުންނެވެ.

އެފްރިކާ ކަޕަށް އޭނާ އައިވަރީ ކޯސްޓަށް ދިޔައީ ކެމަރޫނާއި ގިނީ ކުޅުނު މެޗަށް ވަގުތު ކުޑަތަންވެފައި ވަނިކޮށެވެ. އެއީ މެންޗެސްޓާ ޔުނައިޓެޑާއި ޓޮޓެންހަމް އިނގިރޭސި ޕްރެމިއާ ލީގުގައި ކުޅުނު މެޗު ނިންމާފައި ގައުމީ ޓީމާ ގުޅެން ޖެހުމުންނެވެ. އެ މެޗަށް ފަހު އޭނާ ޗާޓަރު ފްލައިޓެއްގައި އައިވަރީ ކޯސްޓަށް ދިޔަ ނަމަވެސް ގިނީއާ ދެކޮޅަށް ނުކުޅެ އިނީ ކުޅިބަލާށެވެ.

އޮނާނާ އަށް ސަޕޯޓަރުންގެ ފާޑުކިއުން އަމާޒުވާ އެހެން ކަމެއް ވެސް އެބައޮތެވެ. އެއީ 2022ވަނަ އަހަރުގެ ވޯލްޑްކަޕުގެ މެދުތެރެއިން ޓީމާ ވަކިވި މައްސަލަ އެވެ. އެއަށްފަހު ގައުމީ ޓީމަށް ކުޅެން އޭނާ ނިންމީ އަށް މަސް ފަހުންނެވެ.