ޗައިނާގެ އާބާދީ ދަށަށްދާތާ ދެވަނަ އަހަރު، އުފަންވާ ނިސްބަތްވެސް ރެކޯޑް މިންވަރަކަށް ދަށަށް!

ޗައިނާގައި އަލަށް ކުދިން އުފަންވާރޭޓް ރެކޯޑް މިންވަރަކަށް ދަށަށްގޮސް އާބާދީ ދަށްވަމުންދާ ތާ މިއީ ދެވަނައަހަރެވެ.

ރޮއިޓާސް އިން ނެރުނު ރިޕޯޓެއްގައި ވާގޮތުން 2023 ވަނަ އަހަރު ޗައިނާގެ އާބާދީ ޖެހިޖެހިގެން ދެ ވަނަ އަހަރަށް ދަށަށް ގޮސްފައިވާއިރު، އުފަންވާ ނިސްބަތް ރެކޯޑް މިންވަރަކަށް ވަނީ ދަށްވެފައެވެ. ހަރުކަށި ލޮކްޑައުންތައް ނިމުމަކަށް ގެނައުމުން ކޮވިޑް-19 ޖެހިގެން މަރުވާ މީހުންގެ ނިސްބަތްވެސްވަނީ އިތުރުވެފައެވެ. އެކަމުގެ ސަބަބުން އިގްތިސާދުގެ ކުރިއެރުމަށް ދިގު މުއްދަތަކަށް ބޮޑެތި އަސަރުތަކެއް ދަނީ ކުރަމުންނެވެ.

ޗައިނާގެ ނޭޝަނަލް ބިއުރޯ އޮފް ސްޓެޓިސްޓިކްސް އިން ބުނީ 2023 ވަނަ އަހަރު ޗައިނާގެ ޖުމްލަ މީހުންގެ އަދަދު 2.08 މިލިއަން ނުވަތަ 0.15 އިންސައްތަ ދަށަށް ގޮސް 1.409 ބިލިއަން އަށް ވެއްޓިފައިވާ ކަމަށެވެ. އެއީ 2022 ވަނަ އަހަރު އާބާދީ 850،000 އަށް ވުރެ މައްޗަށް ގޮސްފައިވާ އިރު، މިއީ 1961 ވަނަ އަހަރުގެ މާއޯ ޒޭޑޮންގް ޒަމާނުގެ ބޮޑު ކާރިސާގެ ދުވަސްވަރު ގެ ފަހުން އާބާދީ ދަށްވި ފުރަތަމަ ފަހަރެވެ.

ޗައިނާގައި އަލަށް އުފަންވާ މީހުންގެ ނިސްބަތް މިހާރު 5.7 އިންސައްތަ ދަށަށް ގޮސް މުޅި އާބާދީ 9.02 މިލިއަނަށް ވަނީ ވެއްޓިފައެވެ. އުފަންވާ ނިސްބަތް ރެކޯޑް މިންވަރަކަށް ދަށްވެފައިވާއިރު، ކޮންމެ 1،000 މީހަކަށް 6.39 އަށް އެ ނިސްބަތް ދަށްވެފައިވާ ކަމަށް ރިޕޯޓުގައި ބުނެފައިވެއެވެ. 1980 ވަނަ އަހަރުން ފެށިގެން 2015 ވަނަ އަހަރާ ހަމައަށް ވަން ޗައިލްޑް ސިޔާސަތު ތަންފީޒުކޮށް، އެ މުއްދަތުގެ ތެރޭގައި ހަލުވިކަމާއެކު ރަށްވެހިވުމުގެ ނަތީޖާއެއްގެ ގޮތުން އެ ގައުމުގައި އުފަންވާ މީހުންގެ އަދަދު އެތައް އަހަރެއް ވަންދެން ދަނީ ދަށްވަމުންނެވެ.

ދުނިޔޭގެ 2 ވަނަ އިޤްތިޞާދުކަމުގައިވާ ޗައިނާގެ ކުރިއެރުމުގެ ފުރުޞަތު ކުޑަވަމުން ދަނީ މަސައްކަތްތެރިންނާއި ކަސްޓަމަރުން މަދުވުމުގެ ސަބަބުން ކަމަށް ވާއިރު، އުމުރުން ދުވަސްވީ މީހުންނަށް އަޅާލުމާއި ރިޓަޔަރމަންޓް އިނާޔަތްތަކުގެ ޚަރަދުތައް އިތުރުވުމުގެ ސަބަބުން ދަރަނިވެރިވެފައިވާ ލޯކަލް ސަރުކާރުތަކަށް އިތުރު ނުތަނަވަސްކަމެއް ކުރިމަތިވެފައިވާކަމަށް މި ތަފާސް ހިސާބުތަކުން ދައްކައެވެ.

ދުނިޔޭގެ އެންމެ އާބާދީ ބޮޑު ގައުމެއްގެ ގޮތުގައި މިދިޔަ އަހަރު ޗައިނާ ފަހަތަށް ޖައްސާލައި، ޗައިނާގެ ބައެއް ސަޕްލައި ޗެއިންތައް އެހެން މާކެޓްތަކަށް ބަދަލުކުރުމުގެ ގާބިލުކަމާ މެދު އިތުރު ބަހުސެއް އުފެދި، ހާއްސަކޮށް ބެއިޖިން އާއި ވޮޝިންޓަންއާ ދެމެދު ޖިއޮޕޮލިޓިކަލް ނުތަނަވަސްކަން އުފެދިފައިވާ ކަމަށް އދ އިންވަނީ އަންދާޒާކޮށްފައެވެ.

ދިގު މުއްދަތަކަށް ރިޢާޔަތްކޮށް، އދ.ގެ ތަޖުރިބާކާރުން ދެކޭ ގޮތުގައި 2050 ވަނަ އަހަރު ޗައިނާގެ އާބާދީ 109 މިލިއަނަށް ދަށަށް ދާއިރު، މިއީ 2019 ވަނަ އަހަރު ޗައިނާ އިން ކުރިން އަންދާޒާކުރި މިންވަރަށް ވުރެ ތިން ގުނަ ދަށް އަދަދެކެވެ. ޗައިނާގެ 60 އަހަރުން މަތީގެ އާބާދީ 2023 ވަނަ އަހަރު 296.97 މިލިއަނަށް އަރާފައިވާއިރު، 2022 ވަނަ އަހަރު އެގައުމުގައި ތިބީ 280.04 މިލިއަން މީހުންނެވެ.

އާބާދީ ދަށަށް ދިއުމާއި އެކަމުގެ ސަބަބުން އިގްތިސާދަށް ކުރާ ނޭދެވޭ އަސަރުތަކުގެ މައްޗަށް ޗައިނާއަށް ކުރިމަތިވެފައިވާ ގޮންޖެހުންތަކުގެ މައްޗަށް ބިނާކޮށް ޗައިނާގެ ސިޔާސަތުތައް މިހާރުދަނީ ބަދަލުކުރަމުންނެވެ. އެގޮތުން އަލަށް ކައިވެނިކުރާ ދެމަފަރިންނަށް ފައިސާގެ އިނާޔަތްތައް ދިނުމާއި، އެއްވެސްކޮންޓްރޯލެއް ނެތި ދަރިން ހޯދުމުގެ ހުއްދަ ސަރުކާރުން ދީފައިވާކަން ފާހަގަކޮށްލެވެއެވެ.

މީގެ އިތުރުން ޗައިނާގެ މަސައްކަތްތެރިންގެ މުސްތަގުބަލާއި ދުނިޔޭގެ އިގްތިސާދީ ބާރެއްގެ ގޮތުގައި އެ ގައުމުގެ މަގާމު ދެމެހެއްޓުމުގެ ގާބިލުކަމާ މެދު ވެސް ސުވާލު އުފެދި ސަރުކާރުންދަނީ ފިޔަވަޅުތައް އަޅަމުންނެވެ.