ބަޔާން މިއުނިކަށް ކުޅެމުން އަންނަ ޖަރުމަނުގެ ލެރޯއީ ސާނޭގެ އެއްބަސްވުން އައުކުރުމުގެ މަސައްކަތް ދަނީ ކުރިއަށް ކަމަށް، ބަޔާންގެ ޑައިރެކްޓަރު ފްރެއުންޑް ވިދާޅުވެއްޖެ އެވެ.
އޭނާ މިހެން ވިދާޅުވީ ބަޔާންގައި ސާނޭގެ ކުރިމަގާ ގުޅޭ ގޮތުން ވާހަކަ ދައްކަވަމުންނެވެ. ބަޔާނާ އެކު ސާނޭ މިހާރު ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. އެހެންކަމުން، މީގެ ދުވަސްތަކެއް ކުރިން ބަޔާނުން ވަނީ އޭނާގެ އެއްބަސްވުން އައުކުރުމުގެ މަޝްވަރާތައް ފަށާނެ ކަމަށް ބުނެފަ އެވެ.
ފްރެއުންޑް ވިދާޅުވީ، ސާނޭގެ އެއްބަސްވުން އައުކުރުމުގެ މަސައްކަތް އަވަސް އަރުވާލައިގެން ކުރިއަށް ގެންދަން ބޭނުންނުވާ ކަމަށެވެ. ނަމަވެސް، އެކަމާ ގުޅުން ހުރި މަޝްވަރާތައް ކުރިއަށް އޮތް ދުވަސްތަކުގައި ކުރިއަށް ގެންދާނެކަން ފާހަގަކޮށް އޭނާ ބުނީ، ސާނޭއާމެދު ބަޔާނުން ވަރަށް އުފާވާ ކަމަށެވެ. މި ސީޒަނަކީ ބަޔާންގައި ސާނޭ އެންމެ މޮޅަށް ކުޅެމުން އަންނަ ސީޒަންކަމަށް ވެސް އޭނާ ވަނީ ބުނެފަ އެވެ. އެހެންކަމުން، ދިގު މުއްދަތަކަށް ސާނޭ ބަޔާންގައި ހުންނާނެކަމުގެ އުންމީދު ވަރަށް ބޮޑު ކަމަށް އޭނާ ބުންޏެވެ.
މެންޗެސްޓަރ ސިޓީގައި ހުރުމަށްފަހު ސާނޭ ބަޔާނަށް ބަދަލުވީ 2020 ވަނަ އަހަރު އެވެ. ބަޔާނާއެކު ސާނޭ މިހާރު ސޮއިކޮށްފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް ބަޔާނުން ބޭނުންވަނީ ދިގު މުއްދަތަކަށް އެއްބަސްވުން އައުކޮށް، ސާނޭ ކުލަބުގައި ބެހެއްޓުމަށެވެ. މިވަގުތު ބަޔާނުން އެންމެ އިސްކަމެއް ދެމުން އަންނަނީ ވެސް، ސާނޭގެ އެއްބަސްވުން އައު ކުރުމަށް ކަމަށް އެ ކުލަބުން ވަނީ މީގެ ކުރިން ވެސް ބުނެފަ އެވެ.
ސާނޭ ވަނީ މިހާތަނަށް އެ ކުލަބަށް ކުޅެދިން، 158 މެޗުގައި 47 ލަނޑު ޖަހާފަ އެވެ. ބަޔާނާއެކު އޭނާ ވަނީ ހަތް ތައްޓެއް ކާމިޔާބުކޮށްފަ އެވެ.
