ދިރާސީ އައު އަހަރު ފަށާއިރު، "ގައުމިއްޔަތު މާއްދާ" ވަކި މާއްދާއެއްގެ ގޮތުގައި ކިޔަވައިދެނީ

ދިރާސީ އައު އަހަރު ފަށާއިރު، "ގައުމިއްޔަތު މާއްދާ" ވަކި މާއްދާއެއްގެ ގޮތުގައި ކިޔަވައިދޭން ފަށަން ނިންމާފައިވާކަން ސަރުކާރުން ހާމަކޮށްފިއެވެ.

ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިބްރާހީމް ވިދާޅުވީ، ދިވެހި ގައުމިއްޔަތު ކިޔަވައިދިނުމަށް ގައުމީ މަންހަޖުގައި ހިމެނުމާއި ގުޅޭގޮތުން، މިނިސްޓްރީ އޮފް އެޑިއުކޭޝަނުން ހުށަހަޅާފައިވާ މައްސަލައިގައި އަމަލުކުރާނެ ގޮތްތަކެއް ސަރުކާރުން ނިންމާފައި ވާކަމަށެވެ. އެގޮތުން ދިވެހި ގައުމިއްޔަތުގެ ރުކުންތަކާއި އަގުތަކަށް އިސްކަންދީ، ގައުމިއްޔަތަށް ލޯބިކުރާ، އަދި ގައުމިއްޔަތުގެ ބަހާތަކަށް އަހުލުވެރިވެފައިވާ ޖީލެއް ބިނާކުރުމަށާއި، ދިވެހި ގައުމިއްޔަތު ދިރުވައި އާލާކުރުމުގެ މަގުސަދުގައި މަސައްކަތްތަކެއް ކުރެވޭކަން އޭނާ ވަނީ ފާހަގަކުރައްވާފައެވެ.

އެގޮތުން ކުރެވުނު މަސައްކަތްތަކާއެކު، ދިވެހި ގައުމިއްޔަތު ކިޔަވާދިނުމަށް ވަކި މާއްދާއެއް ތައުލީމުގެ މަންހަޖުގައި ހިމެނުމަށް ސަރުކާރުން ވަނީ މީގެ ކުރިން ނިންމާފައެވެ. އެ ނިންމުމާ އެއްގޮތަށް، ދިރާސީ އައު އަހަރު، ދިވެހި ގައުމިއްޔަތު މާއްދާ ކިޔަވައިދޭން ފަށަނީ ރައީސް އޮފީހާ މަޝްވަރާކޮށްގެން ކަމަށް ވެސް އޭނާ ވަނީ ވިދާޅުވެފައެވެ.