ޔަމަނުގެ ޙޫޘީންގެ އިތުރު އަމާޒަކަށް އެމެރިކާގެ އަސްކަރިއްޔާއިން ހަމަލާދީފި

ޔަމަނުގެ ޙޫޘީންގެ އިތުރު އަމާޒަކަށް އެމެރިކާގެ އަސްކަރިއްޔާއިން ހަމަލާދީފިއެވެ.

އެމެރިކާގެ އަސްކަރިއްޔާއިން ހޮނިހިރު ވިލޭރޭ ފަތިހު، ޔަމަނުގެ ޙޫޘީންގެ ބާރުގެ ދަށުގައިވާ ސަރަހައްދަކަށް ހަމަލާދީފައިވަނީ، ރަތް ކަނޑުގެ ވިޔަފާރި އުޅަނދުފަހަރަށް ނުރައްކަލެއް ކަމަށް ބެލެވޭ ތަނަކަށް އަމާޒުކޮށެވެ. މި ފިޔަވަޅު އެޅީ މިދިޔަ ބުރާސްފަތި ދުވަހު، ހޫޘީ ހަނގުރާމަވެރިންނާ ދެކޮޅަށް އެމެރިކާއާއި އިނގިރޭސިވިލާތުން ދިން ސިލްސިލާ ވައިގެ ހަމަލާތަކެއްވެސް ދީފައި ވަނިކޮށެވެ.

އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ވަނީ، ޙޫޘީންނާ ދެކޮޅަށް އިތުރު ހަމަލާތަކެއް ދީފާނެ ކަމުގެ އިންޒާރު ރައީސް ޖޯ ބައިޑަން ދެއްވާފައިވާއިރު، ފުރަތަމަ ހަމަލާތަކަށްފަހު ހުރިހާ ފަރާތްތަކަކުން ވެސް "ހާލަތު އިތުރަށް ގޯސް ނުކުރުމަށް" އެދިވަޑައިގެންފައެވެ.

އެމެރިކާއިން އަނެއްކާވެސް ހޫޘީންގެ އަމާޒުތަކަށް ހަމަލާދީފައި މި ވަނީ ،ކުރިއަށް އޮތް 72 ގަޑިއިރަށް ރަތް ކަނޑުގެ ސަރަހައްދާއި ޢަދަނުގެ ކަނޑުއޮޅީގެ ވަކި ސަރަހައްދުތަކުން ދަތުރު ނުކުރުމަށް، އެމެރިކާގެ ދިދަ ޖަހާފައިވާ އުޅަނދުފަހަރަށް ހުކުރު ދުވަހު އިންޒާރު ދީފައި ވަނިކޮށެވެ.

ޣައްޒާގައި މިހާރުވެސް ހިނގަމުންދާ، އިސްރާއީލާއި ހަމާސްގެ ހަނގުރާމައިގެ ސަބަބުން އުފެދިފައިވާ ނުތަނަވަސްކަން އިތުރުވެ، ހޫޘީން ވަނީ ބަދަލު ހިފުމަށް ވައުދުވެފައެވެ.

އެމެރިކާގެ އަސްކަރިއްޔާއާއި ވައިޓް ހައުސްގެ އޮފިޝަލުން ވިދާޅުވީ ޙޫޘީން ރައްދު ދޭން މަސައްކަތް ކުރާނެކަމަށް އުއްމީދުކުރާ ކަމަށެވެ.

ޙޫޘީން ބުނިގޮތުގައި، ފުރަތަމަ ދިން ހަމަލާތަކުގައި 5 މީހުން މަރުވެ 6 މީހަކު ޒަޚަމްވިއެވެ. ޙޫޘީންގެ ބާރުގެދަށުގައިވާ ތަފާތު 28 ސަރަހައްދަކަށް އެމެރިކާއިން ވަނީ ދެ ފަހަރެއްގެ މަތިން ހަމަލާތަކެއް ދީފައެވެ.

އީރާނުން މި ހަމަލާއަށް ވަރަށް ބޮޑަށް ފާޑުކިޔަމުން އަންނައިރު، އީރާނުގެ ފޮރިން މިނިސްޓްރީގެ ތަރުޖަމާނު ނާޞިރު ކަންޢާނީ ވިދާޅުވީ، އާބިޓްރަރީ ހަމަލާތަކުގެ ސަބަބުން ސަރަހައްދުގައި ނާމާންކަމާއި ހަމަނުޖެހުން އުފެދޭނެ ކަމަށެވެ.

މިދިޔަ ހުކުރު ދުވަހު ތެހެރާނަށް މުޒާހަރާގެ ބައިވެރިން އެއްވެ، އިނގިރޭސިވިލާތް، އެމެރިކާ އަދި އިސްރާއީލުގެ ދިދަތައް އަންދާލިއިރު، އެ ތިން ގައުމުން ވެސް ވަނީ އިސްރާއީލުގެ ހަމަލާތައް ކުށްވެރިކޮށް، އަޑުއުފުލާފައެވެ.

އދ.ގެ ސަލާމަތީ މަޖިލީހުގެ ބައްދަލުވުމެއްގައި ރަޝިޔާގެ ސަފީރު ވަސިލީ ނެބެންޒިއާ ވަނީ، އެމެރިކާއާއި އިނގިރޭސިވިލާތާއި، އެ ގައުމުތަކުގެ ބައިވެރިން ޔަމަނާ ދެކޮޅަށް "ހަތިޔާރު އެޅި ހަރުކަށި އަމަލުތައް" ހިންގަމުންދާ ކަމަށް ތުހުމަތު ކުރައްވައި، ހަމަނުޖެހުންތައް ކުރިއަށްގެންދިއުމުގެ ސަބަބުން މުޅި މެދުއިރުމަތީގެ ސަރަހައްދަށް ކާރިސާއެއް ކުރިމަތިވެދާނެ ކަމުގެ އިންޒާރު ދެއްވާފައެވެ.

އޭގެ ރައްދުގައި އެމެރިކާގެ ސަފީރު ލިންޑާ ތޯމަސް ގްރީންފީލްޑާއި އިނގިރޭސިވިލާތުގެ ސަފީރު ބާބަރާ ވުޑްވާޑް މި ހަމަލާތައް ދިފާއުކުރެއްވީ، އެއީ އަމިއްލަ ދިފާއުގައި ދިން ހަމަލާތަކެއް ކަމަށާއި، ޚާއްސަކޮށް  ބައިނަލްއަގުވާމީ ޝިޕިންގ ލައިންތަކަށް ނުރައްކާކުރަމުން އަންނަ ޙޫޘީންގެ ފަރާތުން ހަމަލާތައް ހުއްޓުވަން ޖެހޭކަމަށް ވިދާޅުވެފައެވެ.