މާލޭސިޓީ މޭޔަރު އަދި މާލޭސިޓީ ކައުންސިލަރުންގެ ބައި-އިލެކްޝަންގެ ވޯޓުލުމުގެ ވަގުތު އިތުރުނުކުރާނެ ކަމަށް އިލެކްޝަން ކޮމިޝަން (އީސީ)އިން ބުނެފިއެވެ.

މާލެސިޓީ ކައުންސިލް ބައި-އިލެކްޝަން 2024އާ ގުޅޭގޮތުން ރާއްޖެޓީވީއަށް ދެއްވި އިންޓަވިޔުއެއްގައި އީސީގެ ނައިބު ރައީސް އިސްމާއީލް ހަބީބު ވިދާޅުވީ ހުކުރު ދުވަހުގެ މޫސުން ވަރަށް ބޮޑަށް ގޯސްވުމާއި ގުޅިގެން މާލެއަށް އަންނަން ޖެހޭ ބައެއް މީހުންނަށް ނާދެވުމާއި ގުޅިގެން ވަރަށް ގިނަބަޔަކު ވޯޓުލާ ވަގުތު އިތުރުކޮށްދިނުމަށް އެދުނު ކަމަށެވެ. އެހެންކަމުން ވޯޓުލެވޭ ވަގުތު ހަވީރު 4:00ށް އޮތް ނަމަވެސް 5:00ށް ބަދަލުކޮށްފައިވާ ކަމަށް ހަބީބު ވިދާޅުވިއެވެ.

ހަބީބު ވިދާޅުވީ ހޮނިހިރު ދުވަހުގެ 5:00އާ ހަމައަށް ވޯޓުލުން ކުރިއަށް ގެންދާނެ ކަމަށާއި، ވަގުތު އެއަށްވުރެ އިތުރުކުރާނެ ކަމަށް އުންމީދުކޮށްގެން ވެސް ނުވާނެ ކަމަށެވެ.

ވޯޓުލާން އަންނަ މީހުންގެ އަދަދު ވަރަށް މަދުކަން ފާހަގަކުރައްވައި ހަބީބު ވިދާޅުވީ އެއީ ވަރަށް ބޮޑު ދެރައެއް ކަމަށާއި، މެންދުރުފަހުން ގިނަ ބަޔަކު ވޯޓުލުމަށް ނުކުންނާނެ ކަމަށް ބެލެވޭ ކަމަށެވެ. މީހުން ވޯޓުލުމަށް ނެރުމުގެ މަސައްކަތުގައި ކެންޑިޑޭޓުންނާއި ސަޕޯޓަރުން އުޅޭކަން އޭނާ ފާހަގަކުރެއްވިއެވެ.

މާލެ ސިޓީ ކައުންސިލްގެ ބައި އިލެކްޝަނުގެ އިތުރުން މ.މުލަކު އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ބައި އިލެކްޝަން ވެސް ވަނީ ފަށާފައެވެ. ހަބީބު ވިދާޅުވީ ވޯޓުލުމުގެ ހުރިހާ ކަމެއް ވަރަށް ސުލްހަމަސަލަސްކަމާއެކު ކުރިއަށްދާ ކަމަށާއި، 8:25 ކުރިން އެންމެ ވޯޓު ފޮއްޓެއް ފިޔަވައި ހުރިހާ ވޯޓު ފޮއްޓެއްގައި ވޯޓުލުން ފެށި ކަމަށެވެ. މުލަކުގެ ރައްޔިތުން ވޯޓުލުމަށް މާލޭގައި ބެހެއްޓި ވޯޓު ފޮއްޓަށް ވޯޓުލުން ފެށިފައިވަނީ 9:50 ގައި ކަމަށެވެ. ދެމީހުން އައިސްގެން ނުނީ ވޯޓުލުން ނުފެށޭއިރު، ދެމީހުން އައީ 9:50 ގައި ކަމަށް ހަބީބު ވިދާޅުވިއެވެ.

މާލޭސިޓީ މޭޔަރު އަދި މާލޭސިޓީ ކައުންސިލަރުންގެ ބައި-އިލެކްޝަންގެ ވޯޓުލުމުގެ ހައްގު ބައިލައްކައަށްވުރެ ގިނަ މީހުންނަށް ލިބެއެވެ. އެންމެފަހުން ކުރިއަށް ގެންދިޔަ ލޯކަލް ކައުންސިލް އިންތިޚާބުގައި ވެސް ވޯޓުލާފައިވަނީ 40 އިންސައްތަ މީހުން ކަމަށް ކޮމިޝަނުން މައުލޫމާތުދެއެވެ.