ދަރިވަރުންގެ އުނގެނުމާއި، އިއްފަތްތެރިކަމާއި އަހުލާގާއި ސްލޫކަށް މުދައްރިސުން ސަމާލުކަންދޭންޖެހޭ - ޚުތުބާ
12 އޯގަސްޓު 2022 | ހުކުރު 09:26އިލްމުތަކުގެ ތެރެއިން އެންމެ ޝަރަފުވެރި އިލްމަކީ ޝަރުއީ އިލްމު
އިސްމާލީ މަރުކަޒު ތެރޭގައި ހުކުރު ނަމާދަށް ގޮސް ތިބި މީހުން
ދަރިވަރުންގެ އުނގެނުމާއި، އިއްފަތްތެރިކަމާއި، އަހްލާގައި، ސްލޫކަށް ރައްކާތެރިވުމަށް މުދައްރިސުން ވަރަށް ބޮޑަށް ސަމާލުކަންދޭންވާނެ ކަމަށް ހުކުރު ހުތުބާގައި ބުނެފިއެވެ.
ހުކުރު ދުވަހު ރާއްޖޭގެ އެކި ކަންކޮޅުތަކުގައި އިއްވި ހުކުރު ހުތުބާގެ މައުޟޫއަކީ އުނގެނުމުގެ މުހިންމުކަމެވެ. މި މައުޟޫއަށް އިއްވި ހުކުރު ހުތުބާގައި ބުނެފައިވަނީ ޗުއްޓީގެ ދުވަސްތައް ހޭދަކުރުމަށްފަހު މި ކުރިމަތިލީ ދިރާސީ އައު އަހަރުގެ ކިޔެވުމާ ކަމަށެވެ. ތައުލީމު އުނގެނުމަށް އައު އަޒުމަކާއެކު ދިރާސީ އަހަރުގެ ކިޔެވުން އަހަރުމެން ފަށާފައިވާ ކަމަށެވެ.
ބެލެނިވެރިން އެމީހުންގެ ލޮބުވެތި ދަރިން ސްކޫލަށް ފޮނުވަނީ، ސްކޫލްތަކުގެ ވެރިންނާއި މުދައްރިސުންނަށް ވަރަށް ފުރިހަަމައަށް އިތުބާރު ކޮށްފައި ކަމަށާއި، މުދައްރިސުންނަކީ އެކުދިންގެ ދެވަނަ ބެލެނިވެރިން ކަމަށެވެ. އެހެންކަމުން ދަރިވަރުންގެ އުނގެނުމާއި، އިއްފަތްތެރިކަމާއި، އަހްލާގައި، ސްލޫކަށް ރައްކާތެރިވުމަށް މުދައްރިސުން ވަރަށް ބޮޑަށް ސަމާލުކަންދޭންވާނެ ބުނެފައިވެއެވެ.
މާތް ﷲގެ އަމުރުފުޅެއް ބަޔާންކުރައްވާ ހުކުރު ހުތުބާގައި ބުނެފައިވަނީ މާތް ނަބިއްޔާ އިސްލާމީ މުޖްތަމައުގައި ތައުލީމް ފެތުރުއްވުމަށާއި، މުސްލިމުންގެ ދަރިންނަށް ކިޔަވައިދެއްވުމަށް ވަރަށް ހާއްސަ ސަމާލުކަމެއް ދެއްވި ކަމަށާއި، އަދި ނަތީޖާއަކަށްވީ ހޭލުންތެރި، އިލްމުވެރި، އުފެއްދުންތެރި އުއްމަތެއް ވުޖޫދަށް އައުން ކަމަށެވެ.
ހުތުބާގައި ބުނެފައިވަނީ އިލްމުތަކުގެ ތެރެއިން އެންމެ ޝަރަފުވެރި އިލްމަކީ ޝަރުއީ އިލްމު ކަމަށެވެ. ހަމައެއާއެކު އަހަރަމެންގެ ދިރިއުޅުމަށް މަންފާކުރަނިވި އަދި އަހަރެމެންގެ ކޮނޑުގައި އެޅިފައިވާ ދީނީ އަދި ދުނިޔަވީ މަސްއޫލިއްޔަތު އަދާކުރުމަށްޓަކައި ދުނިޔަވީ ތަފާތު އިލްމުތަކުގައި ކުރިއަރައިދިއުމަކީ ވެސް އިސްލާމް ދީން އަމުރު ކުރާ ކަމެއް ކަމަށް ހުތުބާގައި ބުނެފައިވެއެވެ.
ހުޅަނގުގެ ގައުމުތައް އަނދިރީގައި އޮތް އިރު، ބޭސްވެރިކަމާއި، ކެމިސްޓްރީއާއި ފިޒިކްސްއާއި، ހިސާބާއި، ފަލަކީ އިލްމުފަދަ ދާއިރާތަކުގައި، އިސްލާމީ ދުނިޔެ ކުރިއަރައިގެން ދިޔަ ކަމަށް ވެސް ހުތުބާގައި ބުނެފައިވެއެވެ. އަދި މުސްލިމް އިލްމުވެރިންގެ ހިދުމަތްތަކާއި، އީޖާދުތައް މެދުއުޑުގައި ފިޔަވަޖަހަމުން ދިޔައީ ދުނިޔެއާއި އާހިރަތުގެ މަފްހޫމުގައި ކުރެވުނު ބިނާކުރަނިވި މަސައްކަތުގެ ސަބަބުން ކަމަށް ހުތުބާގައި ބުނެފައިވެއެވެ.
މި ފެށުނު އަހަރު، ދަރިވަރުން ދީނީ ރޮނގުންނާއި، އިލްމީ ރޮނގުން، އިތުރު ކުރިއެރުމާއި ތަރައްގީ ހޯދޭތޯ މަސައްކަތް ކުރުމަށް އަޒުމުކަނޑައެޅުމަށް ހުތުބާގައި ގޮވާލާފައިވެއެވެ. އަދި އިތުރު ހަރަކާތްތަކުން ދަރިވަރުންގެ މުޅި މާހައުލަށް ދިރުން ގެނެސް، އަމަލީ މައިދާނަށް ނުކުތުމަށް ވެސް ވަނީ ގޮވާލާފައެވެ.
ހުތުބާގައި ބުނެފައިވަނީ ފޮނި ނަތީޖާ ނެރެވޭނީ ހުރިހާ ކަމެއްގައި މަދުރަސާއާއެކު އެއްބާރުލުންދީގެން ކަމަށެވެ. މަދުރަސާގެ ގަވާއިދުތަކަށް ބޯލަނބައިގެންނާއި، މަދުރަސާގެ މުދަލާއި ތަކެއްޗަށް ވަކިން ހާއްސަކޮށް ކުތުބުހާނާގެ ފޮތްތަކަށާއި، ލެބޯޓަރީގެ ސަމާނުތަކަށް ރައްކާތެރިވެގެން ކަމަށް ބުނެފައިވެއެވެ.
