ލިޔަންކިޔަން ނުދަންނަ ކަމަށް ފާހަގަކުރެވޭ މީހުންނަށް ލިޔަންކިޔަން ދަސްކޮށްދިނުމުގެ މަސައްކަތް ފަށައިފި
މި ޕްރޮގްރާމުގެ ދަށުން އުމުރުން 18 އަހަރާއި 55 އަހަރާ ދެމެދުގެ އާބާދީގައި ލިޔަންކިޔަން ނުދަންނަ ކަމަށް ފާހަގަކުރެވިފައިތިބި އެންމެންނަށް ލިޔަންކިޔަން ދަސްކޮށްދިނުމުގެ މަސައްކަތް ކުރާނެ
ސްކޫލް ދަރިވަރުންތަކެއް އިމްތިހާނު ހޯލުގައި
އުމުރުން 18 އަހަރާއި 55 އަހަރާ ދެމެދުގެ އާބާދީގައި ލިޔަންކިޔަން ނުދަންނަ ކަމަށް ފާހަގަކުރެވިފައިތިބި އެންމެންނަށް ލިޔަންކިޔަން ދަސްކޮށްދިނުމަށް ހާއްސަ މަސައްކަތްތަކެއް 8 ސެޕްޓެމްބަރުން ފެށިގެން ކުރިއަށް އޮތް އަަހަރުގެ ތެރޭގައި ކުރުމަށް ނިންމައިފިއެވެ.
ބައިނަލްއަގުވާމީ ލިޔަންކިޔަން ދަތުމުގެ ދުވަހާއި ގުޅިގެން އެޑިއުކޭޝަން މިނިސްޓްރީން ބުނީ މި މަސައްކަތް ކުރާނީ ސިޓީ ކައުންސިލްތަކާއި، އަތޮޅު ކައުންސިލްތަކާ ގުޅިގެން ނެޝަނަލް އިންސްޓިޓިއުޓް އޮފް އެޑިއުކޭޝަނުން ކަމަށެވެ.
މީގެ އިތުރުން ލިޔަންކިޔަން ނުދަތުން މުޅިން ފޮހެލެވިފައިވާ ރަށްތައް ވަކި އުސޫލެއްގެ މަތިން ފާހަގަކޮށް އެކަން އަންގައިދޭ ހަނދާނީ ލިޔުމެއް އެ ރަށްތަކަށް މި އަހަރުގެ ތެރޭގައި ދިނުމަށް ވަނީ ކަނޑައަޅާފައެވެ. ލިޔަންކިޔަން ނުދަތުން ފޮހެލެވިފައިވާ ރަށެއްގެ ގޮތުގައި ކަނޑައެޅުމުގައާއި ލިޔަން ކިޔަން ދަންނަ 100 އިންސައްތަ ހާސިލްކޮށްފައިވާ ރަށެއްގެ ގޮތުގައި އެރަށެއް ދެމިއޮތުމަށްޓަކައި އެކަމަށް ތައްޔާރުކުރެވިފައިވާ އުސޫލުގައިވާ ޝަރުތުތައް ފުރިހަމަވާން ޖެހޭނެއެވެ.
އެޑިއުކޭޝަން މިނިސްޓްރީން ބުނީ ލިޔަންކިޔަން ދަތުމުގެ ދުވަހާއި ގުޅިގެން މުޅި ރާއްޖޭގެ ހުރިހާ ސްކޫލެއްގައި ވެސް އެ ސްކޫލަށް ފޮތް ހަދިޔާ ކުރުމުގެ ޕްރޮގްރާމެއް ހޭޝްޓޭގް ކިޔަމާ-ހަދިޔާ ކުރަމާ (kiyamaa-hadhiyaakuramaa#) މި ހޭޝްޓޭގް އާއެކު ކުރިޔަށް ގެންދާނެ ކަމަށެވެ. މީގެ ބޭނުމަކީ ފޮތަށް ލޯބިޖައްސައި ފޮތް ކިޔުމުގެ އާދަ ހަރުލެއްވުމާއި އެކު ފޮތްކިޔޭނެ މަގު ތަަނަވަސްކުރުން ކަމަށް އެޑިއުކޭޝަން މިނިސްޓްރީން ބުނެއެވެ.
ލިޔަންކިޔަން ދަތުމުގެ ދުވަހު ސްކޫލްތަކުގައި ހިނގާ އެންމެ މުހިންމު ހަރަކާތަކީ ނެޝަނަލް ލިޓަރަސީ އެންޑް މެތަމެޓިކްސް ސްޓްރެޓަޖީގެ އަމާޒަށް ވާސިލުވާނެހެން ރީޑިންގ ޕްރޮގްރާމެއް ފެށުމެވެ. ބައެއް ސްކޫލްތަކުގައި އެ ސްކޫލްތަކުގެ އަމިއްލަ ރީޑިންގ ޕްރޮގްރާމެއް މިހާރުވެސް ކުރިއަށްދާތީވެ، އެފަދަ ސްކޫލްތަކުން ވެސް އަލަށް މިފަށާ ރީޑިންގެ ޕްރޮގްރާމުގެ މަގްސަދާ އެއްގޮތަށް (އެއްކީލިވާނޭހެން) ކުރީގެ ޕްރޮގްރާމް ބައްޓަންކުރަން ސްކޫލްތަކަށް ވަނީ އިރުޝާދު ދީފައެވެ.
