އެހެންވީމާ ރައީސްގެ ޓްވީޓުގެ އަގެއް، އަސްލުވެސް ނެތްތާއެވެ!

މި ދައްކަނީ ދިވެހި ރާއްޖޭގެ ރައީސުލްޖުމްހޫރިއްޔާގެ ވާހަކައެވެ. ދިވެހި، ގިނަ ރައްޔިތުންގެ ޣައުލަބިއްޔަތުން އިންތިޚާބު ކުރެއްވި ބޭފުޅާގެ ވާހަކައެވެ. މި ދައުލަތުގެ އެންމެ އިސް ބޭފުޅާގެ ވާހަކައެވެ. ހަމަ އެހާ ވެސް އަގެއް، އެމަނިކުފާނުގެ ނެތީތޯއެވެ.

މި ބުނާ އެއްޗެއް ނޭނގޭނަމަ ދަންނަވާލަދޭނަމެވެ. މި އަހަރުގެ ދެވަނަ ދުވަހުގެ މެންދުރު 12:29 ގައި ރައީސް ޑރ. މުޙައްމަދު މުއިއްޒު، އެމަނިކުފާނުގެ އަމިއްލަ އޮފިޝަލް ޓްވިޓާ އެކައުންޓުން ކުރެއްވި ޓްވީޓެކެވެ. ދިވެހި ރާއްޖޭގެ ރައީސްގެ ހައިސިއްޔަތުން އެމަނިކުފާނު ކުރެއްވި ޓްވީޓަކީ، އާންމުންގެ ކަންބޮޑުވުން އެކަމުގައި ބޮޑު މައްސަލައަކާ ގުޅޭ ޓްވީޓެކެވެ. އެ ޓްވީޓުގައި ރައީސް ވިދާޅުވީ:

ރައީސްގެ އެ ޓްވީޓް ޚުލާސާކުރާނަމަ، އެ ޓްވީޓުގައި ރައީސް ވިދާޅުވީ، އެމަނިކުފާނުގެ ވައުދުފުޅާ އެއްގޮތަށް ގެދޮރުވެރިޔާ އަދި ބިންވެރިޔާ ސްކީމުގެ މަސައްކަތްތައް ކުރިއަށްދާނެ ކަމަށާއި، މި ބުރާސްފަތީގެ ކުރިން އެ ތަންތަނުގެ ރަޖިސްޓްރީ ހަވާލުކުރަން ފަށާނެ ކަމަށެވެ.

ދަންނަވަންތޯއެވެ. ބުރާސްފަތި ދުވަހު ހައުސިން މިނިސްޓަރު، އަލީ ހައިދަރު ވިދާޅުވީ އެކަމެއް އެހެން ކުރެވޭކަށެއް ނެތް ކަމަށެވެ. ސަބަބަކަށް ދެއްކެވީ އެންޓި ކޮރަޕްޝަން ކޮމިޝަން (އޭސީސީ)ން އެ މައްސަލަ ބަލަމުންދިޔުމެވެ.

މިހާ ހިސާބުން އުފެދޭ ސުވާލަކީ، އެ މައްސަލަ ރައީސް ވިދާޅުވި މުއްދަތަށް އައިއިރު ވެސް، ބަލާ ނުނިމޭނެކަން ރައީސް އަށް ނޭނގިފައި އޮތީ ހެއްޔެވެ. ނުވަތަ އެ މައްސަލަ އެހާ ހިސާބަށް ބަލާ ނިމޭނެ ކަން ރައީސަށް ކުރިން އެނގިވަޑައިގެންފައި އޮތީތާއެވެ. އެހެން ނޫންނަމަ، އެހާ ސަރީޚަކޮށް، ވަކި ތާރީޚެއް އެމަނިކުފާނު ދަންނަވާނެ ސަބަބެއް ނެތެވެ. ރައްޔިތުންނަށް ގޯސް ހުވަފެންތައް ދެއްކުން ފިޔަވައެވެ.

ފެންނަ މަންޒަރުން ބައެއް ފަހަރު ހީވާ ކަހަލައެވެ. އެންޓި ކޮރަޕްޝަން ކޮމިޝަން ކުރާނެ އިތުރު މަސައްކަތެއް ނެތް ކަހަލައެވެ. ހަމައެކަނި އާންމު ރައްޔިތުންގެ އެންމެ މުހިންމު، ބޯހިޔާވަހިކަމުގައި އަތްއެޅުމަކީ އެ ކޮމިޝަނުގެ މެންޑޭޓްހެން ވެސް ހީވާކަހަލައެވެ. މި ނޫނަސް ކޮރަޕްޝަނުގެ ކިތަންމެ މައްސަލައެއް ރާއްޖޭގައި ހިނގަމުންދިޔަ ނަމަވެސް، އެ މައްސަލަތަކެއް މިހާ އަހައްމިޔަތުކަން ދީގެން ބަލަމުންދާތަން ނުފެންނަ ކަމީ ޙަގީގަތެވެ.

ކޮންމެއަކަސް މިއަދުގެ އަސްލު މަންޒަރުން ފެނުނީ، ހައުސިން މިނިސްޓަރު އަލީ ހައިދަރު ރައީސްގެ އެ ނިންމެވުމަށް ގޮންޖެއްސެވިތަނެވެ. ރައީސްގެ އެ ޓްވީޓް ވެއްޔާ މޮޑެލައި، އޭގެ ޙުރުމަތް ކަނޑާލިކަމެވެ. ރައީސް މުއިއްޒުއަށް ރައްޔިތުންގެ ކުރާ އިތުބާރު ގެއްލުވާލިތަނެވެ. ނަމަވެސް، ރައްޔިތުން އެތިބީ އެ މައްސަލައިގައި ގޮތެއް ނިމި، އެ ފްލެޓްތަކަށް އެމީހުންނަށް ވަދެވޭނެ ދުވަހެއްގެ އިންތިޒާރުގައިއެވެ.