ބުރާސްފަތި ދުވަހު ފްލެޓްތައް ހަވާލުކުރުމުގެ މަސައްކަތް ފަށާނެ: ހައުސިން މިނިސްޓްރީ
ރައީސްގެ ޓްވީޓާ އެއްގޮތަށް މަސައްކަތް ފެށުމަށްޓަކައި ކުރަން ޖެހޭ ހުރިހާ ކަމެއް އެ މިނިސްޓްރީގެ ފަރާތުން ކުރަމުންދާކަމުގެ ޔަގީންކަން އެ މިނިސްޓްރީން ދީފައިވޭ
މިދިޔަ ސަރުކާރުން ފެށި ގެދޮރުވެރިޔާ ފްލެޓްތައް
ރައީސް ޑރ. މުޙައްމަދު މުއިއްޒުގެ ޓްވީޓާ އެއްގޮތަށް ގެދޮރުވެރިޔާ މަޝްރޫއުގެ ދަށުން ފްލެޓްތައް ލިބިފައިތިބި ފަރާތްތަކަށް ފްލެޓްތައް ހަވާލުކުރުމުގެ މަސައްކަތް ފަށާނެ ކަމަށް ހައުސިން މިނިސްޓްރީ ބުނެފިއެވެ.
މިދިޔަ ސަރުކާރުން ފަށައި، އާންމުންނާ ހަވާލުކުރި ގެދޮރުވެރިޔާ ފްލެޓް މަޝްރޫއުގެ ފުރަތަމަ 4،000 ފްލެޓްތައް ހަވާލުކުރުމުގެ މަސައްކަތް ހުއްޓުމަށް އެންޓި ކޮރަޕްޝަން ކޮމިޝަން (އޭސީސީ)އިން އެންގީ މިދިޔަ އަހަރުގެ ނޮވެމްބަރު މަހުގެ 16 ވަނަ ދުވަހުގެ ރޭއެވެ.
އެދުވަހުން ފެށިގެން، ގެދޮރުވެރިޔާގެ މަޝްރޫއުގެ މައްސަލަތަކެއް ބަލަމުންދާކަމަށް އޭސީސީން ބުނަމުންދާއިރު، އެ މައްސަލައިގައި ކޮޅެއް ނުފެނި ދިގުލައިގެން ދާތީ ޢާންމުންގެ ފަރާތުން ބައެއް މީހުން ވަނީ އޭސީސީ އަދި ހައުސިން މިނިސްޓްރީގެ ދޮށަށް އެއްވާން ފަށައިފައެވެ.
އެގޮތުން ދެތިން ދުވަހަކު އެ އާންމުން އޭސީސީ އަދި ހައުސިންއަށް ގޮސް، އެ މައްސަލައިގެ އަަދާހަމައެއް ހޯދާފައިވާއިރު، އެކަމުގައި ހައުސިން އިން ބުނަމުން ދިޔައީ އެ މައްސަލަ އޭސީސީން ބަލަމުން ދިޔަ ކަމަށެވެ. އެއާއެކު، މިފަހުން އެ މައްސަލަ ހޫނުވީ، ގޯއްޗާއި ފްލެޓު ލިބުނު ފަރާތްތަކަށް މި ހަފުތާގައި ރަޖިސްޓްރީ ހަވާލުކޮށް ނިންމުމުގެ މަސައްކަތް ހައުސިންގ މިނިސްޓްރީން ކުރިއަށްގެންދަވާނެކަމަށް ރައީސް ޑރ. މުޙައްމަދު މުއިއްޒު ވިދާޅުވެ ކުރެއްވި ޓްވީޓަކާ ގުޅިގެންނެވެ.
އެގޮތުން ހައުސިން އަށް އެއްވި ފަރާތްތަކާ އެ ވުޒާރާގެ އިސް ބޭފުޅުން ބުދަ ދުވަހު ވާހަކަ ދައްކަވަމުން ވިދާޅުވި ގޮތުގައި، ރައީސް މުއިއްޒުގެ ޓްވީޓާ އެއްގޮތަށް، ބުރާސްފަތި ދުވަހު ފްލެޓްތައް ހަވާލުކުރުމުގެ މަސައްކަތް ހައުސިން މިނިސްޓްރީން ފަށާނެއެވެ.
އެގޮތުން އެކަމުގެ މައުލޫމާތު ދެމުން ރާއްޖެ ޓީވީ އާ ވާހަކަ ދައްކަވަމުން އެ ފްލެޓްތަކުގެ މައްސަލައިގައި އާންމުންގެ ތެރެއިން އިސްކޮށް ހަރަކާތްތެރިވާ އިސްމާއީލް ނާއިފް ވިދާޅުވީ މި މައްސަލައިގައި މިނިސްޓްރީގެ ނިޔަތަކީ އެ މައްސަލަ ދިގުދަންމާނުލައި، ވީހާ ވެސް އަވަހަކަށް ހައްގު މީހުންނަށް ފްލެޓްތައް ހަވާލުކުރުން ކަމަށެވެ.
އެގޮތުން ރައީސްގެ ޓްވީޓާ އެއްގޮތަށް މަސައްކަތް ފެށުމަށްޓަކައި ކުރަން ޖެހޭ ހުރިހާ ކަމެއް އެ މިނިސްޓްރީގެ ފަރާތުން ކުރަމުންދާކަމުގެ ޔަގީންކަން އެ މިނިސްޓްރީން ދީފައިވާ ކަމަށް އޭނާ ވިދާޅުވިއެވެ.
މީގެ އިތުރުން، އެ މަސައްކަތް އަވަސް ކުރުމަށްޓަކައި، ބުދަ ދުވަހު އޭސީސީއަށް ސިޓީއެއް ފޮނުވާނެ ކަމަށާއި، ވަޒީރާއި ރައީސް ވެސް ފޯނުން ގުޅުއްވައިގެން ވެސް އެކަން އަވަހަށް ކުރައްވަން މަޝްވަރާ ކުރެއްވި ކަމަށް ވުޒާރާއިން ބުނި ކަމަށް އޭނާ ވިދާޅުވިއެވެ.
އަދި އެ ލިސްޓަކަށް އެއްވެސް ބަދަލެއް ނާންނާނެ ކަމުގެ ޔަގީންކަން ވުޒާރާއިން ދީފައިވާ ކަމަށް ވެސް އޭނާ ވިދާޅުވިއެވެ.
ގެދޮރުވެރިޔާ އަދި ބިންވެރިޔާ މަޝްރޫއާ ގުޅޭ ގޮތުން ރައީސް މުއިއްޒު އެކްސްގައި ކުރެއްވި ޕޯސްޓުގައި ވިދާޅުވީ ގޯއްޗާއި ފްލެޓު ލިބޭނެ ކަމަށް ފައިނަލް ލިސްޓުގައި ހިމެނި އަދި ގެޒެޓުކޮށްފައިވާ ފަރާތްތަކަށް ރަޖިސްޓްރީ ހަދައިދީ އެތަންތަން ހަވާލުކުރުމަށް ވެވަޑައިގެންނެވި ވަޢުދުފުޅާ އެއްގޮތަށް ހަވާލު ކުރައްވާނެ ކަމަށެވެ. އެ މަސައްކަތް މި ހަފުތާގެ ތެރޭގައި ނިންމަވާނެ ކަމަށް ރައީސް މުއިއްޒު ވިދާޅުވިއެވެ.
