އިންޑިއާ ސިފައިން ބޭތިއްބުމަށް ވެފައިވާ އެއްބަސްވުމަކީ "ކްލެސިފައިޑް" މައުލޫމާތު، މިވަގުތު ހާމަކުރެވޭކަށް ނެތް: މިނިސްޓްރީ
9 ޖެނުއަރީ 2024 | އަންގާރަ 09:59އެމްއެންޑީއެފުން ބުނެފައިވަނީ، އެ މައުލޫމާތަކީ "ކްލެސިފައިޑް" މައުލޫމާތެއްކަމަށް
އިންޑިއާ އައުޓް ކެމްޕޭން ޙަރަކާތެއްގެ ތެރެއިން
ރާއްޖޭގައި އިންޑިއާ ސިފައިން ބޭތިއްބުމަށް ދިވެހި ސަރުކާރުން އިންޑިއާ ސަރުކާރާއެކު ވެފައިވާ އެއްބަސްވުމަކީ "ކްލެސިފައިޑް" މައުލޫމާތުކަމުން މިވަގުތު އެ އެއްބަސްވުން ހާމަކުރެވޭކަށް ނެތްކަމަށް ރާއްޖޭގެ ދިފާއީ ވުޒާރާއިން ބުނެފިއެވެ.
މި ސަރުކާރު ވެރިކަމަށް އައީ ބޭރު ޤައުމުތަކާއެކު ވެފައިވާ އެއްބަސްވުންތައްވެސް ހާމަނުކުރާތީ ނިމިދިޔަ ސަރުކާރަށް އެތައް ފާޑުކިއުމެއް އަމާޒުކުރަމުންނެވެ.
ރައީސް ޑރ މުޙައްމަދު މުއިއްޒުގެ ވެރިކަމެއްގައި އެންމެ ފުރަތަމަ ކުރެވޭ މަސައްކަތްތަކުގެ ތެރޭގައި އިންޑިއާއާއެކު ހަދާފައިވާ އެއްބަސްވުންތައް ބަލައި ދިރާސާކޮށް އާންމުކުރުން ހިމެނޭނެކަމަށްވެސް ކެމްޕޭނުގައި ވިދާޅުވެފައިވެއެވެ.
އެހެންކަމުން އަމިއްލަ ފަރާތަކުން 5 ޖެނުއަރީ 2024 ގައި ވަނީ ރާއްޖޭގައި އިންޑިއާ ސިފައިން ބޭތިއްބުމަށް ދިވެހި ސަރުކާރުން އިންޑިއާ ސަރުކާރާއެކު ވެފައިވާ އެއްބަސްވުމުގެ ކޮޕީއެއް ހޯދުމަށް އެދި ދިފާއީ ވުޒާރާއަށް ހުށަހަޅާފައެވެ.
އޭގެ ޖަވާބުގައި 8 ޖެނުއަރީގައި އެމްއެންޑީއެފުން ބުނެފައިވަނީ، އެ މައުލޫމާތަކީ ދިވެހި ސަރުކާރުން "ކްލެސިފައިޑް" މައުލޫމާތެއްކަމަށް ކަނޑައަޅާފައިވާ މައުލޫމާތުތަކެއް ކަމަށެވެ.
އަދި އެ ނިންމުން ބަދަލު ކުރަންޖެހޭ ތަނެއް ނެތްކަމަށް އިންފޮމޭޝަން ކޮމިޝަނަރުގެ އޮފީހުންވެސް ނިންމާފައިވާ ކަމަށް ވެސް ދިފާއީ ވުޒާރާއިން އެ ފަރާތަށް ފޮނުވި ލިއުމުގައި ބުނެފައިވެއެވެ.
ދިފާއީ ވުޒާރާއިން ބުނެފައިވަނީ، އެ މައުލޫމާތުތައް "ޑީކްލެސިފައި" ކުރުމުގެ މަސައްކަތް މިހާރުގެ ބަންޑާރަނައިބުގެ އޮފީހާއި، ގުޅުންހުރި އިދާރާތަކާއެކު ކުރެވެމުންދާކަމަށެވެ.
މި މަސައްކަތްތައް ނިމުނުހާ އަވަހަކަށް އެ މައުލޫމާތުތައް ދިފާއީ ވުޒާރާއިން ހާމަކުރާނެކަމަށް ވެސް ބުނެފައިވެއެވެ.
