ރައީސް އޮފީހުގެ ވެބްސައިޓް ޑައުންވަމުންދާތީ، އެކަން ބަލަން ފަށައިފިއެވެ.
ރާއްޖެއެމްވީން ޗެކްކޮށްލިއިރުވެސް އަންގާރަ ދުވަހުގެ ހެނދުނު އެކި ގަޑިތަކުގައި ވެބްސައިޓަށް ނުވަދެވޭތީ އެކަމާ ގުޅިގެން ސުވާލުކުރުމުން ރައީސް އޮފީހުން ބުނީ، ހެނދުނުން ފެށިގެން ބައެއް ވަގުތުތަކުގައި ވެބްސައިޓަށް ނުވަދެވޭކަމުގެ ރިޕޯޓުތައް ލިބިފައިވާ ކަމަށެވެ.
އެގޮތަށް ރިޕޯޓުތައް ލިބިފައިވާތީ ޓެކްނިކަލް ޓީމުން މިހާރު އެކަން ބަލަމުންދާކަމަށް ވެސް ރައީސް އޮފީހުން މައުލޫމާތު ދެއެވެ.
ރައީސް އޮފީހުގެ ވެބްސައިޓް ހިމެނޭހެން ސަރުކާރުގެ ބައެއް ވެބްސައިޓްތައް ޑައުންވި މައްސަލައެއް ޖެނުއަރީ މަހުގެ 7 ވަނަ ދުވަހު ވެސް ފެންމަތިވެފައިވެއެވެ.
އޭރު ވެބްސައިޓްތައް ޑައުންވީ ހޮނިހިރު ދުވަހުގެ ރޭގެ ވަގުތެއްގައެވެ. އެންމެ ފުރަތަމަ ޑައުންވިކަމަށް ފާހަގަކުރެވުނީ ރައީސް އޮފީސް ވެބްސައިޓެވެ. އަދި ފަހުން ފޮރިން މިނިސްޓްރީގެ ވެބްސައިޓަށް ވެސް ނުވަދެއެވެ. ދިމާވި މައްސަލަ ހައްލުކުރުމަށް ފަހު ފަހުން ރައީސް އޮފީހުގެ ވެބްސައިޓަށް ވަދެވޭ ގޮތް އޭރު ވަނީ ހަދާފައެވެ.
ސަރުކާރުގެ ވެބްސައިޓްތަކެއް ޑައުންވީ ސައިބަރ އެޓޭކެއްގެ ސަބަބުން ކަަމަށް ވަނީ އަޑު ފެތުރިފައެވެ. ނަމަވެސް އެއްވެސް ރަސްމީ އިދާރާއަކުން އެކަން ކަށަވަރުކޮށްދީފައެއް ނުވެއެވެ.
