މާލޭގެ ބާރުބޮޑު މަގުތަކުގައި ޓްރެފިކް ބެލެހެއްޓުމުގައި އިތުރު ފުލުހުން ހަރަކާތްތެރިވަނީ
8 ޖެނުއަރީ 2024 | ހޯމަ 10:05ބޮޑެތި ސްކޫލުތައްދޮށް ސްޓެޓިކްކޮށް ބެލެހެއްޓުމާއި ތޮއްޖެހުން ކުޑަކުރުމަށް ފުލުހުން ހަރަކާތްތެރިވަމުން ގެންދާނެ
ފުލުހުން
މާލޭގެ ބާރުބޮޑު މަގުތަކުގައި ޓްރެފިކް ބެލެހެއްޓުމުގައި އިތުރު ފުލުހުން ހަރަކާތްތެރިވާން ފަށައިފިއެވެ.
ދިވެހި ފުލުހުންގެ ޚިދުމަތުން ބުނީ، މަސްތުވާތަކެއްޗާއި ބަނގުރާ ދައުރުކުރުން ހުއްޓުވުމަށާއި، މާލޭގެ ޓްރެފިކް ބެލެހެއްޓުމަށް ފިޔަވަޅުތަކެއް އަޅަން ކޮމިޝަނަރ އޮފް ޕޮލިސް އަލީ ޝުޖާއު ނިންމެވި ނިންމެވުންތައް ތަންފީޒުކުރުމުގެ ގޮތުން، މާލޭގެ މަގުމަތި ބެލެހެއްޓުމާއި ޓްރެފިކް ބެލެހެއްޓުން އިތުރުކުރުމަށްޓަކައި ފުލުހުން އިތުރަށް މަގުތަކަށް ނެރެ، ޑިއުޓީކުރަން ފަށާފައިވާކަމަށެވެ.
އެގޮތުގެ މަތިން މާލެއާއި ހުޅުމާލޭގެ ބޮޑެތި ސްކޫލުތައްދޮށް ސްޓެޓިކްކޮށް ބެލެހެއްޓުމާއި، ތޮއްޖެހުން ކުޑަކުރުމަށް ފުލުހުން ހަރަކާތްތެރިވަމުން ގެންދާނެއެވެ.
އަދި އިތުރު ފުލުހުން މަގުތަކަށް ޑިޕްލޯއިކޮށްގެން، މީހުން އާއްމުކޮށް އެއްވެއުޅޭ ސަރަހައްދުތަކާއި ޓްރެފިކް ބާރުބޮޑު ސަރަހައްދުތަކުގައި އާއްމު ސަލާމަތާއި ރައްކާތެރިކަން ކަށަވަރު ކުރުމަށްވެސް މަސައްކަތް ކުރުމަށް ވަނީ ހަމަޖެހިފައެވެ.
