ބޮޑުވަޒީރު މޯދީއަށް ފާޑުކި ސަރުކާރުގެ ތިން ނައިބު ވަޒީރަކު ސަސްޕެންޑް ކޮށްފި

އިންޑިޔާގެ ބޮޑުވަޒީރު، ނަރެންދުރަ މޯދީއަށް ފާޑުކި ސަރުކާރުގެ ތިން ނައިބު ވަޒީރަކު ސަސްޕެންޑްކޮށްފިއެވެ.

އާދިއްތަ ދުވަހު ތިން ނައިބު ވަޒީރަކު ސަސްޕެންޑްކޮށްފައިވަނީ އިންޑިޔާގެ ބޮޑުވަޒީރަށް ސިދާ އަމާޒުކޮށް، އިސްރާއީލުގެ ޕަޕެޓު، ޖޯކު އަދި އިންޑިޔާ އަކީ ހަޑި ގައުމެއްގެ ގޮތުގައި ސިފަކުރައްވާ ގޯސް ވާހަކަތަކެއް ދެއްކެވުމާ ގުޅިގެންނެވެ.

އެގޮތުން ސަސްޕެންޑު ކުރެއްވި ވަޒީރުންނަކީ  ޒުވާނުންނާ ގުޅޭ ވުޒާރާގެ ނައިބު ވަޒީރުން ކަމުގައިވާ މަރިޔަމް ޝިއުނާ ، މަލްޝާ ޝަރީފް އަދި މަހުޒޫމް މާޖިދު އެވެ.

މި ވަޒީރުންގެ އިތުރުން ވެސް، ފަތުރުވެރިކަމާ ބެހޭ ވުޒާރާގެ ނައިބު ވަޒީރު ހަސަން ޒިހާނު ވެސް އިންޑިޔާގެ ބޮޑު ވަޒީރު އަދި އިންޑިޔާއަށް އަމާޒުކޮށް ގޯސް ވާހަކަތަކެއް ދެއްކުމާ ގުޅިގެން އެކަމުގެ ކަންބޮޑުވުން މީސް މީޑިޔާގައި ފެތުރުނެވެ. އެހެން ނަމަވެސް އެކަމާ ގުޅޭގޮތުން ސަރުކާރުން އަދި ފިޔަވަޅު އަޅާފައެއް ނުވެއެވެ.

ސަރުކާރުން މި ފިޔަވަޅު އަޅާފައިވަނީ އާންމުންގެ ކަންބޮޑުވުން ބޮޑުވެ، ވަރަށް ބޮޑަށް ޕްރެޝަރު ބޮޑުވުމާ ގުޅިގެންނެވެ.

އެގޮތުން މި ކަން ހިނގަން މެދުވެރިވީ އިންޑިޔާގެ ބޮޑުވަޒީރު، ނަރެންދުރަ މޯދީ ލަކްޝަދީޕުގެ ރަށްތަކަށް ވަޑައިގެން، އެރަށްތަކުގެ ރީތިކަން ޕްރޮމޯޓުކުރުމާ ގުޅިގެން އިންޑިޔާގެ ސޯޝަލް މީޑިޔާ އެކްޓވިސްޓުން ވަނީ ރާއްޖެ އަކީ "ޕްރޯ ޗައިނާ" ގައުމެއް ކަމުގައި ބުނެ، ރާއްޖެ ނުދިޔުމަށް "ބޮއިކޮޓް މޯލްޑިވްސް"ގެ ނަމުގައި ކެމްޕޭނެއް ފަށުމާއެކު އެވެ.

އެއާއެކު، ސަރުކާރުގެ އެކި މަގާމުތަކުގައި ތިއްބެވި ބޭފުޅުން ރާއްޖެ ދިފާއުކުރެއްވުމުގެ މަސައްކަތް ފެށްޓެވިއިރު، ބައެއް ނައިބު ވަޒީރުން ފެށްޓެވީ އިންޑިޔާގެ މީހުންނާ ޒާތީ ގޮތުން ދިމާކުރުމުގެ މަސައްކަތެވެ.