މިސަރުކާރުން އަމަލުކުރަނީ މާލެ ސަރަހައްދުން ގޯތި ލިބުނު މީހުންނަށް ނިކަމެތިކަމެއް ލިބޭ ގޮތަށް: އާޒިމް

މިސަރުކާރުން އަމަލުކުރަނީ މާލެ ސަރަހައްދުން ގޯތި ލިބުނު މީހުންނަށް ވަރަށް ބޮޑު ނިކަމެތިކަމެއް ލިބޭ ގޮތަށް ކަމަށް މާލޭ ސިޓީ މޭޔަރުކަމަށް ވާދަކުރައްވާ އެމްޑީޕީ ކެންޑިޑޭޓު އާދަމް އާޒިމް ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމްގައި އާޒިމް ވިދާޅުވީ ގޯތިގެދޮރުގެ މައްސަލައަަށް ވަރަށް އަވަސް ހައްލެއް ބޭނުންވާ ކަމެއް ކަމަށާއި، ގޯތި ދިނުން ލަސްކުރެވެން ނެތް ކަމަށެވެ. ކުރީގެ ސަރުކާރުގައި މާލޭގެ ރައްޔިތުންނަށް ދީފައިވާ ގޯތިތަކުގައި ދިރިއުޅެވޭނެ ގޮތަށް އެސަރަހައްދުތައް އާބާދުކުރަންޖެހޭ ކަމަށް އާޒިމް ވިދާޅުވިއެވެ. އެގޮތުން ގިރާވަރުފަޅު، ގުޅީފަޅު އަދި އުތުރުތިލަފަޅު އިތުރަށް ތަރައްގީކޮށް އެސަރަހައްދުތަކުގައި ފެނާއި، ނަރުދަމާ، ކަރަންޓު ޚިދުމަތްތައް ގާއިމްކޮށް، ސްކޫލުތަކާއި، މިސްކިތްތައް ބިނާކުރަންޖެހޭ ކަމަށެވެ. އެސަރަހައްދުތައް އާބާދުނުވެ ދިގުދެމިގެންދާ ކޮންމެ ދުވަހަކީ އެމީހުންނަށް ލިބޭ ނިކަމެތިކަމެއް ކަމަށް އާޒިމް ވިދާޅުވިއެވެ.

Advertisement

ނަމަވެސް މިސަރުކާރުން މަސައްކަތް ކުރަނީ ފުށިދިއްގަރުފަޅު ތަރައްގީ ކުރުމަށް ކަމަށާއި، ނަމަވެސް މިދަނޑިވަޅުގައި ފުށިދިއްގަރުފަޅު ހިއްކައި ތަރައްގީ ކުރުމަކީ ކުރެވޭ ވަރަށް ބޮޑު އިސްރާފެއް ކަމަށެވެ.

އާޒިމް ވިދާޅުވީ ފުށިދިއްގަރުފަޅު ތަރައްގީކޮށް އެތަނުގައި ދިރިއުޅެން ފެށުމުން މާލެއަށް އައުމަށް ދޮޅުގަޑިއިރުގެ ދަތުރެއް ކުރަންޖެހޭ ކަމަށާއި، އެކަމުގެ ތަކުލީފު ވެސް ރައްޔިތު މީހާ އުފުލަންޖެހޭ ކަމަށެވެ. އަދި ވިދާޅުވީ ކަނޑުގަދަވެ، މޫސުން ގޯސްވެއްޖެނަމަ ދަތުރުނުކުރެވޭނެ ކަމަށެވެ. މިހާރު ވެސް ކަނޑުގަދަވެ ބައެއް ދުވަސްތަކުގައި މާލެ-ވިލިމާލެ ފެރީގެ ދަތުރުތައް ހުއްޓާލަންޖެހޭ ކަމަށާއި، އެއީ އެންމެ 5 މިނެޓުގެ ދަތުރެއް ކަމަށް އާޒިމް ވިދާޅުވިއެވެ.

މާލޭގައި ދިރިއުޅޭ ބައެއް މާލޭގެ ރައްޔިތުންނަކީ ވަރަށް ވަރަށް ނިކަމެތިކޮށް ދިރިއުޅޭ ބައެއް ކަމަށާއި، އެމީހުންގެ ދިރިއުޅުމުގެ ހާލަތު ބަދަލުވާންޖެހޭ ކަމަށެވެ. އެމްޑީޕީގެ ސަރުކާރުގައި ގޯތި ލިބުނު ނަމަވެސް މިއަދު ރައްޔިތުން ތިބީ ހާސްކަމެއްގެ ތެރޭގައި ކަމަށް އާޒިމް ވިދާޅުވިއެވެ.

މާލެގެ ދަފްތަރުގައި ޖެހިފައި ތިބި ރައްޔިތުންނަށް އިޝާރާތް ކުރައްވައި އާޒިމް ވިދާޅުވީ އެމީހުންނަށް ޚާއްސަކޮށްގެން ވެސް ގޯތި ދޫކުރުމަށް އެމްޑީޕީން ޕްރޮގްރާމެއް ފަށާފައިވާ ކަމަށެވެ. ނަމަވެސް މިހާރު މިކަންކަން މަތިން ސަރުކާރުން ހަނދާން ނައްތާލުމަށް މަސައްކަތް ކުރަމުންދާ ކަމަށް އާޒިމް ވިދާޅުވިއެވެ.

އާޒިމް ވިދާޅުވީ ރައްޔިތުން ނިކަމެތި ކުރުމަށްފަހު، ފިނިކޮޓަރީގައި ތިބުމަކީ ރައްޔިތުންނަށް ވެވޭ އިހުމާލެއް ކަމަށާއި، މިކަންކަމުގައި ވަކާލާތު ކުރާނެ ކަމަށެވެ. އެމްޑީޕީގެ ސަރުކާރުގައި ދިނުމަށް ނިންމާފައިވާ ގޯތިތައް ދޫކޮށް އެރައްޔިތުންތަކުގެ ދިރިއުޅުމުގެ ހާލަތު ބަދަލުކުރުމަށް ކުރެވެން ހުރި ހުރިހާ މަސައްކަތެއް ކުރާނެކަމުގެ ޔަގީންކަން އާޒިމް ދެއްވިއެވެ.