ޔޫތު މިނިސްޓްރީގެ ޑެޕިއުޓީ މިނިސްޓަރު މަލްސާ ޝަރީފް އިތުރުފުޅު ހައްދަވައިފިއެވެ.

އޭނާ ވަނީ އެމްޓީސީސީގެ ކުރީގެ ސީއީއޯ އަދި މާލެ ސިޓީ ކައުންސިލްގެ މޭޔަރުގެ ބައި އިލެކްޝަނުގައި ،އެމްޑީޕީގެ ކެންޑިޑޭޓެއްގެ ގޮތުގައި ވާދަކުރައްވާ އާދަމް އާޒިމަށް ގިނަ ތުހުމަތުތަކެއް ކުރައްވާފައެވެ.

އޭނާ ވަނީ އާޒިމް އިސްވެ ހުންނަވައިގެން އެމްއެމް އެކްސްޕޯޓުން އާޒިމްގެ އަމިއްލަ އެކައުންޓަށް 1 މިލިއަން ޔޫއެސް ޑޮލަރ ޓްރާންސްފަރކުރި ކަމަށް ތުހުމަތު ކުރައްވާފައެވެ. އޭނާ ވަނީ އެ ފައިސާ ޓްރާންސްފަރކުރީ އާޒިމަށް އެމްޓީސީސީގެ ސީއީއޯގެ މަގާމް ލިބިވަޑައިގަތް ފަހުން ކަަމަށްވެސް ތުހުމަތު ކުރައްވާފައެވެ.

އަދި ހަމައެހެންމެ އާޒިމްގެ އިހުމާލުން މަހާޖައްރާފު ރިޕެއަރކުރުން ލަސްވެ، 509،617،500 ރުފިޔާގެ ގެއްލުންވިކަމަށް ތުހުމަތުކޮށްފައި ވެއެވެ. މީގެ އިތުރުން، އެސްޓީއޯގެ އެމްޑީއަކަށް ހުންނެވިއިރު، އެސްޓީއޯގެ ބޭސްފިހާރަ ހުޅުވުމުގެ މަރުހަލާގައި ޚިޔާނާތް ހިންގެވިކަމުގެ ތުހުމަތުވެސް ވަނީ ކުރައްވާފައެވެ.

މަލްސާގެ އެ ތުހުމަތުތަކާއި ގުޅިގެން ރާއްޖެ އެމްވީން ސުވާލު ދެންނެވުމުން އާޒިމް ވިދާޅުވީ، އެއީ ސީދާ ކަނޑައެޅިގެން ދޮގު ވާހަކަތަކެއް ކަމަށެވެ. ފިނޭންސް މިނިސްޓްރީއާއި، ކަމާ ގުޅުންހުރި އެހެން އިދާރާތަކުން މައުލޫމާތު ހޯދުމުން އެ ވާހަކަތަކުގެ ހަގީގަތެއް ނެތްކަން ހާމަވާނެ ކަަމަށްވެސް އާޒިމް ވަނީ ވިދާޅުވެފައެވެ. އަދި އެފަދަ ތުހުމަތެއް އޮތް ނަމަ އެ މައްސަލަ ތަހުގީގުކުރަންވީ ކަމަށާއި، އެފަދަ މައްސަލައެއް ނޯންނާނެކަން ސާބިތުކަމާއެކު ވިދާޅުވަން ކެރިވަޑައިގަންނަވާ ކަމަށްވެސް އާޒިމް ވިދާޅުވިއެވެ.