އައްޑޫ ސިޓީގެ ހުޅުމީދޫއާއި ހިތަދޫ ބްރިޖަކުން ގުޅާލުމުގެ މަޝްރޫއުގެ މަސައްކަތް ފެށުމަށް ވަރަށް އަވަހަށް ފަންނީ އަދި ތަފްސީލީ ފީޒިބިލިޓީއާއި ޑިޒައިން މަސައްކަތް ބަޔަކާ ހަވާލުކުރާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ބުރާސްފަތި ދުވަހުގެ ރޭ ވެލާނާ އިންޓަރނޭޝަނަލް އެއާޕޯޓު އަދި އިކޮނޮމިކް ޒޯން ތަރައްގީ ކުރުމުގެ މަޝްރޫއު ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، މުޅި ރާއްޖެ ތަރައްގީ ކުރުމުގެ ޕްލޭން އެބައޮތް ކަމަށާއި، އެންމެ އުތުރުން، އެންމެ ދުކުނުން، މެދުރާއްޖެތެރެއިން، ހުރިހާ ސަރަހައްދުތަކެއް ތަރައްގީ ކުރާނެ ކަމަށެވެ.

އެގޮތުން އައްޑޫ ސިޓީގައި ކުރަން ނިންމާފައި ހުރި ކަންކަމަކީވެސް ހަމަ ރައްޔިތުން ބޭނުންވެގެން، ރައްޔިތުން އެދިފައިވާ ކަންކަން ކަމަށް ރައީސް މުއިއްޒު ވިދާޅުވިއެވެ. އަދި ވިދާޅުވީ އައްޑޫގައި ގާއިމްކުރެވޭ ބްރިޖުގެ މަޝްރޫއު ފެށުމަށްޓަކައި ވަރަށް އަވަހަށް ބްރިޖް އެޅުމުގެ މަސައްކަތަށް ބޭނުންވާ ފަންނީ އަދި ތަފްސީލީ ފީޒިބިލިޓީއާއި ޑިޒައިން މަސައްކަތް ބަޔަކާ ހަވާލުކުރާނެ ކަމަށެވެ. ނަމަވެސް މިމަޝްރޫއާއި ގުޅޭ އިތުރު ތަފްސީލެއް އެމަނިކުފާނު ހާމަކުރައްވާފައިނުވެއެވެ.

ރައީސް މުއިއްޒު ވިދާޅުވީ ރައްޔިތުންނަށްޓަކައި، ރައްޔިތުން ހަވާލުކުރި ޒިންމާ ފުރިހަމައަށް އަދާކުރުމުގައި ކުރިއަށްދާނެ ކަމަށާއި، ރައްޔިތުންގެ އެއްބާރުލުމާއި އެހީތެރިކަން އަބަދުވެސް ބޭނުންވާ ކަމަށެވެ.

ރައީސް މުއިއްޒު ވިދާޅުވީ މި ކަންތައްތައް ކުރުމުގައި ދެބަސްވާންޖެހޭ ތަނެއް ނެތް ކަމަށާއި، މި ކަންކަން ކުރުމުގައި އެންމެން އެކައްޗެއް ކިޔަންޖެހޭ ކަމަށެވެ. އަދި އެކަތިގަނޑަކަށް ވުމަކީ ގައުމަށްޓަކައިވާ އެކަތިގަނޑެއް ކަމަށް ރައީސް މުއިއްޒު ވިދާޅުވިއެވެ.

އައްޑޫ ސިޓީގެ ހުޅުމީދޫއާއި ހިތަދޫ ބްރިޖަކުން ގުޅާލުމުގެ މަސައްކަތް ފެށުމުގެ ކުރިން ހަދަންޖެހޭ ސާވޭގެ މަސައްކަތަށް ބޭނުންވާ 30 މިލިއަން ރުފިޔާ މި އަހަރުގެ ބަޖެޓުގައި ވެސް ވަނީ ހިމަނާފައެވެ.

ހުޅުމީދޫއާއި ހިތަދޫ ބްރިޖަކުން ގުޅާލުމަކީ ކުރީގެ ރައީސް އަބްދުﷲ ޔާމީންގެ ވައުދުފުޅެކެވެ. އަދި އެމަނިކުފާނުގެ ލެގަސީގައި ވެރިކަމަށް ވަޑައިގެންނެވުމަށް ކުރެއްވި މަސައްކަތުގައި ރައީސް މުއިއްޒު ވެސް ވަނީ އައްޑޫގެ ރައްޔިތުންނަށް އެބްރިޖު ގާއިމްކޮށްދެއްވާނެކަމަށް ވައުދުވެވަޑައިގެންފައެވެ.