ގުޅީފަޅުގައި ތަރައްގީކުރުމަށް ނިންމި ޕޯޓު، ތިލަފުށްޓަށް ބަދަލުކުރަން ނިންމައިފި

ގުޅީފަޅުގައި ތަރައްގީކުރުމަށް ނިންމާފައިވާ ޕޯޓު ތިލަފުއްޓަން ބަދަލުކުރަން ނިންމާފައިވާކަމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

ބުރާސްފަތި ދުވަހުގެ ރޭ ވެލާނާ އިންޓަރނޭޝަނަލް އެއާޕޯޓު އަދި އިކޮނޮމިކް ޒޯން ތަރައްގީ ކުރުމުގެ މަޝްރޫއު ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، އެއާޕޯޓު ތަރައްގީކުރުމުގެ މަޝްރޫއު އިތުރުން އެހެނިހެން ތަރައްގީގެ މަޝްރޫއުތައް ކުރިއަށްދާ ކަމަށެވެ.

އެގޮތުން މިހާރު ގުޅީފަޅުގައި ތަރައްގީކުރުމަށް ނިންމާފައިވާ ޕޯޓު ތިލަފުއްޓަށް ބަދަލުކުރަން ނިންމާފައިވާ ކަމަށާއި، އަދި ގުޅީފަޅުގައި ޕޯޓު ތަރައްގީކުރުމަކީ އެކަށީގެންވާ ކަމެއް ނޫންކަމަށް ރައީސް މުއިއްޒު ވިދާޅުވިއެވެ.

ރައީސް ވިދާޅުވީ، އެސަރަހައްދު ކަނޑައެޅިގެންދަނީ ރާއްޖެއަށް ބޭނުންވާ ހުރިހާ ބާވަތެއް ލިބޭ، ރާއްޖޭގައި އުފެއްދޭނެ ކާބޯތަކެތި އުފައްދާ، ރީ-އެކްސްޕޯޓް ކުރެވޭ ޚާއްސަ ސަރަހައްދަކަށް ކަމަށެވެ.

ގުޅީފަޅުގައި ތަރައްގީކުރުމަށް ނިންމާފައިވާ ޕޯޓު ތިލަފުއްޓަން ބަދަލުކުރަން ނިންމާފައިވާއިރު، ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުގައި އިންޓަރނޭޝަނަލް ޕޯޓު ގުޅީފަޅުގައި ތަރައްގީކުރުމަށް ނިންމައި، ބައެއް މަސައްކަތްތައް ކޮށްފައިވެއެވެ. ކުރީ ސަރުކާރުގައި މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ މެނޭޖިން ޑިރެކްޓަރަށް ހުންނެވި ޝާހިދު އަލީ ވިދާޅުވީ، ގުޅީފަޅުގެ ޕޯޓު ތަރައްގީކުރެވިއްޖެނަމަ ފުރިހަމަ ސްޓެންޑަޑެއްގައި، ހުރިހާ ވަސީލަތްތަކާއެކު ގާއިމްކުރެވުމުން، ދުނިޔޭގެ އެހެން ގައުމުތަކެކޭވެސް އެއްގޮތަށް 12 ގަޑިއިރާ 24 ގަޑިއިރާ ދެމެދުގެ ވަގުތެއްގައި ބޯޓުތައް ޓަރން އެރައުންޑު ކުރެވޭނެ ކަމަށެވެ. ޝާހިދު ވިދާޅުވީ މުޅި ރާއްޖެއަށްވެސް، އަދި މާލެއަށްވެސް ދިމާވާ އެންމެ ބޮޑު އެއް ދައްޗަކީ ލޯކަލް ހާބަރުތަކަށް ދިމާވާ ކޮންޖެޝަންސް ކަމަށެވެ. ޕޯޓް ތަރައްގީވެގެން ދިއުމާއެކު، ގިނަ މައްސަލަތަކަށް ހައްލު ލިބޭނެކަމަށާއި، ތިލަފުށްޓަށް ބަލާނަމަ އިންޓަނޭޝަނަލް ޕޯޓު ހަދައި، ދެން ލޯކަލް ޕޯޓު ހަދާނެ ޖާގައެއްވެސް ނޯންނާނެކަމަށް ޝާހިދު ވިދާޅުވިއެވެ.