މޫސުމާ ގުޅިގެން ލިބޭ ގެއްލުން ކުޑަކުރުމަށް އިންޝުއަރކުރާ މީހުން އަދިވެސް ވަރަށް މަދުކަމަށް، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އިން ބުނެފިއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަދައްވަމުން، އެ އޮތޯރިޓީގެ ޗީފް އެގްޒެކެޓިވް ހިސާން ހަސަން ވިދާޅުވީ، ފަރުދީ ލެވެލްގައާއި އަދި ކުންފުނިތަކުގެ ފެންވަރުގައިވެސް ވަރަށް ގިނަ ފަހަރު އިންޝުއަރެންސާ ދުރުކަން ފާހަގަކުރެވޭ ކަމަށެވެ. އަދި ދިވެހިންގެ ވިސްނުން ހުރީވެސް އިންޝުއަރެންސާ ދުރު ގޮތަކަށްކަން ފާހަގަކުރެއްވޭ ކަމަށް އޭނާ ވަނީ ވިދާޅުވެފައެވެ. އެހެންނަމަވެސް އެއީ ބަދަލުކުރަންޖެހޭ ކަމެއް ކަަމަށް އޭނާ ވަނީ ވިދާޅުވެފައެވެ.
އެ ތަންތަން އިންޝުއަރކުރުމަކީ ފަރުދުންނާއި ވިޔަފާރިތަކުގެ ވިލުންވެރިކަން އިތުރުވެގެންދާ ކަމެއް ކަަމަށާއި، އެކަމަށް ވަރަށް ބޮޑަށް ސަމާލުކަން ދިނުމަށް އެންޑީއެމްއޭއިން ވަނީ ބުނެފައެވެ. ޚާއްސަކޮށް ފުޅާ ވިޔަފާރިތައް ހިންގާ މީހުންގެ ފެންވަރުގައި އެކަމަށް ވިސްނަންޖެހޭ ކަމަށް ހިސާން ވަނީ ވިދާޅުވެފައެވެ. ރާއްޖޭގައި ހުރި އިންޝުރެންސް ކުންފުނިތަކުންވެސް ވަރަށް ކުޑަ ޕްރިމިއަމްއެއްގައި އިންޝުއަރެންސްގެ ޚިދުމަތް ލިބޭކަން އޭނާ ވަނީ ފާހަގަކުރައްވާފައެެވެ.
ޓްރާންސްފަރ ނިޒާމެއްގެ ތެރެއިން އެ މަސައްކަތް ކުރުމަކީ މުހިންމު ކަމެއް ކަމަށްވެސް އޭނާ ވަނީ ވިދާޅުވިއެވެ. ހިސާން އިތުރަށް ވިދާޅުވީ ،ނިމިދިޔަ އަހަރުވެސް އިންޝުއަރެންސް ނެތުމުގެ ސަބަބުން ބޮޑެތި ގެއްލުންތައް ލިބުނު ހާދިސާތައް ފާހަގަކުރެވިފައިވާ ކަމަށެވެ. އެގޮތުން އަތޮޅުތެރޭގައި މުދާ އަރުވައިގެން ދާ ބޯޓުފަހަރު އިންޝުއަރ ނުކުރުމުގެ މައްސަލަ ފާހަގަކުރެއްވޭ ކަމަށާއި، އެފަދަ 3 ހާދިސާއެއް ނިމިދިޔަ އަހަރުވެސް ރިޕޯޓްކޮށްފައި ވާކަމަށް އޭނާ ވިދާޅުވިއެވެ.
އިންޝުއަރެންސް ހަމަވެފައި ހުރިތޯ ބެލުމަށާއި، އިންޝުއަރކުރެވިފައި ވުމަކީ އާއްމުންނާއި މުދަލަށް ލިބޭ ގެއްލުން ކުޑަކުރެވޭނެ ކަމަކަށް ވުމުން، އެކަމަށް ސަމާލުކަން ދިނުމަށް ކަމާބެހޭ ފަރާތްތަކުން އިލްތިމާސްކުރައްވައެވެ.
