ފޯޖު ކުރި ކަމަށް ބުނާ ސިޓީގެ މައްސަލަ ޕޮލިހަކު ނެތް!

ކުލަބު ވެލެންސިއާގެ ތާއީދު އޮތް ކަމަށް ބުނެ، ފުޓުބޯޅަ އެސޯސިއޭޭޝަން އޮފް މޯލްޑިވްސް (އެފްއޭއެމް)ގެ އިންތިޚާބުގައި ވާދަކުރާ ކުލަބު އީގަލްސްގެ ވައިސް ޗެއާމަން މުވާފިޒް ހާޝިމް (މުފާ) ހުށަހަޅާފައިވާ ސިޓީ އަކީ، ފޯޖުކޮށްފައިވާ ސިޓީއެއް ކަމަށް ކުލަބު ވެލެންސިއާ އިން ބުނި ނަމަވެސް، މިހާތަނަށް އެ މައްސަލަ ޕޮލިހަށް ހުށަހަޅާފައި ނުވާ ކަމަށް އެ އިދާރާ އިން ބުނެފި އެވެ.

މި މަހު އޮންނަ އެފްއޭއެމްގެ އިންތިޚާބުގައި ވާދަކުރުމަށް މުފާ ފޯމު ހުށަހެޅިއިރު، އޭނާ އަތުގައި ވެސް ވެލެންސިއާގެ ތާއީދު ސިޓީ އޮތެވެ. ނަމަވެސް ވެލެންސިއާ އިން ވަނީ އެ ކުލަބުގެ ތާއީދު އޮތީ ޤައުމީ ޓީމުގެ ކުރީގެ ފޯވާޑު، އަދި އެފްއޭއެމްގެ ކުރީގެ ރައީސް އަޙުމަދު ޠާރިޤު (ޓޮމް) އަށް ކަމަށް ބުނެފަ އެވެ.

އެ މައްސަލައިގައި ވެލެންސިއާ އިން ވަނީ އާދީއްތަ ދުވަހު އެފްއޭއެމްގެ އިލެކްޓޯރިއަލް ކޮމިޓީ ސިޓީއެއް ފޮނުވައިފަ އެވެ. އެ ކުލަބުގެ އައު ޗެއާމަން ޢަބްދުﷲ އަޒްމީން ސޮއިކުރައްވާ ފޮނުއްވާފައިވާ ސިޓީގައި ވިދާޅުވެފައި ވަނީ، ބައެއް މީޑިއާތަކުގައި ވެލެންސިއާގެ ތާއީދު މުފާ އަށް އޮތް ކަމަށް ބުނެފައިވާތީ، އެކަން ސާފުކޮށްދެއްވަން ބޭނުންފުޅުވާ ކަމަށެވެ. އެ ސިޓީގައި އަޒްމީން ވިދާޅުވެފައި ވަނީ، ވެލެންސިއާ އިން އެންޑޯސްމަންޓް ދީފައި ވަނީ ޓޮމް އަށް ކަމަށާއި ވެލެންސިއާގެ ފުރިހަމަ ތާއީދު އޮތީ ވެސް ޓޯމް އަށް ކަމަށެވެ.

އެ މައްސަލައިގައި މީޑިއާ ތަކަށް ފުލުހުން ބުނީ، މިހާތަނަށް އެ ފަދަ މައްސަލަައެއް އެ އިދާރާ އަށް ހުށަހަޅާފައި ނުވާ ކަމަށެވެ. އެކަމާ ގުޅިގެން ރާއްޖެ އެމްވީ އަށް ކުލަބު ވެލެންސިއާ އިން ބުނީ، އެ މަސައްކަތް ކުރަމުން ދާ ކަމަށާއި، ވަރަށް އަވަހަށް އެ މައްސަލަ ފުލުހަށް ހުށަހަޅާނެ ކަމަށެވެ.