ގެދޮރުވެރިޔާ ސްކީމުގެ މައްސަލަ އޮތްގޮތަށް ބާއްވައި، ބިންވެރިޔާ ސްކީމުގެ ދަށުން މާލެ ސަރަހައްދުން ގޯއްޗަށް އެދި ހުށަހަޅާފައިވާ ފަރާތްތަކުގެ ތެރެއިން ގޯތީގެ އެއްބަސްވުމާއި ގޯތީގެ ރަޖިސްޓަރީ ހަވާލުކުރެވިފައި ނުވާ ފަރާތްތަކަށް، އެއްބަސްވުމުގައި ސޮއި ކުރުމާ ގުޅޭ މަސައްކަތްތައް ގެދޮރުވެރިކަމާ ބެހޭ ވުޒާރާއިން ފަށައިފިއެވެ.

ބުދަ ދުވަހު އެ ވުޒާރާއިން ކުރި އިއުލާނެއްގައި ބުނީ އެ މަސައްކަތް ބުދަ ދުވަހުން ފެށިގެން ފަށާފައިވާ ކަމަށާއި، އެ މަސައްކަތުގެ ތެރެއިން އެއްބަސްވުމުގައި ސޮއިކުރުމަށް ހަމަޖެހިފައިވާ ފަރާތްތަކަށް އެ މިނިސްޓްރީން ފޯން އަދި އެސްއެމްއެސްގެ ޒަރިއްޔާއިން ހާޒިރުވާނެ ތާރީޚާއި ގަޑި އަދި ތަން އަންގާނެ ކަމަށެވެ.

މީގެ އިތުރުން، މިހާތަނަށް ހަވާލުކުރެވިފައިވާ ގޯތީގެ ރަޖިސްޓްރީ ނުވަތަ އެއްބަސްވުމުގައި މައްސަލައެއް ފާހަގަ ކުރެވޭނަމަ އެ މިނިސްޓްރީއަށް ހުށަހެޅުމުން އެކަން އިސްލާޙްކުރާނެ ކަމަށް ވެސް އެ ބަޔާނުގައި ބުންޏެވެ.

ބިންވެރިޔާ ސްކީމުގެ ދަށުން ގޯތީގެ ރަޖިސްޓްރީ ދޫކުރުމުގެ މަސައްކަތް ސަރުކާރުން ފަށާފައިވަނީ، އެ މަސައްކަތް ފައްޓަވާނެކަމަށް ރައީސް މުއިއްޒު ވިދާޅުވެފައިވަނިކޮށެވެ.

އެގޮތުން ރައީސް އެފަދައިން ވިދާޅުވެފައިވަނީ ވެސް، ގެދޮރުވެރިޔާ އަދި ބިންވެރިޔާ ސްކީމާ ގުޅޭގޮތުން ސަރުކާރުން ވާހަކަތަކެއް ނުދެއްކުމާ ގުޅިގެން އާންމުންގެ ބޮޑެތި ފާޑުކިޔުންތަކެއް ސަރުކާރަށް އަމާޒުވެފައިވަނިކޮށެވެ.

އެގޮތުން ވަކިން ޙާއްސަކޮށް، ގެދޮރުވެރިޔާ ސްކީމުގެ ދަށުން ސަރުކާރުން ހަވާލުކުރި 4،000 ފްލެޓުގެ މައްސަލަ އެންޓި ކޮރަޕްޝަން ކޮމިޝަނުން ބަލަން ފެށި ފަހުން، އެ މައްސަލައިގައި ކަންހިނގަމުންދާ ގޮތެއް އާންމުންނަށް ހާމަކޮށްފައެއް ނުވެއެވެ. އެކަމުގެ ކަންބޮޑުވުމާއެކު އާންމުން އޭސީސީ އަދި ހައުސިން މިނިސްޓްރީއަށް ދިޔުމުން އެކަމުގައި ދެ އިދާރާއިން ދައްކާ ވާހަކަތައް ވެސް ދިމައެއް ނުވެއެވެ.

ކުރީގެ ރައީސް، އިބްރާހިމް މުޙައްމަދު ސާލިހުގެ ސަރުކާރުން ފެށި ބިންވެރިޔާ ސްކީމުގެ ދަށުން ޝަރުތު ހަމަވި 19639 މީހުންނަށް ގޯތި ލިބެއެވެ. އެއީ 9000ށްވުރެ ގިނަ ބިމެވެ. ބިންވެރިޔާ ސްކީމްގެ ދަށުން ހުޅުމާލެއިން 1351 ބިން، ގުޅިފަޅުން 2218 ބިން، އަދި ގިރާވަރު ފަޅުން 5432 ބިން ދޫކުރުމަށް ވަނީ ހަމަޖެހިފައެވެ. އެއީ ޖުމްލަ 9001 ގޯއްޗެވެ.

މި ގޯތިތަކުގެ ތެރެއިން 1250 އަކަފޫޓާއި 1650 އަކަފޫޓާއި 2050 އަކަފޫޓުގެ ގޯތިތައް ދިނުމަށް ހަމަޖެހިފައި ވަނީ ހުޅުމާލެއާއި، ގުޅީފަޅާއި ގިރާވަރު ފަޅުންނެވެ. އޭގެ އިތުރުން 2450 އަކަފޫޓުން ފެށިގެން 4000 އަކަފޫޓާ ދެމެދުގެ ގޯތިތައް ދޫކުރާނީ ހުޅުމާލެއާއި ގުޅީފަޅުންނެވެ.