ސްވިމިން އެސޯސިއޭޝަން އޮފް މޯލްޑިވްސް އިން އިންތިޒާމުކޮށްގެން ބާއްވާ 15 ވަނަ މަކިޓާ އިންޓަ ސްކޫލް ފެތުމުގެ މުބާރާތް ފަށައިފިއެވެ.

ހޮނިހިރު ދުވަހު ފަށާފައިވާ މި މުބާރާތުގައި ޖުމަލް 15 ސްކޫލަކުން ވާދަކޮށްފައި ވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ 4 އުމުރު ފުރާއަކަށް ބަހާލައިގެން، އަންހެން އަދި ފިރިހެން، މި ދެ ކެޓަގަރީ ވަކިންނެވެ.

މުބާރާތުގައި ފެތުންތެރިން ވާދަކުރާ އުމުރުފުރާ ތަކަކީ 12 އަހަރުން ދަށާއި، 14 އަހަރުން ފަށާއި 16 އަހަރުން ދަށާއި، އަދި 19 އަހަރުން ދަށުގެ އުމުރު ފުރާއެވެ. މި 4 އުމުރު ފުރާގައިވެސް ދެ ޖިންސުގެ ފެތުންތެރިން ވާދަކުރެއެވެ.

މީގެ އިތުރުންވެސް، ސްވިމިން އެސޯސިއޭޝަނުން އިންތިޒާމުކޮށްގެން ބާއްވާ ދެވަނަ ކިޑްސް ސިވިމިންގް ފެސްޓިވަލް އަންނަ އޯގަސްޓް މަހު ބާއްވަން ވަނީ ހަމަޖެހިފައެވެ. މި ފެސްޓިވަލްގައި 13 ސްކޫލެއް ވާދަކުރާއިރު، 6 އަހަރުން ދަށާއި، 8 އަހަރުން ދަށާއި، އަދި 10 އަހަރުން ދަށުގެ އުމުރު ފުރާއިން ފެތުންތެރިން ވާދަ ކުރުމަށް ވަނީ ހަމަޖެހިފައެވެ.