ބްރެޒިލްގެ ގައުމީ ފުޓްބޯޅަ ޓީމުގެ ކޯޗަކަށް އެ ގައުމުގެ ލުއިސް ފިލިޕޭ ސްކޮލާރީ ގެނައުމަށް މަސައްކަތް ފަށައިފި އެވެ.

ސްކޮލާރީ އަކީ 2002 ވަނަ އަހަރުގެ ވޯލްޑްކަޕާއި ކޮންފެޑަރޭޝަންސް ކަޕުގެ ޗެމްޕިއަންކަން ބްރެޒިލަށް ހޯދައިދިން ކާމިޔާބު ކޯޗެވެ. އޭނާ ވަނީ އޭގެ ފަހުން 2012 އިން 2014 އަށް ވެސް ބްރެޒިލަށް ކޯޗުކޮށްދީފަ އެވެ. މިވަގުތު އޭނާ ހުރީ ބްރެޒިލްގެ އެތްލެޓިކޯ މިނެއިރޯގެ ކޯޗުކަމުގަ އެވެ.

ބްރެޒިލުން ސްކޮލާރީ ގެނައުމަށް މަސައްކަތް ފެށީ ތަޖުރިބާކާރު ކޯޗު އިޓަލީގެ ކާލޯ އެންޗެލޯޓީ ނުލިބުމުންނެވެ. 2022 ވަނަ އަހަރުގެ ވޯލްޑްކަޕުގެ ނާކާމިޔާބީއާއެކު އެންޗެލޯޓީ ކޯޗަކަށް ގެނައުމަށް ބްރެޒިލުން އޭނާއާއެކު އަނގަބަހުން އެއްބަސްވުމަކަށް ވެސް އައެވެ. ނަމަވެސް އެންޗެލޯޓީ 2026ގެ ނިޔަލަށް ރެއާލް މެޑްރިޑްގެ ކޮންޓްރެކްޓް އާކުރީ މިދިޔަމަހު އެވެ. އެއީ ބްރެޒިލްގެ ފުޓްބޯޅަ ފެޑަރޭޝަނުގެ ރައީސް އެޑްނާލްޑޯ މަގާމުން ދުރުކުރުމާ ވެސް އެކުގަ އެވެ.

ބްރެޒިލަށް 2002 ވަނަ އަހަރުގެ ފަހުން ވޯލްޑް ކަޕް ކާމިޔާބުކުރެވިފައިނުވެ އެވެ. އަދި ސްކޮލާރީގެ ކޯޗުކަމުގައި 2014 ވަނަ އަހަރުގެ ސެމީ ފައިނަލަށް ދިޔަ ފަހުން އެ ގައުމަށް ސެމީ އަށް ވެސް ދަތުރުކުރެވިފައިނުވެ އެވެ. މިހެންވެ ފާޑުކިއުންތައް ވަނީ ބްރެޒިލް ފެޑަރޭޝަނަށް އަމާޒުވެފަ އެވެ.

ސްކޮލާރީ އަކީ ރީތި ކުޅުމަކަށްވުރެ ބޮޑަށް ނަތީޖާއަށް ވިސްނައިގެން ކޯޗުކޮށްދޭ މީހެކެވެ. އޭނާ ވަނީ އިނގިރޭސި ޕްރެމިއާ ލީގު ޗެލްސީ އަށް ވެސް ހޯދައިދީފަ އެވެ. އަދި ޕޯޗުގަލް ޔޫރޯ ފައިނަލަށް ވެސް ގެންގޮސްދިނެވެ.