"ނައްޔު" ގެއްލުނުތާ 10 ދުވަސް، އަދިވެސް ނުފެނޭ!

އައްޑޫ ސިޓީގައި، މޫދަށް އެރި އުޅެނިކޮށް ގެއްލިގެން ހޯދަމުން އަންނަ މަރަދޫ، ކުރެދުމާގެ މުހައްމަދު ނައިޝް ނަސްރު (ނައްޔު) އަދިވެސް ނުފެންނަ ކަމަށް އެމްއެންޑީއެފުން ބުނެފިއެވެ.

އޭނާ ގެއްލުނީ ޑިސެމްބަރު މަހުގެ 21 ވަނަ ދުވަހުއެވެ. އޭނާ ގެއްލިގެން ރިޕޯޓްކުރީ 21 ޑިސެމްބަރުވީ ބުރާސްފަތި ދުވަހުގެ ރޭ 22:45 ކަންހާއިރު ކަމަށް އެމްއެންޑީއެފުން ވަނީ ބުނެފައެވެ. ރާއްޖެ އެމްވީ އަށް މައުލޫމާތު ދެމުން އެމްއެންޑީއެފުން ބުނީ އޭނާ ހޯދުމަށް މިހާތަނަށް ވައިގެ ސަރަހައްދުން 9916.46 (ނުވަ ހާސް ނުވަ ސަތޭކަ ސޯޯޅަ. ހަތަރެއް ހައެއް) ސްކޮޔަރ ނޯޓިކަލް މޭލްގެ ސަރަހައްދެއް ބަލާފައިވާ ކަމަށެވެ. އަދި ކަނޑުގެ ސަރަހައްދަށް ބަލާއިރު ސަރފޭސް ކަނޑުމަތިން 2386.51 ( ދެހާސް ތިން ސަތޭކަ އަޑިހަ ހައެއް. ފަހެއް އެކެއް) ސްކޮޔަރ ނޯޓިކަލް މޭލްގެ ސަރަހައްދެއް ބަލާފައިވާ ކަމަށެވެ. ސަބް ސަރފޭސް ނުވަތަ ކަނޑުއަޑިން 1026 (އެއްހާސް ސައްބީސް) ސްކޮޔަރ ނޯޓިކަލް މޭލްގެ ސަރަހައްދެއް ވަނީ ބަލާފައެވެ.

Advertisement

ނައީޝް ގެއްލުނުއިރު ލައިގެން ހުރީ އަތްދިގު ހުދު ކުލައިގެ ޓީޝާޓެއްކަމަށް އެމް.އެން.ޑީ.އެފުން ވަނީ ބުނެފައެވެ. ނައީޝް ގެއްލިގެން އޭނާ ހޯދަން ދައުލަތުގެ އިދާރާތަކުގެ ބެލުމުގެ ދަށުގައި ހުރި ހުރިހާ ވަސީލަތްތަކެއް ބޭނުން ނުކުރާތީ ސަރުކާރަށް ވަނީ ފާޑުކިޔުން އަމާޒުވެފައެވެ. އެގޮތުން އިންޑިއާ އިން ރާއްޖެ އަށް ހަދިޔާކުރި ޑޯނިއާ މަތިންދާ ބޯޓު ބޭނުން ނުކުރާތީ އެކަމުގެ ފަޑުކިޔުންތައް ވަނީ އަމާޒުވެފައެވެ. ރާއްޖޭގެ އިދާރާތަކުގައި ސާޗް އެންޑް ރެސްކިއު އޮޕަރޭޝަންތައް ހިންގޭނެ ވަރަށް ގާބިލުކަން އިތުރު ކުރުމުގެ މަސައްކަތް ފުރިހަމަ ނުވަނީސް އެ ވަސީލަތްތަކާއި ފަންނީ ލަފާ އޮޕަރޭޝަންތަކުގައި ބޭނުން ނުކުރުމަކީ އެ އޮޕަރޭޝަންތައް ކާމިޔާބު ކުރަން ދަތިވާނެ ކަމެއް ކަމަށް އެ ޕާޓީން ދެކޭ ކަމަށް އެމްޑީޕީ އިން ބުނެފައިވެއެވެ.