ދިވެހި އަސްކަރިއްޔާގެ އެންލިސްޓެޑް ސިފައިންގެ އެންމެ އިސް މަޤާމުކަމުގައިވާ "ސާޖަންޓް މޭޖަރ އޮފް އެމްއެންޑީއެފް"ގެ މަޤާމު އަދާކުރައްވާފައިވާ ކޮމާންޑް ސާޖަންޓް މޭޖަރ އަޙްމަދު ޢަބްދުﷲ، ސިފައިންގެ ޚިދުމަތުން ޝަރަފުވެރިކަމާއެކު ރިޓަޔަރކުރައްވައިފިއެވެ.

ސާޖަންޓް މޭޖަރ އަޙްމަދު ޢަބްދުﷲ ސިފައިންގެ ޚިދުމަތުން ރިޓަޔަރ ކުރައްވާފައިވަނީ 2024 ޖަނަވަރީ 01 ވަނަ ދުވަހުން ފެށިގެންނެވެ. އެކަމަށްޓަކައި އާދިއްތަ ދުވަހު ބޭއްވި ޚާއްސަ ރަސްމިއްޔާތުގައި ޗީފް އޮފް ޑިފެންސް ފޯސް ލެފްޓިނެންޓް ޖެނެރަލް ޢަބްދުއްރަޙީމް ޢަބްދުއްލަޠީފްގެ އިތުރުން އެމްއެންޑީއެފްގެ އިސް ބޭފުޅުންނާއި، ކޮމާންޑް ސާޖަންޓް މޭޖަރ އަޙްމަދު ޢަބްދުﷲގެ އާއިލާގެ ބައެއް ބޭފުޅުންވެސް ބައިވެރިވެވަޑައިގެންފައިވެއެވެ.

ސާޖަންޓް މޭޖަރ އަޙްމަދު ޢަބްދުﷲ އަކީ ދިވެހި އަސްކަރިއްޔާގެ އެންލިސްޓެޑް ސިފައިންގެ އެންމެ އިސް މަޤާމުކަމުގައިވާ "ސާޖަންޓް މޭޖަރ އޮފް އެމްއެންޑީއެފް"ގެ މަޤާމު އަދާކުރައްވާފައިވާ ބޭފުޅެކެވެ.

އެމްއެންޑީއެފުން މައުލޫމާތު ދޭ ގޮތުގައި ކޮމާންޑް ސާޖަންޓް މޭޖަރ އަޙްމަދު ޢަބްދުﷲގެ 31 އަހަރުގެ ސިފައިންގެ ޚިދުމަތުގައި އެންމެ ފަހުން ހުންނެވީ އިސްލާމިކް މިލިޓަރީ ކައުންޓަރ ޓެރަރިޒަމް ކޯލިޝަން ސެންޓަރުގައި ދިވެހި އަސްކަރިއްޔާ ތަމްސީލްކުރައްވާ މެންބަރެއްގެ ގޮތުގައެވެ. އެގޮތުން ސައޫދީ އަރަބިއްޔާގައި ޤާއިމްކުރެވިފައިވާ މި ސެންޓަރަށް އެންމެ ފުރަތަމަ ފޮނުވުނު ޓީމުގައި ހިމެނިވަޑައިގެން، އެ ޓީމުގެ މެންބަރެއްގެ ގޮތުގައި މަސައްކަތް ކުރައްވާފައިވެއެވެ.

މީގެ އިތުރުންވެސް، އެކްޓިންގ ކޮމާންޑް ސާރޖަންޓް މޭޖަރ އޮފް އެމް.އެން.ޑީ.އެފްގެ މަޤާމާއި، އެމް.އެން.ޑީ.އެފް ސާރވިސް ކޯރގެ ސީނިއަރ އެންލިސްޓެޑް ލީޑަރގެ މަޤާމާއި، އެން.ސީ.އޯ އެކަޑެމީގެ ސީނިއަރ އެންލިސްޓެޑް ލީޑަރެއްގެ ގޮތުގައި އުޅުއްވާފައިވެއެވެ.

1992 ވަނަ އަހަރުގެ މޭ މަހުގެ 11 ވަނަ ދުވަހު ދިވެހި ސިފައިންގެ ޚިދުމަތާ ގުޅިވަޑައިގެން އަޙްމަދު ޢަބްދުﷲ ވަނީ 31 އަހަރާއި 07 މަހާއި 21 ދުވަހުގެ މުއްދަތެއްގައި ދިވެހި ޤައުމަށް ޚިދުމަތް ކޮށްދެއްވާފައެވެ. އެ މުއްދަތުގައި ޤައުމަށް ދިމާވި ބޮޑެތި ކަންކަމުގައި އަމަލީ ގޮތުން ބައިވެރިވެވަޑައިގެން ޚިދުމަތް ކޮށްދެއްވާފައިވެއެވެ.

އަދި ސިފައިންގެ އެންލިސްޓެޑް ކޯރގެ އެންމެ އިސް މަޤާމްކަމުގައިވާ ސާރޖަންޓް މޭޖަރ އޮފް އެމްއެންޑީއެފްގެ މަޤާމުގެ ޒިންމާއާއި މަސްޢޫލިއްޔަތުތައް އޭގެ އެންމެ ފުރިހަމަގޮތުގައި އަދާ ކުރައްވާފައިވާއިރު، ދިވެހި އަސްކަރިއްޔާގެ ތަފާތު ބޯޑުތަކާއި ކޮމެޓީތަކުގައި ވެސް އަގުހުރި މުހިންމު ޚިދުމަތްތަކެއް  ކުރައްވާފައިވެއެވެ.

ކޮމާންޑް ސާރޖަންޓް މޭޖަރ އަޙްމަދު ޢަބްދުﷲއަށް 18 ޝަރަފުގެ ނިޝާނެއް ލިބިވަޑައިގެންފައިވެއެވެ. އެއީ 08 މެޑެއްޔާއި 10 ކުލައެކެވެ. އެގޮތުން ލިބިވަޑައިގެންފައިވާ މެޑެލި ތަކަކީ ރައީސުލްޖުމްހޫރިއްޔާގެ މެޑެލި، އިޚްލާޞްތެރި ޚިދުމަތުގެ މެޑެލި، ސިފައިންގެ ޚިދުމަތުގެ މެޑެލި، އަޚްލާޤީ މެޑެލި، ދިގުމުއްދަތެއްގައި ޚިދުމަތް ކުރުމުގެ މެޑެލި، 17 ވަނަ ސާކު ސަމިޓް މެޑެލި، މިނިވަން 50ގެ މެޑެލި އަދި ޖުމްހޫރީ 50ގެ މެޑެއްޔެވެ.

ޝަރަފުގެ ނިޝާނުގެ ކުލައިގެ ގޮތުގައި ރައީސުލްޖުމްހޫރިއްޔާގެ ކުލަ، ދިގު މުއްދަތެއްގައި ޚިދުމަތްކުރުމުގެ ކުލަ، އިޚްލާޞްތެރި ޚިދުމަތުގެ ކުލަ، ސިފައިންގެ ޚިދުމަތުގެ ކުލަ، ޚާއްޞަ ޚިދުމަތުގެ ކުލަ، ކާމިޔާބުގެ ކުލަ، ހުނަރުވެރިކަމުގެ ކުލަ އަދި އަޚްލާޤީކުލަ 3 ފަހަރަށް ލިބިވަޑައިގެންފައިވެއެވެ.