ކައުންސިލުތައް ބާރުވެރި ކުރުމަށް ސަރުކާރުގެ ތެރެއިން ވަކި ވުޒާރާއެއް އުފައްދަންޖެހޭކަމަށް ޤަބޫލު ނުކުރެވޭ: މެމްބަރު ނިޔާޒު
ކައުންސިލުތައް ބާރުވެރި ކުރުމަށް ޤާނޫނުން ފަހިކޮށްދީފައިވޭ
ހުޅުމާލޭ ދާއިރާގެ މެމްބަރު އަލީ ނިޔާޒު
ކައުންސިލުތަކަށް މާލީ ބާރުވެރިކަން ދިނުމުގެ ނަމުގައި ސަރުކާރުގެ ތެރެއިން ވުޒާރާއެއް އުފައްދައި، އެ ވުޒާރާއަށް އަނެއްކާވެސް ސަރުކާރުން ޚަރަދުކުރަން ޖެހުމުން އެއީ ދެކޮޅުޖެހޭ ކަމެއްކަމަށް ޤަބޫލު ނުކުރައްވާކަމަށް ހުޅުމާލޭ ދާއިރާގެ މެމްބަރު އަލީ ނިޔާޒު ވިދާޅުވެއްޖެއެވެ.
މެމްބަރު ނިޔާޒު އެހެން ވިދާޅުވީ ހޮނިހިރު ދުވަހު އެމްޑީޕީ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމުގައެވެ.
ނިޔާޒު ވިދާޅުވީ، ކައުންސިލުތައް ބާރުވެރި ކުރުމަށް ވުޒާރާއެއް އުފައްދަންޖެހޭކަމަށް ޤަބޫލު ނުކުރެވޭކަމަށެވެ.
ކައުންސިލުތައް ބާރުވެރި ކުރުމަށް ޤާނޫނުން ފަހިކޮށްދީފައިވާއިރު، މިހާރު އޭގެ ތެރެއިން މަދުވާ ކަމަކީ މާލީ ގޮތުން ކައުންސިލުތައް ބާރުވެރިވުންކަން ފާހަގަ ކުރައްވައި ނިޔާޒު ވިދާޅުވީ، މާލީ ގޮތުން ކައުންސިލުތައް ބާރުވެރި ކުރުވުމަށް ވުޒާރާއެއް އުފައްދަންޖެހޭނެކަމަށް ޤަބޫލު ނުކުރައްވާކަމަށެވެ.
ނިޔާޒު ވިދާޅުވީ، އެފަދަ ކަންކަން އެހެން ހުރުމުގެ ސަބަބުން ވުޒާރާތަކުގެ މެންޑޭޓުތައް ބަލަން ބޭނުންވާކަމަށެވެ. އެއީ މަޖިލީހަށް ޤާނޫނުއަސާސީންނާއި ޤާނޫނުން ލާޒިމުކޮށްފައިވާ ކަންކަންކަމަށް ނިޔާޒު ވިދާޅުވިއެވެ.
ކައުންސިލުތައް ބާރުވެރި ކުރުވުމުގެ ނަމުގައި މި ސަރުކާރުން މިނިސްޓްރީ އޮފް ސިޓީސް ލޯކަލް ގަވަރމަންޓް ނަމުގައި ވުޒާރާއެއް އުފައްދާފައިވާއިރު، ގިނަ ބައެއްގެ ފާޑުކިޔުން ވަނީ އަމާޒުވެފައެވެ. އެއީ ކައުންސިލުތަކަށް ސަރުކާރުން ބާރު ފޯރުވުމަށް ކޮށާލެވޭ މަގަކަށް ވެދާނެކަމަށްވެސް ގިނަ ފަރާތްތަކުން ދަނީ ބުނަމުންނެވެ.
