ރައީސް މުއިއްޒު ބޭނުންފުޅުވާ ގޮތަށް ވޯޓުދޭނެ މެންބަރެއް އެމްޑީޕީގެ ޕާލިމަންޓަރީ ގްރޫޕުގައި ނުތިބޭނެ: އަލީ ނިޔާޒު
ހުރިހާ ބޭފުޅުން ވެސް ވޯޓުދޭނީ ޕާލިމަންޓަރީ ގުރޫޕުން ނިންމާ ގޮތަށް
ރައްޔިތުން މަޖިލީހުގެ ހުޅުމާލެ ދާއިރާގެ މެންބަރު އަލީ ނިޔާޒު
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބޭނުންފުޅުވާ ގޮތަށް ވޯޓުދޭނެ މެންބަރެއް އެމްޑީޕީގެ ޕާލިމަންޓަރީ ގްރޫޕުގައި ނުތިބޭނެ ކަމަށް ރައްޔިތުން މަޖިލީހުގެ ހުޅުމާލެ ދާއިރާގެ މެންބަރު އަލީ ނިޔާޒު ވިދާޅުވެއްޖެއެވެ.
ހޮނިހިރު ދުވަހު ޕީޖީން ބޭއްވި ނޫސްވެރިންގެ ބައްދަލުވުމުގައި މެންބަރު ނިޔާޒު ވިދާޅުވީ ރައީސް މުއިއްޒު ބޭނުންފުޅުވާ ގޮތަށް ވޯޓު ދޭނެ އެއްވެސް މެންބަރަކު އެމްޑީޕީގައި ނުހުންނާނެ ކަމަށާއި، ހުރިހާ ބޭފުޅުން ވެސް ވޯޓުދޭނީ ޕާލިމަންޓަރީ ގުރޫޕުން ނިންމާ ގޮތަށް ކަމަށެވެ. އަދި އެ ނިންމާ ހުރިހާ ނިންމުންތަކަށް މެންބަރުން އިހުތިރާމްކުރާނެ ކަމުގެ ޔަގީންކަން ނިޔާޒު ދެއްވިއެވެ.
ވަޒީރުންނަށް ރުހުން ދިނުމާއިގުޅޭ މަސައްކަތްތަކަށް އިޝާރާތް ކުރައްވައި ނިޔާޒު ވިދާޅުވީ ވަޒީރުންނަށް ރުހުން ހޯދުމަށް މަސައްކަތް ނުކުރާނެކަން ސަރުކާރުން ހާމަކޮށްފައިވާ ކަމަށެވެ. އަދި މިގޮތަށް މިކަން ހާމަކޮށްފައިވަނީ އެމްޑީޕީގެ 13 މަޖިލިސް މެންބަރުން ޕީއެންސީއަށް ސޮއިކުރެއްވުމާއި ގުޅިގެންނެވެ. އަދި އިތުރު އެމްޑީޕީގެ މެންބަރުން ޕީއެންސީއާ ގުޅިދާނެތޯ ނޫސްވެރިން ކުރި ސުވާލަކަށް ޖަވާބު ދެއްވަމުން ނިޔާޒު އެފަދަ މެންބަރުންތަކެއް އެމްޑީޕީގައި މިހާރު ތިބި ކަމަށް ގަބޫލުނުކުރެވޭ ކަމަށެވެ.
28 ޑިސެންބަރު 2023 ގައި އެމްޑީޕީގެ 13 މެމްބަރަކު ވެރިކަން ކުރާ ޕީއެންސީއާ ގުޅިވަޑައިގަތުމަށް ބޭއްވި ޖަލްސާގައި ވާހަކަ ދައްކަވަމުން ރައީސް މުއިއްޒު ވިދާޅުވީ މިހާތަނަށް ސޮއި ނުކުރެއްވި ނަމަވެސް އެމަނިކުފާނާއެކު އިތުރު އެމްޑީޕީ މެމްބަރުން އަދިވެސް އެބަ ތިބި ކަމަށެވެ. ރައީސް މުއިއްޒު ވިދާޅުވީ އެމްޑީޕީގެ ބައެއް މެމްބަރުން ތިބީ ވަރަށް ވަރުގަދަ އަޒުމެއްގައި ކަމަށާއި "އިނގިލި ބުރިކޮށްލިޔަސް" އެމަނިކުފާނާ ދެކޮޅަށް އެ މެމްބަރުން ވޯޓު ނުދޭނެ ކަމަށެވެ. އަދި ވިދާޅުވީ އެކިއެކި ސަބަބުތަކާއި މަސްލަހަތަށްޓަކައި ފާޅުގައި ގުޅިވަޑައި ނުގަންނަވަނީ ކަމަށް ރައީސް މުއިއްޒު ވިދާޅުވިއެވެ.
